Ejai Takɨdɔt
Takɨdɔt
Kɨ ta hebre, girr tɔ Ejai i: Bɨraɓe i kaj lom. I tɔ'n non i kɨndah dɔ maktub 'nten ye. Kam maktubt lo ngekelta kɨ ta Luwaht Ejai ndooj kad Luwah i Bɨraɓe lo Israel asɨ kad deg lon nya ndah kam dɔt kɨ ndɨ kɨ dɔd dõ.
Ĩla kɨ keg maktub lo Ejai lo mɨta ɔjɨn dɔ kaglog kɨ dangdang'n nyag ɗan nya tit.
Gaj maktub lo Ejai kɨdasa ɓai dɔ Eja 1:1—39:8, elta dɔ nyagt'n ɗan nya ɓalt 740 teen ɓalt kɨ 700 kete nõ Jeju Krist't. Kaglot'n non ngekelta kɨ ta Luwaht Ejai i Jerusalemt lamber kad ad deg kad Luwah ndɨ ɗa kɨla kɨta girrdeg lon kɨ kaglog tube. Ejai ndáng deg dɔ halt kɨ majal kɨ nyaɗa kɨgoot al, kɨ kɔsɨ dɔber nõ yogt. Lon nyakɨto ngahd a ne, a kon kɨ dɔ Luwaht, a gerɨn Luwah andahn kamd dɔ Luwaht ho.
Gaj maktub kɨdasa lo Ejai tag'n j'a kɨ ngah kamt laten:
Tag kɨ ɔj dɔ kõɓeg kɨ Judat kɨ Israel (Eja 1:1—12:6; 28:1—33:24).
Ɓai dɔ Eja 13:1—23:18 elta dɔ girrdegt kɨ dang dang.
Ɓai dɔ Eja 27:1—35:10 elta dɔ kɨlat'n ɓet Luwah a ɗa kɨta girrdeg ho nya'n ɓet ɔj madngéta Israel.
Ɓai dɔ Eja 36:1—39:8 elta dɔ ngekelta kɨta Luwaht Ejai kɨ ngar Ejekias, kaglot'n non deg kɨ Asirit ɗe ɗɔɔn ɓebo kɨ Jerusalemt.
Gaj maktubt lo Ejai kɨkõjoo ɓai dɔ ɗob ninat Eja 40:1—55:13 a kunɨna: maktub sɔlkam. Kɨtɔ tag kɨ kamt in tag kɨ ɓain kokɨro Luwaht kad sɔlɨn kam deg lon kad'd hɔtɔgba ho. Kaglo'n non i dang kɨ kaglo'n j'a kɨ ngah kam gaj maktubt kɨdasa. Deg kɨ Asirit õnɓe dɔ ngan Israelt al ta, na i deg kɨ Babilont la gan kootd ye, ad gaj deg madg kɨ Judat in ɓe ɓert.
Deg'n awɨn ɓert ye, oon anan Luwah nyad kɔ. Ngekelta kɨ ta Luwah eld ta 'nten: Luwah i Ngendah nyag tube i dɔ nyagt tube ndɨ ɗan nya kaglot kɨ maɗi kɨ kaglot kɨ tajigla. Na Luwah a ad deg lon tel ɗen gog kam dɔningt lod tit'n teen sed dɔning Ejipt't. Ngekelta kɨ ta Luwaht Ngekelta kɨ Luwaht Ejai el an Luwah lo Israel i Luwah kɨ jeje, i Luwah lo deg tube. Girrdeg kɨ dang dang ɔsɨn dɔd ber nõ yogt kɨ in nya mad al.
J'a kɨ ngah pa asɨ sɔɔ kamt elta dɔ det kɨ tadang de'n non a kunɨna ɓerkɨla lo Bɨraɓe (Eja 42:1-7; 49:1-6; 50:4-9 52:13—53:12). De'n non aw kɨ halg kɨ tit kɨ hal lo deg lo Luwah, i tit deg kɨ telrod gotat lo Luwah kɨ ngéɓool Luwah, kaglo mad i tit Sirus, ngar kɨ Perse.
Gaj maktub lo Ejai kɨkõmɨta ɓai dɔ Eja 55:1—66:24 ɔj dɔ kaglo'n deg kɨ Judat telɨn gog dɔningt lod ɓalt kɨ 537 teen 520 kete nõ kooj Jeju Krist't.
Tel deg kɨ Judat dɔningt lod gog i nya kɨ toro ngãi kɨta nyaɗa kɨgoot al tɔi dɔ, deg madg ɔsɨn dɔd ber nõ yogt, na kɔlnag kɨ ndoorna to ku degt lo Luwah. Kɨla lo Ejai i lamber hoita kɨmaj kad deg'n kamd tuj nya ndahkamdɔt lod goto kɨ ɓan kil kɨ Luwah.
Kam gaj maktubgt kɨmita lo maktub lo Ejai elta dɔ Bɨraɓet kɨ Ngekunjɗang lo Israel. Ad kanj gah dɔ tɔg Luwaht'n ɗan nyag tube, kɨ kɨlaɗa kam kaglot tube. Luwah taa girrdeg lon nyad dõ. Ĩn ɗa dɔrã kɨ dɔning, ĩla taa deg lon nyad dõ ye. Ndɨ ɗago dɔrã kɨ dɔning kɨ kij, in log'n ɓet deg a gerɨn Luwaht jeje kɨ Luwah kɨ ĩ kɨɗaɓedo.
Nyag'n maj kad kamj oi dɔt al
Kam gaj maktubt kɨkõjoo lo Ejai ɓal kɨ 800 kete nõ kooj Jeju Krist't i kaglo kɨ kam kɨsokɨber gotot kɨta kõɓe kɨ Israelt kɨ Juda. Kɨtɔ Asiri tɔg kõɓe loa i ngãi kɨta õɓe dɔ girrdegt tube. Ɓai dɔ ɓalt kɨ 734 kete nõ kooj Jeju Krist't, kõɓe kɨ Sirit kɨ kõɓet kɨ Israelt a kunɨna Epraim ndahn rod nat. Awɨn ɗɔɔn kɨ kõɓe kɨ kõɓe kɨ Judat. Ndig kad Juda ndah ron nat sed kad'n ɗɔɔn kɨ Asirig.
Ɓai dɔ ɓalt kɨ 722 teen 721 deg kɨ Asirit taan ɓebo kɨ Samarit'n i ɓebo kɨ Israelt, hɔn deg awɨn sed ɓert.
Ɓai dɔ ɓalt 701, deg kɨ Asirit ɗe ɗɔɔn ɓebo Jerusalem adɨn tel ngon ɓe lod kɨ girr tɔgt lod.
Goot i deg kɨ Babilont la ɗen gan koot deg kɨ Asirit ye.
Kɨ ɓal 587, deg kɨ Babilont ɗen taan ɓebo kɨ Jerusalem. Hɔn deg madg awɨn sed ɓert. Kam ɓalgt kɨ 550, kõɓe mad kɨ kij ɗe taa lo tɔ, ad i kõɓe lo Perseg.
Sirus i ngar lo Perseg kam ɓalt kɨ 539 nya ta ɗob ad deg'n awɨn ɓert ye kɨ telɨn ɗen gog dɔningt lod. Ad deg kɨ Judet tel awɨn dɔning Jat gog kad ɗan kuj ndub Luwah gog.
Currently Selected:
Ejai Takɨdɔt: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.