Jakari 8
8
Luwah ndig ɗa Jerusalem gog
1Ta lo Bɨraɓe Ngekoosɨg ɗe romt an: 2Titbe kel Bɨraɓe Ngekoosɨg: Mĩ kɨ jàng kɨ Siõ, kɨ jàng kɨngãi, m'ɗa sia jàng kɨ wong kɨtɔlsɔkɨr. 3Titbe kel Bɨraɓe, M'ndɨ m'tel kɨ Siõt gog, m'a m'ndɨ dan Jerusalemt na a kunɨn Jerusalem ɓebo kɨro, mbalbo lo Bɨraɓe Ngekoosɨg, mbalbo kɨjaɓat. 4Titbe kel Bɨraɓe Ngekoosɨg: Bɨga dekɨdɨngãg kɨ bɨga dekɨdẽg a ndɨn kad ɗobgt kɨ Jerusalem, dekɨɗen kɨ kagtɔsɨ lon jint kɨta ɓala kɨngãi. 5Ɗobg kɨ ɓebot a ɗoosɨn kɨ ngan kɨdɨngãg kɨ kɨdẽg Ĩgɨn ɗa ndamɨn tit. 6Titbe kel Bɨraɓe Ngekoosɨg: Ĩla nya 'nten i nya kɨya takum ndeg degt'n ɗan kam ndɔgt 'nten a ne, a i nya kɨya titbe takum'mt tɔ ho a? Kel Bɨraɓe Ngekoosɨg. 7Titbe kel Bɨraɓe Ngekoosɨg: Oo, m'a maj deg lom ko dɔning kɨloɓakàdt kɨ dɔning kɨlokudkàdt, 8m'a m'ɗe sed kad ndɨn kam Jerusalemt, a ĩn deg lom, na m'a mĩ Luwah lod, kam nyaɗakɨrot kam nyaɗat kɨdenesew, 9Titbe kel Bɨraɓe Ngekoosɨg: Adɨn jisɨ ngang, ĩgɨn ndɨ oon dɔ tag lo ngekelta kɨta Luwaht ɓone kɨ kaglo'n ndan ne girr kuj lo Bɨraɓe Ngekoosɨg kad ɗan kuj kɨjaɓat. 10Kɨtɔ kete nõ ndogt'n non nyabaji kɨta deg kɨ nyabaji kɨta dãg goto na lapia lo de kɨ ngekand kɨ nge tee goto kɨta madngéta kɨta m'sɔkɨ dekɨɗen kɨ ndoor madɓen. 11Na tajigla m'a m'ɗa kɨ ndeg deg'n ɗan tit'n hã, m'ɗan kam ndɔgt kɨkete al, kel Bɨraɓe Ngekoosɨg, 12A duwɨn kohnya kɨ lapia, dĩndu a tee kɨ kandɨn, dɔning a tee kɨ nyasa na dɔrãg a adɨn man tàl lod. M'a mad ndeg deg kɨ nãin õn nduba nyag 'nten tube, 13A i titbe tit'n hã ĩn ne deg kɨndɔl ku girrdegt ye, in ngékɨɓe lo Juda kɨ ngékɨɓe lo Israel, titbe tɔ m'a m'ajsɨn, na a ĩn ngemajkurr, Ot ɓoolɨn, kɨ adɨn jisɨ ngang. 14Kɨtɔ titbe kel Bɨraɓe Ngekoosɨg: Tit'n hã m'ɔj ta ɗasɨ majal lon bɔwsɨg sɔkɨn wong lom, kel Bɨraɓe Ngekoosɨg, na m'nyago ndig ɗa lom al, 15titbe tɔ kam ndɔgt'n ɗan m'ɔj ta ɗa maj kɨ Jerusalem kɨ nge kɨɓe lo Juda. Ot ɓoolɨn. 16Oon nya'n hã a i ɗan. Kɨ dekɨɗen el rota madɓen, i gangɨn ta kɨrota ta bɔmɓegt losɨ kad i ndɨn ne kɨ lapia. 17Ot kad de ɔj ta ɗa majal ngar kamɨnt kɨ madɓen, ot ndigɨn yokɨnda kɨngom, kɨta m'ɔsɨ ta nyag'n non, kel Bɨraɓe.
Girrdeg a ɗen Jerusalem, sahn Bɨraɓe
18Ta lo Bɨraɓe Ngekoosɨg ɗe romt an: 19Titbe kel Bɨraɓe Ngekoosɨg: Kɔgro nyasa kɨ nah kɨkõsɔɔ kɨ nah kɨkõmi kɨ nah kɨkõtanãimɨta kɨ nah kɨ kõ kɨlah a ĩ ndɔ ronel kɨ kamnda kɨta ngékɨɓe lo Juda kɨ ɗa nahg kɨ ronel. Kɨtɔ 'nten i tarɨn rota kɨ lapia. 20Titbe kel Bɨraɓe Ngekoosɨg: Girrdeg a ɗen ɓaitɔ kɨ ngendɨ ɓebogt. 21Ngéndɨ ɓebot mad a awɨn kam kɨmadt anan: Ad j'awɨn kɨ kɔn Bɨraɓe na kɨ sahn Bɨraɓe Ngekoosɨg, mĩ tɔ m'a m'aw. 22Na deg ngãi, be kɨ girrdeg kɨ ngetɔg a ɗen sahn Bɨraɓe Ngekoosɨg Jerusalem kad kõ Bɨraɓe. 23Titbe kel Bɨraɓe Ngekoosɨg: Ndɔt'n non deg kɨlah ko kam girrdegt kɨ taɓe kɨ dang dang a hɔn ta kub lo Juip kɨɗa, anan: J'a j'aw sesɨ kɨta j'oo Luwah i nat sesɨ.
Currently Selected:
Jakari 8: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
