Matie 23
23
Jeju el deg kad ndan mbedɨrod dɔ ngéndang maktubgt kɨ Parisɨg
(Oo Mrk 12:38-39; Luk 11:39-52; 20:45-46)
1Kamla Jeju elta bakad koosɨg, kɨ ngéndoog lon an: 2Ngéndang maktubg kɨ Parisɨg ndɨn kɨ tɔg ndoo deg mberkɨnda lo Moij. 3Sumba kad i ɗan, na i telɨn rosɨ go nyagt tube'n a elsɨn, na ot telɨn rosɨ go kɨlaɗadgt, kɨta ndɨ elɨn kɨtad, na ɗan al.
4Ndɨ dɔɔn nyag kɨ kɔi ndan dɔ degt, na ĩn kɨɓeg ɔdɨn kɨ ngon jid al. 5Kɨlaɗad tube, ndɨ ɗan kad deg oon kɨdɔdt. Ndɨ ton bargajg kɨlaa pikɨrpikɨr kɨ rodt, ɗan tabɔg kubg lod ad tat pilpil. 6Tarɨn hɔlondɨg kɨdasa lo mburr namgt, kɨ lo kɨdasa kam kuj kawnat lo Juipg, 7ndigɨn kad deg ɗand lapia kam sukɨgt, ndigɨn kad deg kunɨnd Ngéndoodeg. 8Na ĩn taa, ot kad deg kunsɨn Ngéndoodeg, kɨta ngendoosɨ i kɨɗabe, na ĩn tube ĩn ngankõna. 9Ot kunɨn de mad Bɔwsɨ dɔningt ne: Kɨtɔ Bɔwsɨ i kɨɗabe, i dõ dɔrãt. 10Ot kad kunsɨn ngékɔrrta ɗob deg kɨta Ngekɔrrsɨ ta ɗob i kɨɗabe doo, i Krist. 11De kɨbo tɔi kusɨt a i ngon-ngekɨla losɨ. 12Dekɨɗen a un dɔn kɨ dõ a ne, a lan dɔa kɨ ber, na dekɨɗen'n ndɨ sɔl dɔn a ne, a unɨn dɔa kɨ dõ.
13Ngéndang maktubg, kɨ Parisɨg ngéndokumdeg, ĩn deg kɨdangt, ĩgɨn i ndɨ utɨn ta ɗob kõɓe kɨ dɔrãt nõ degt, ĩn kɨɓeg kɨrosɨ i ndɨ udɨnt al, na deg'n ndigɨn kandt a ne, i nyand kad andɨnt al tɔ ho.
14Ngéndang maktubg, kɨ Parisɨg, ngéndookumdeg, ĩn deg kɨdangt. Kɨtɔ i ndɨ i mbutɨn kujg lo ngéngaw koig, na i ndɨ elɨn ta kɨ ngal kɨ Luwah, kɨ lo ndokumt. Kɨtɔ 'nten la gangɨn ne takɨngang tɔi dɔsɨt ye. 15Beto losɨ, ngéndang maktubg, kɨ Parisɨg ngéndokumdeg, ĩn deg kɨdangt. Kɨtɔ i ndɨ lan go bahbokat kɨ dɔning kad i telɨn de kɨɗa ngendoot losɨ, na lon tel ngendoo losɨ woi a ne, i telɨna ad i de kɨ asɨ kaw jahanama kɨtɔisɨ nja joo. 16Beto losɨ, mundog kɨ ngékɔrrta ɗob deg, ĩn deg kɨdangt. Ĩgɨn i ndɨ anan: Ĩla de mad nda yo kunɨn tɔ kuj ndub Luwaht a ne, i nya mad al, na ĩla de nda yo kɨta lɔr kɨ kam kuj ndub Luwaht a ne, yo loa i kunkɔ kɨ to dɔat. 17Ĩn kurdeg, ĩn mundog. Ɗi i kɨbo tɔi, lɔr a ke lo kɨjaɓat'n tel lɔr kɨjaɓat't a? 18I ndɨ elɨn tɔ anan: Ĩla de nda yo kɨ tɔ dɨngɨr kadkari a ne i nya al, na ĩla nda yo kɨ kadkari kɨ to dɔ dɨngɨrt a ne, yo kɨnda loa i kunkɔ kɨ to dɔat.
