Romag 3
3
De kɨdenesew goto
1Ĩla i titbe a ne, ɗi Juip tɔin de'n ger Luwah al a? Gaj kɨja ye kara i ɗi a? 2I soot ngãi kad m'ɔrrsɨ girra mad oon. Dasabang, i Juipg la Luwah la ta lon jidt ye. 3Ĩla Juip madg adɨn kamd Luwah al ye, kadkam al lod a ɔg kad Luwah ɗanyakɨro oo? 4Ãã, i be al. Maj kad i gerɨn nya 'nten: Luwah i Ngerota, na deg tube ĩn ngékeltakɨbal. Kɨtɔ maktub kɨkunjɗang elta dan dɔ Luwah an: ĩ Luwah, takeli i goɗobat, na lon aw lo gangtat a ne, naj i loi. 5Na ĩla nya ɗa kɨdenesew al loj ndɨ ad deg gerɨn Luwah i ngeɗanya kɨdenesew a ne, kaa j'an ɗi? Kaa j'an Luwah ɗa nya kɨdenesew al lon ad wong lon son dɔjt e? (M'ndɨ m'elta tit takel deg be). 6Ãã, i be al. Ĩla Luwah i ngeɗanya kɨdenesew al a ne, titbãi hã a gangɨn ne ta dɔ degt kɨ dɔningt a? 7Na ĩla takɨbal lom ɗa ad rota lo Luwah tee kɨ tɨga unj tɔi kɨ kete, kɨta kɔsɨgon loa ad deg gerɨna a ne, kɨtɔɗi gangɨn ne ta dɔmt tit mĩ ngeɗa majal be a? 8Deg madg ndɨ lan ta kɔjt anan j'elta 'nten: Ad kɨ ɗan majal kɨtakad maj teen, ye asɨ kad Luwah gangta dɔ degt'n non.
De kɨdenesew goto nõ Luwaht
(Nge 7:20; Job 15:14-16; Gal 3:22)
9Kaa j'an ɗi? Jĩ Juipg kɨmaj kɨ tɔi ndeg deg e? Ãã, i be al bat. M'elta dɔ Juipgt kɨ deg'n gerɨn Luwah al kete woi, m'an ĩn tu ĩn girr tɔg majalt. 10Kɨgo tat'n ndangɨn kam maktubt kɨkunjɗang: De kɨdenesew goto nõ Luwaht, kɨkɨɗa kaa ne goto. 11De kɨ ngégoosɨ goto, de kɨ ngesah Luwah goto. 12Ĩn tube ndomɨn, tube telɨn nya kɨ kara goto, de kɨ ngeɗamaj goto, kɨkɨɗa kaa goto. 13Kɔɔd i tit dɔɓad kɨ ɗa tag, elɨn ta kɨ to de pepe, ndon ne deg. Wong yir i girr kɨngakɨladt. 14Tad ɗoosɨ kɨ yo kɨ la deg, kɨ ta kɨkatbang. 15Ɓan nja ngɔd kad ũn ne mosɨ kɔ. 16Nuj kɔ kɨdangt i dɔ ɗob kawdt. 17Gerɨn ɗob lapia al, 18Ɓool Luwah goto kamdt. 19Na tajigla kɨ ger kad nya tube'n mberkɨnda el, ndɨ el deg'n ndɨn girr tɔg mberkɨndat, kɨtakad deg oon ne ta kɨ a elɨn al, na kɨ ta kɨ gang hɔ deg kɨ dɔningt tube nõ Luwaht. 20Kɨtɔ 'nten de kɨ Luwah a ɔrr ta dɔat kɨtakul kɨlag lo mberkɨnda goto. Kɨtɔ mberkɨnda ndɨ ndoo deg kad gerɨn majal koon.
Ɗob'n Luwah a ɔrrɨn ta dɔ det
21Na tajigla Luwah tel deg denesew nont kɨ ɗob kɨ kij, kɨkanj mberkɨnda. Mberkɨnda lo Moij, kɨ ngékelta kɨ ta Luwaht man naj dɔ ɗobt kɨ kij'n non kete woi. 22Kɨtakul ɗob'n non Luwah telɨn deg denesew nont kɨtakul kadkam'n adɨn Krist. Luwah ad ɗob'n non deg tube'n adɨn kamd Jeju, kɔrr de dene goto. 23Kɨtɔ deg tube ɗan majal ad kɔsɨgon lo Luwah nald. 24Na Luwah ɔrr ta dɔ degt kari kɨtakul kamkẽ lon kɨ lo badɔt'n Krist Jeju ba. 25Luwah laa kadkarit kad mosa ɔrr majal lo deg kɨtakul kadkam koia. Titbe la Luwah ɔjɨn ɗob lon kad telɨn deg denesew nont kɨta Luwah nyàgo majal kɨ ɗa lo deg kete, un kumɨn dɔt kaglo ndɨdɔt lon. 26Na kam kaglot kɨ tajigla Luwah ndɨ ɔj ɗob lon kad'n telɨn deg denesew nont. Kɨ ɗob'n non Luwah ɔj'jɨn kad nĩ denesew, na deg'n adɨn kamd Jeju, Luwah ndɨ teld denesew nont tɔ. 27Kɨtɔ 'nten, nya kɨ kad de gan buro i ɗa a? Nya mad goto bat. Kɨtakul mberkɨnda kɨ ɗa hã goto'n a? Kɨtakul kadkam la buro kɨga goto'n ye. 28Kɨtɔ kɨ gaa j'oo kad Luwah ndɨ ɔrr ta dɔ det kɨtakul kadkam, na kɨtakul kɨla ɗa kɨgo mberkɨndat al. 29Ad m'ndɨjesɨ m'oo: Luwah ye i Luwah lo Juipg koon, na i Luwah lo girrdeg kɨ dang dang ale? Ãã, i Luwah lo girrdeg kɨ dang dang ho. 30Kɨtɔ Luwah i kɨɗabe; ĩ la a ɔrr ta dɔ Juipgt kɨtakul kadkam, na a ɔrr ta dɔ girrdegt kɨ dang dang kɨtakul kadkam ho ye. 31Ad kɨtakul kadkam ye, ndɨ kɨ j'ɔrrɨn mberkɨnda lo Moij kɔɔ? Be al. Na kɨ ndɨ kɨ jad ndaa mberkɨnda to lo tont.
Currently Selected:
Romag 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
