Luk 6:27-49

Na ĩn, kɨ ngékoo dɔ ta lom, m'ndɨ m'elsɨ; i tarɨn madngétasɨg, i ɗan maj kɨ ngékɔsɨsɨ ta. I njangɨn dɔ ngéndɔlsɨ. Elɨn ta kɨ Luwah kɨta ngéɗa kumsɨ ndo. Ĩla de nda kɔti ko kɨɗa a ne, i tel ko mad ada ho. Ĩla de mad taai kubkul a ne, ot kɔga ngamaj loi. Ad nya dekɨɗen kɨ ngekɔi nya. Ĩla de taai nyamajg loi a ne, ot tel ndɨjea. Tit'n i ndigɨn kad deg ɗan ne sesɨ ye, i ɗan sed titbe ho. Ĩla i tarɨn ngétarsɨ koon a ne, kɨta ɗi i ndigɨn kad deg ɗasɨn mersi a? Ngéɗamajalg kaa ne, ndɨ tarɨn ngétardg ho. Ĩla i ndɨ i ɗan maj kɨ ngéɗasɨ maj a ne, ke ɗi i losɨ a? Ngéɗamajalg ndɨ ɗan titbe ho. Ĩla i ndɨ adɨn girra ĩgɨn i ndɨ ndan kamsɨ dɔdt kɨ i ngahn rodt a ne, mersi kɨ ɗi i losɨ a? Ngéɗamajalg ndɨ adɨn girra ngéɗamajalg kɨtakad ngahn titbe ho. Be al, maj kad i tarɨn madngétasɨg. I ɗand maj. Adɨn gira deg, na ot ndan kumsɨ got. Nyabajisɨ a i ngãibe, a ĩn ngan Ngetɔitɔi kɨrota, kɨta Ngetɔitɔi i ngeɗa maj kɨ deg ngeɗaa mersi al kɨ ngeɗaa majal tu. Kɨtɔ 'nten kɨ ĩn ngékookumtondo lo deg tit'n bɔwsɨ ĩn ngekookumtondo lo deg. Ot gangɨn ta dɔ degt. Kamla Luwah a gangta dɔsɨt al. Ot lan ta dɔ degt. Luwah a hɔsɨ kɨ ta al ho. I nyan go majal lo deg kɔ. Luwah a nyàgo majal losɨ kɔ ho. Adɨn kamla Luwah a adsɨ ho ye, kɨ ngotɔrrnya kɨbo kɨ kɨre nda ndek ndek mbã ũ kɔ; a adsɨn ne kɨ gusit. Kɨ ngotɔrrnya'n i ndɨ tɔrrɨn ne la Luwah a tɔrrɨn adsɨ ho ye. Jeju eld terrta 'nten tɔ: Mundo a asɨ kɔrrta ɗob mundo oo? Ĩla i be a ne, ĩn tujoo a son holɓet ale? Ngendoo nya ro det a tɔi de kɨ ngendoon nya al, na lon ndoo nya ad asɨnatap ye, a i tit ngendooa nyat be ho. Kɨtɔɗi i ndɨ nulɨn bul mũ kɨ kum ngonkõit, na kagdaw'n to kumit ye, oo al a? Titbãi asɨ kel ngonkõi kan ngonkom ad m'ɔrr yel'n hã i kumit, na i kɨɓe kɨ dɔi ye, oo kagdaw'n hã to kumit ye al a? Ĩ ngendokumdeg, ɔrr kagdaw'n hã to kumit nõ kete kamtã; kamla a oo lo ar nyang kad ɔrrɨn yel'n hã i kum ngonkõit ye. Kag kɨmaj kɨ tee kɨ kandɨn kɨmajal goto. Na kag kɨmajal kɨ a tee kɨ kandɨn kɨmaj goto ho. Deg gerɨn kag kɨɗen kɨta kanda. A jan kand mbaiɓood ro kongt al, a jan kand nduu dɔ ngargt al ho. De kɨmaj ndɨ tee kɨ nyamajg ko kam nyaɓɔt lon kɨmaj kɨ kamat; na de kɨmajal ndɨ tee kɨ nyag kɨmajal ko kam nya kɨɓɔt lon kɨmajal, kɨta ta de ndɨ elta nya'n hã to ngarkamat mbuj. Kɨtɔɗi i ndɨ kunmɨn ne Bɨraɓe, Bɨraɓe; na i ɗan nyag'n hã m'el ye al a? Dekɨɗen'n hã ndɨ ɗe romt, ndɨ oo dɔ tag lom, ndɨ ɗa got a ne, m'a m'dasɨ kɨ ĩn hã taan na sia. I tit de'n ɗa kuj, urr ɓe mbã ad wo, ndah girra dɔ mbangt, na lon man la ye õ nda kuj'n non, na asɨ yeea al, kɨta ɗana maj. Na de'n hã oo dɔ, na ɗagoot al a ne, taan na kɨ de'n hã ɗa kuj dɔningt kari kanj kurr ɓe; na lon man õ ndaa ye, tentenbe tee so tet kuj'n non i kɨbobe.