19Ĩn mundog. Ɗi i kɨbo tɔi, kadkari a ke dɨngɨr'n tel kadkari'n non kɨjaɓat't a? 20Titbe la de'n nda yo kɨ tɔ dɨngɨr a ne, nda yo kɨ tɔ dɨngɨr ho kɨ tɔ kadkari'n to dɔt ho. 21De'n nda yo kɨ tɔ lo kɨjaɓat a ne, nda yo kɨ tɔ lokɨjaɓat, na nda yo kɨ tɔ ngendɨ kamt ho 22de'n nda yo kɨ tɔ dɔrã a ne, nda yo kɨ tɔ pong kõɓe lo Luwah, na nda yo kɨ tɔ Ngendɨdɔt ho. 23Beto losɨ, ngéndang maktubg, kɨ Parisɨg ngéndokumdeg, ĩn deg kɨdangt, kɨta i ndɨ adɨn gaj kɨkɨɗa ku kɨ kɨlaht lo mbikam nana, kɨ anise, kɨ kumɨn, na i nyan go nyag kɨbo tɔi kam mberkɨndat lo Moij, ad i takɨgang kɨgoɗobat, kookumtondo, kɨ nyaɗakɨro kɨgo lo kadkam Luwaht. Sumba kad i telɨn rosɨ go nyagt 'nten kɨkanj nyàgo ĩgɨn non kɔ. 24Ĩn mundog ngékɔrrta ɗob deg, i ndɨ ɔrrɨn kur kam nyakãit, na i ndɨ urɨn lukum kɨtaagbe, i beto losɨ. 25Beto losɨ ĩn ngéndang maktubg, kɨ Parisɨg ngéndokumdeg, kɨta adɨn gid kop kɨ tasa ar, na kamd ɗoosɨ kɨ mbɨrã kɨ ɗagootal. 26Ĩn Parisɨg kɨ mundo. Dasabang i ɗan kam kop kɨ tasa adɨn ar, kamla kad i telɨn gid'd kɨ kart tɔ ye. 27Beto losɨ, ngéndang maktubg, kɨ Parisɨg ngéndokumdeg, ĩn deg kɨdangt, kɨta ĩn tit dɔɓadg kɨ ɗa kɨ hɔr ad nda: Ko tɨga majɨn koo ngãi, na ko keme ĩn kɨ ɗoosɨ kɨ kɨnga ngékoig kɨ nyag kɨyerr kɨ dang dang. 28Ĩn titbe ho: ko tɨga takum degt ɔjɨn rosɨ tit deg kɨdenesew, na ko keme i ɗoosɨn kɨ ndokumdeg kɨ majal kɨ ɗa.
Luwah a gangta dɔ ngéndokumdegt
(Oo Luk 11:47-51)
29Beto losɨ, ngéndang maktubg kɨ Parisɨg ngéndokumdeg, ĩn deg kɨdangt; kɨta i ndɨ i ɓan dɔɓad ngékelta kɨ ta Luwaht, i ndɨ i ɗan kujg kɨ nyẽr nyũku dɔɓad deg kɨdenesewt ho, 30na i ndɨ anan: Nĩ jĩ kaglot lo bɔwjg kɨ maɗi a ne, nĩ ja kɨ nda roj nat sed j'ũn mosɨ ngékelta kɨ ta Luwaht kɔ al.
31Titbe la ĩn kɨɓeg i ndɨ i man ne naj kɨ dɔ rosɨt: Ĩn ngan deg kɨ ngétɔl ngékelta kɨ ta Luwaht. 32Kɨtɔ 'nten a awɨn kɨ ketekete kam kɨlat kɨmajal'n bɔwsɨg ɗan kad i tɔlɨn kona. 33Ĩn lig, ngan kɔka, titbãi a kãin lon Luwah a gangɨn ta dɔsɨt kad awɨn jahanamat a? 34Kɨtɔ 'nten la mĩ m'ndɨ m'lan ngékelta kɨta Luwaht, ngéterrg kɨ ngéndang maktubg kɨ rosɨt ye. A i tɔlɨn kɨmadg, a i gand kagdosɨt, a i ndan kɨmadg kɨ ndeh kam kuj kawnat lo Juipg, na a i tuɓand ɓebot mad kɨ ɓebot mad. 35Kɨtɔkad mosɨ dekɨdenesewg tube'n ũ kɔ dɔningt, son dɔsɨt, mbagɨra dɔ mosɨ Abelt, dekɨdenesew mbã teen dɔ mosɨ Jakarit kɨ ngon Baraki, ĩn i tɔlɨna mbɨna lo kɨjaɓat't kɨ dɨngɨr kadkari kɨjakɔ tɔ. 36Rota, m'ndɨ m'elsɨ, nya'n non tube a tel so dɔ degt kɨ kaglot'n ɗan.
37Jerusalem, Jerusalem, ĩn i tɔl ngékelta kɨ ta Luwaht, na i tɨla ĩgɨn land kɨroit kɨ mbal, nja bãi hã m'ge kaw nganig kɨ nat tit'n kõkɨnja a kawɨn nganɨn kɨ girr bɔgɨnt ye be, na i ndigɨn al. 38Ta ye, a nyan kuj losɨ kɨ jisɨt ad tel gootɓe, 39kɨta m'ndɨ m'elsɨ, labekɨnõt a oomɨn gog al, mbã kad anan: Ngemajkurr la i ĩn ndɨ ɗe kam tɔ Bɨraɓet.
Currently Selected:
Matie 23: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
