Pa nõ lo Jeremi 3
3
Kɔjta tel kɨro Bɨraɓet
1Mĩ de'n m'oo
kamkil kɨtakul
kagtɔsɨ wong lo Luwah.
2Ɔrrɨm, aw sem
kam tilt,
lo in kunj gotot.
3Rota, tur jin
kɨdɔmt kɨndɔgndɔg.
4Nuj dãrom
kɨ ndar rom,
tet kɨngam,
5ur be gug dɔm,
lam kam nyat
kɨ katbang kɨ kamkɔl
6ad m'ndɨ kam lot kɨdiw
til tit deg'n oin maɗi nu.
7Gug dɔm kɨ ndogbɔrr
kad m'tee al,
dɔm kɨ jinjir
kɨ oi ngãi.
8Lon m'ko,
m'kun ngeɗasem ye,
mbet ko dɔ ko lom.
9Ut ta ɗob lom
kɨ mbalg kɨtɔsɨ,
tuj ɗobg lom.
10Kɨromt Bɨraɓe i tit dã kɔr be
kɨ to ngoo kɨ'n hɔ nya,
tit tubo kɨ yaron kam duu ngart,
11ad m'tɔ dɔ ɗobt lom,
tɔrrɨm huthut,
nyam kɨ kɨɗambe.
12Nda jin do gant lon,
ndam kad urrɨm kɨ kɨrã lon.
13Ɔsɨ kamm mbut
kɨ kɨrã lon kɨ kam ɓolat.
14M'tel nyàgo
kɨro degt lom tube,
mĩ nya kɔsɨpa lod
kɨndɔgndɔg.
15Ad kamm ɗoosɨ
kɨ nya kɨkatbang,
ad m'ãi nya kɨkat kãrɨr.
16Tet ngangɨm
kɨ kɔsɨ mbal,
ũ bu horr dɔmt,
17Ɔrr lapia romt kɔ,
kamm oi dɔ ronelt.
18M'el m'an:
Tɔgɨm goto
ad m'nda kamm
dɔ Bɨraɓet al.
Kam kɨndahdɔt lo Jeremi
19I gah dɔ kamkɔlt lom
kɨdangt lom,
at bang tit kag
mband be,
i nya kɨ at kãrɨr
20Kamm ndɨ gah dɔt
kɨndɔgndɔg
ad kamm gang man.
21Oo, nya'n m'tel
m'ga dɔt,
nya'n adɨm
kam kɨndahdɔt laten:
22Kamkẽ lo Bɨraɓe
a goto al,
kõkam loa
a tɨga al tɔ.
23Ndɔ kɨɗen telɨn kɨkij,
nyaɗai kɨro i kɨbobe.
24M'el m'an:
Bɨraɓe i nyanduba lom
kɨta 'nten la m'ndan
kamm dɔat ye.
25Bɨraɓe ɔj kamkẽ de'n
nda kamɨn dɔat,
de'n ndɨ saha.
26Maj kad de ndɨ gon mbo,
ngo kaj lo Bɨraɓe.
27Maj kad jug
i kɔ det lon i basa ɓaitɔ.
28Ada ndɨ kɨ kɨɗan,
ndɨ gon mbo
lon jug i koat,
29ada la tan kam buningt,
maja kɨ kam kɨndahdɔt to nõ.
30Ada tel kotn
ad ngendaa
kad rosɔl ɗoosɨ kama.
31Kɨtɔ Bɨraɓe a mbet
de mbãkɨnõt al.
32Ke ada kamkil kaa
a oo kumtondo
loa kɨgo kamkẽt lon kɨngãi,
33kɨta nda ɔj deg
ke ad'd kamkil kɨ
go kamndigt lon al.
34Ba de dangaig
kɨdɔningt tube girr njat,
35ɔg de kad ngah nya
kɨgoɗobat nõ Ngetɔitɔit
36ɗa nya kɨgoot al
kɨ de lo gangtat:
Nyag kɨmita nõ
Bɨraɓe ndig al.
37Nõ elta nya
ad tɔl kona lon
Bɨraɓe nda mbera al a?
38I kɨgo tat kɨta
Ngetɔitɔit la nya kɨ
majal kɨ kɨmaj ɗen ale?
39Kɨtɔɗi de'n
ndɨ kɨ dɔn dõ a
nyur'n ta lon nda ɔja
kɨtɔ majal loa a?
40Ad kɨ j'oon go ɗob loj,
kɨ nderɨn gira to,
kad kɨ telɨn kɨro Bɨraɓet.
41Ad j'unɨn ngarkamj
kɨ jij kɨro Luwaht
kam dɔrãt dõ.
42Jĩ kɨ tɔin dɔ ta,
kɨ taan ɗɔɔ to na:
nyàgo majal loj al.
43I ɓir roi kɨ wong,
i tuɓa goj? I tɔl
kɨkanj kookumtondo.
44I ut roi kɨ kilndii
kɨtakad ko loj tee roit al.
45I telj tit yɨro
kɨ ɓirɓirt ku degt.
46Madngétajgt tube
teen gã tad kɨdɔjt
47nyangah loj
i holɓe kɨ ɓool,
tuj kɨ nuj kɔ.
48Man nõ nu kummt
tit bah be kɨ ta nujkɔ
lo ɓebo lo deg lom.
49Man nõ a ɗe kummt
kɨkanj nya ta, kɨkanj taa kɔ
50mbã Bɨraɓe
nɔl oo ko dɔrãt dõ.
51Nya'n kumm oo
adɨm kamkil kɨta
ngan kɨdẽg tube
kɨ ɓebot lom.
52Ĩgɨn ĩn madngétam
kɨkanj ta ye
tuɓamɨn tit yel be.
53Lamin kumkajir
kam holɓet na
tɨlan mbalg dɔmt.
54Man ut dɔm mbã
m'el m'an: Mĩ kɨkoi.
Kɔjta tel kɨro Bɨraɓet
55Kam holɓet
kɨwo kɨɓing
m'ko kɨ dɔ tɔit,
a Bɨraɓe lom.
56I Oo dɔ ndim kete,
ot kut mbii do
ton ɗusɨɗusɨt lom
kɨ ko lom.
57Ndɔ in m'ko kɨdɔit
i ndɔt nderbe kɨromt,
elɨm an: Ot ɓool.
58Bɨraɓe,
i ɗɔɔ kɨtatɔm,
i badɔm
59Bɨraɓe,
i oo majal'n ɗan sem.
Kɨtɔ 'nten i gangta lom.
60Oo ndangɨra lod
kɨ kɔjtaɗag lod
tube'n lan dɔmt.
61Bɨraɓe,
i oo dɔ ndi nyataj lod
kɨ kɔjtaɗag lod
tube'n lan dɔmt.
62Ta lo madngétam
kɨ tagahd'ĩn oo
ɔjɨn kɨ ndoormɨn ndɔ kɨɗen.
63Oo, lon ndin ber
ke ɓain dõ mĩ
nya kɔsɨpa lod.
64A Bɨraɓe,
a i bajid
kɨgo kɨlaɗadt.
65A i ad'd kam
kɨ kongkong,
ndɔl loi a i dɔdt.
66A i tuɓa god
kam wongt loi,
nujd kɔ girr dɔrãt Bɨraɓe.
Nyakɨto a ɗe dɔ
Jerusalemt kam
ndɔgt kɨdɔboit.
Currently Selected:
Pa nõ lo Jeremi 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
