Dakɔr deg 9
9
Ɗà nah Pakɨ
1Bɨraɓe elta kɨ Moij kam dɨlalot kɨ Sinai kam naht kɨdasa lo ɓal kɨkõjoo go teed dɔning Ejipt't kɨtɨga an: 2Ad Israelag ngomɨn go ɗa nah Pakɨ kaglot'n gang. 3Ndɔ kɨkõkɨlah gidaisɔɔ lo nah'n non dɔj losɔlt a i ngomɨn go ɗa nah Pakɨ kaglot'n gang, a ngomɨn kɨgo mberkɨndagt kɨ tag tube kɨ ɔjɨn dɔa. 4Titbe Moij el Israelag kad ngomɨn go ɗa nah Pakɨ, 5na ngomɨn go ɗa nah Pakɨ dɔ ndɔt kɨkõ kɨlah gidaisɔɔ lo nah kɨdasa dɔj losɔlt kam dɨlalot kɨ Sinai. Israelag ɗan kɨgo tagt tube'n Bɨraɓe el Moij. 6Deg madg'n nõ ĩgɨn telɨn kɨyerr kɨta ɔdɨn nin de mad ad asɨn ɗa nah Pakɨ ndɔt'n non al. Ndɔt'n non la awɨn ro Moijt kɨ Aarõ, 7elɨn anan: Jĩ kɨyerr kɨta j'ɔd nin de mad kɨtɔɗi ɔgjɨn dɔ ɗe kɨ kadkari loj kad Bɨraɓe kaglot'n gang a? 8Moij turd an: I ngon kad m'oo nya'n Bɨraɓe a ndasɨ mbera, 9na Bɨraɓe el Moij an: 10El Israelag an: Ĩla de mad kusɨt, ke ku ngakasɨt, tel kɨyerr kɨta ɔd nin de mad, ke de mad aw kam ɓe mbaht kɨsãi a ne, a ngomgo nah Pakɨ lo Bɨraɓe. 11Kam naht kɨkõjoo kɨ ndɔ kɨkɨlah gidaisɔɔ lo nah'n non ye a ngomɨn go ɗa nah Pakɨ dɔj losɔlt, a san bɨna kɨkanj berrkasɨ nat kɨ mbikamg kɨkat. 12A nyan ndan mbã kad loti dɔt al, a tetɨn kɨnga kɨkɨɗa al tɔ. A ngomɨn go ɗa nah Pakɨ kɨgo mberkɨnda. 13Ĩla de i kɨkar, aw mbah al, na mbet ngomgo nah Pakɨ a ne, de'n non a ɔrrɨna kɔ ku degt loa kɨta ɗe kɨ kadkari lon ad Bɨraɓe kaglot'n gang al. De'n non a to nyaba majal lon. 14Ĩla mbah mad hɔlondɨt dãsɨt, na ndig ngomgo ɗa nah Pakɨ lo Bɨraɓe a ne, a ngoma kɨgo mberkɨndagt kɨ tag tube kɨ ɔjɨn dɔ ɗa nah Pakɨ. Mberkɨnda i kɨɗabe kɨtɔsɨ tujoo, kɨta mbah, ke ngon ngeɓe.
Kilndii aw nõ Israelagt
15Ndɔt'n ɗan kujkub londɨ kɨ dõ oi ye kilndii ut dɔ lo hɔlondɨt ad i kujkub najkɨma, na lokɨsɔle kil ndɨ ɓa dɔ kujkub londɨt tit horr be mbã loti kɨsĩ.
16I titbe kɨndɔgndɔg, kilndii ut dɔa kada na kondɔ i tit horr be. 17Lon kilndii ɓai dɔ lo hɔlondɨt't ye, Israelag awɨn ho, na Israelag hɔn londɨ kam lot'n kilndii dubat. 18Israelag awɨn kɨgo mberkɨnda lo Bɨraɓe, hɔn londɨ kɨgo mberkɨnda lo Bɨraɓe tɔ, na lon kilndii ɗa dɔ kujkub londɨt a ne, Israelag ndɨn londɨdt. 19Lon kilndii ɗa dõ dɔ kujkub londɨt ndɔ ngãi, a ne, Israelag ngomɨn go mberkɨnda lo Bɨraɓe, na awɨn al. 20Lon kilndii ɗa dõ dɔ kujkub lo ndɨt ndo ngãi al a ne, hɔn londɨ kɨgo mberkɨnda lo Bɨraɓe na awɨn kɨgo mberkɨnda lo Bɨraɓe tɔ ho. 21Ndɔ madg lon kilndii ɗa dõ lokɨsɔle mbã loti kamla ɓai a ne, ĩn tɔ a awɨn ho Ĩla kilndii duba kada kɨɗa kɨ ndɔ kɨɗa kamla ɓai a ne, ĩn tɔ a awɨn ho. 22Ĩla kilndii duba dɔ kujkub londɨt ndɔ joo, ke nah kɨɗa, ke ɓal kɨɗa a ne, Israelag a hɔn londɨ na a awɨn al na lon kilndii ɓai ye ĩn tɔ awɨn ho. 23Hɔn londɨ kɨgo mberkɨnda lo Bɨraɓe, na awɨn kɨgo mberkɨnda lo Bɨraɓe. Telɨn rod go tat lo Bɨraɓe'n ndad mbera kɨtakul Moij.
Currently Selected:
Dakɔr deg 9: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
