Matie 20
20
Terrta dɔ ngéɗakɨla kam ndɔɔt
(Oo Mat 19:30; Paag 145:17; 1 Kor 4:7)
1Kõɓe kɨ dɔrãt dõ i tit ngeɓe mad'n tee kɨ sĩ ritit, kad n'ɔi deg kad aw ɗan kɨla kam ndɔɔ nduut lon. 2La kɔn nat kɨ ngéɗakɨlag dɔ sɨlet kɨɗa kɨta kɨla kɨ ndɔ kɨɗa na lad kam ndɔɔ nduut lon. 3Tee kɨ nõkadndah tɔ, na oo deg madg ɗan natlot kɨkanj ɗa nya mad, 4na eld an: Awɨn kam ndɔɔ nduut lom ho, na m'a m'adsɨ nya'n i kɨgoɗobat. 5Deg'n non awɨn kam ndɔɔ nduut loa. Ngeɓe'n non tee gog kɨ kàd kɨ ɗadenɓet kamla kɨ kàd kɨ norrjin, ɗa tit'n kete nõ. 6Tee gog ɓaitɔ dɔ ji losɔlt, ngah deg madg ɗan pãbe, la eld an: Kɨtɔɗi i ɗan ne labe mbã kàd ndɨ udsɨ kɨ ndang kanj kɨla a? 7Elɨna anan: Kɨtɔ de mad unj kɨlat al. Ngeɓe eld kad ĩn kaa awɨn ndɔɔ nduut lon ho.
8Lon lo sɔl woi ye, kɨɓe ngendɔɔ el ngɔrɔkɨla lon an: I kun ngéɗakɨlag, na i ba nar lod, i mbagɨra dɔ deg kɨ dɔboit, na i tɨga dɔ kɨ dasagt. 9Deg kɨ dɔjilosɔlt ɗen, na band nar lod, dekɨɗen kudt ngah sile kɨɗa. 10Deg kɨdasag ɗen, na oon anan n'a n'ngahn kɨ tɔi dɔ, na ĩng kaa band, dekɨɗen kudt ngah sile kɨɗa ho. 11Taan nar lod, na nyurɨn dɔ ngeɓet 12anan: Deg kɨ dɔboit'n non ɗan kɨla kaglo kɨɗabe ye la i bad asɨ sej, jĩn jɔr rɔkɨ kɨsĩ nu, dan kàdt kɨ tɨngabil mbã lokɨsɔle yo? 13Na ngeɓe tur kɨkɨɗa kudt an: Madɨm, m'ɗai majal al, i la kɔi nat sem dɔ nar silet kɨɗa ale? 14I taa nyabaji loi, na aw lo loi. M'ndig ba ngeɗakɨla kɨ ɗe gog kɨ nar kɨ asɨ kɨ loi. 15M'asɨ kad m'ɗa nya kɨ kamm ge kɨ nyamaj lom a le? A ke jang ɗai kɨta kĩm de kɨmaj a? 16I titbe, deg kɨ dɔboit a telɨn kɨ dasag, na deg kɨdasa a telɨn kɨdɔboit.
Jeju elta koin kɨ ɓain lo koit kɨkõmɨta
(Oo Mrk 10:32-34; Luk 18:31-34)
17Lon Jeju ndɨ aw kɨ Jerusalemt, ɔi ngéndoog lon kɨkɨlah gidaijoo kɨ ront, kɔt ko mad, na eld dɔ ɗobt an: 18Oon so, ndɨ kɨ j'aw kɨ Jerusalemt, na ɓet a lan Ngon de ji ngéjanyamosɨ kadkarit kɨ kɨbog, kɨ ngéndang maktubg; a gangɨn ta koi dɔat, 19na a lana ji degt kɨ gerɨn Luwah al, kad gona, ndana kɨ ndeh, gana kagdosɨt; na ndɔt kɨkõmɨta, a ɓai lo koit.
Jeju turta dɔ nyakɔt lo kõ Jak kɨ Jã
(Oo Mrk 10:35-45; Luk 22:24-27)
20Kamla kõ ngan Jebede ɗe ro Jejut kɨ nganɨn, na ɔsɨ dɔn ber nõat kɨ n'kɔa nya mad. 21Jeju ela an: I ge ɗi a?
Tur an: M'ndig kɨ ad nganɨmg kɨ joo'n ɗan ɗen ndɨn sei nat kam kõɓet loi, kɨkɨɗa dɔjɨkõit, na kɨmad dɔjigelit.
22Jeju tur an: I gerɨn nyan i ɗa i ndɨjemɨn nõ al. Asɨn kaai kop'n ɓet m'a m'ãi yo oo?
Elɨna anan: J'asɨ.
23Jeju eld an: Kop lom taa a ãin; na ndɨ dɔjɨkomt kɨ dɔjigelɨmt ta, i ta lom al, na i ta lo Bɔwm'n ɗago log woi kete, kɨta deg madg.
24Lon ngéndoog kɨkɨlah oon dɔ ta'n non ye, ɓan wong kɨ ngankõnag kɨ joo'n non. 25Na Jeju kund, eld an: I gerɨn ɓet, kad ngékõɓe dɔ girrdegt ndɨ lan dɔ deg girr tɔgdt, na kɨbog lod ndɨ ɗan ngar dɔdt kɨ lo ngetɔgt ho. 26Sumba kad i titbe kusɨt al. Ngankodang, ĩla de mad ge kɨ nĩ kɨbo kusɨt a ne, maj kad i ngeɗakɨlaɓer losɨ, 27na ĩla de mad ge kɨ nĩ de kɨdasa kusɨt a ne, maj kad i ɓer losɨ. 28I titbe la Ngon de ɗen kɨtakad deg ɗan ɓer adɨna al, na kɨta ɗa ɓer ad deg, kɨ n'ad ron nyabadɔt kɨta deg ngãibe.
Jeju tee kum mundog joo Jerikot
(Oo Mrk 10:46-52; Luk 18:35-43)
29Lon ndɨ teen kam ɓe Jerikot kɨ tɨga ye, bakad koosɨdeg ndulon goa. 30Na oon, mundog joo, ndɨn ber bɔg ɗobt, lon oon kah Jeju a tɔi ye, ɓa koon kɨ ndid kɨbobe anan: Bɨraɓe, Ngon Dabid, oo kumtondo loj.
31Bakad koosɨg ndángɨnd kad nyan tad. Na ɓakoon kɨ tɔg kɨ tɔi anan: Bɨraɓe, Ngon Dabid, oo kumj kɨ lo tondot.
32Jeju duba kund na eld an: I geen kɨ m'ɗa ɗi m'adsɨ a?
33Elɨna anan: Bɨraɓe kɨ ge kad kumj tee.
34Jeju oo kumtondo lod na ɔd kumd. Kɨtajigtbe mundog oon lo. Na ndulon go Jeju.
Currently Selected:
Matie 20: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
