Ejai 58
58
1I ko kɨ ndii kɨbo, ot nya taa.
Un ndii kɨ dõ tit ko ndɨ brunj be.
Dɔ deg lom tɔidɔta lod,
ngékɨɓe lo Jakob majalg lod tɔ.
2Titbe ndɨ sahmɨn kɨndɔgndɔg,
ɗan ronel dɔ ger ɗobgt lom,
tit'n girrdeg kɨ ngéɗa nya kɨdenesew,
kɨ ngénya ta takɨgang lo Luwah lod al be.
Ndɨjemɨn tag kɨgang kɨdenesew,
neld kad ndɔt'n kɨro Luwaht tɔ.
3Kɨtɔɗi j'ɔg roj nyasa,
na ĩn Luwah oo al a?
Kɨtɔɗi kɨ ɗan roj ndo,
na i tur go al a?
Oon, ndɔ kɔgro nyasa losɨ.
I ndɨ i ɗan nya kɨ kamsɨ ndɨg,
i ndɨ ɗan ngetɔg dɔ ngeɗakɨlagt
4I ndɨ ɔgɨn rosɨ nyasa
kɨtakad i gakɨn na, kɨ i kɔlɨn na koon,
kɨtakad i ɓirin jisɨ
ɔsɨn ne deg kɔsɨ kɨmajal.
Ɗob kɔgrosɨ nyasa'n non
ɗa ad a oo dɔ ndisɨ ko dõ al.
5Kɔgro nyasa kɨ m'ndig,
i ndɔ kɨkad de ɗan rondot a?
La dɔ ber tit kadnya be,
to dɔ sakɨ kɨllagumt kɨ buhoor,
a i kunɨn nya'n non kɔgro nyasa
kɨ nel Bɨraɓe a?
6Oon kɔgro nyasa kɨ m'ndig laten:
i tut jinjir majalkɨɗa kɔ,
kɨla dɔ jug tube,
i nya deg kɨ ɗan ngetɔg dɔdt dõ,
i teet jugg tube,
7i luɓo nyasa deg kɨ ɓoo ɗad,
i ɗe kɨ de kɨdangtg kɨ lotod goto
kam kujt loi ale?
Lon i ngah de kɨ roa i kari,
i la kub roat ale?
Ot yaroi nõ noojt kɨjeje.
8Kamla kunji a tee tit kàd kɨ ɓa kɨsĩ be,
tentenbe a i ngah lapia,
denesew loi a aw nõit,
kɔsɨgon lo Bɨraɓe a i ngengom goi tɔ.
9Kamla lon a i kun nya a ne,
Bɨraɓe a tur. A i ko
na Bɨraɓe a el an: Mĩ ne.
Ĩla i tuj jug kɔ.
Kɨ ngon ji kɨ la kɨ dõ.
Kɨ tag kɨmajal,
10ĩla ta õ kami kɨta de kɨ ɓoo ɗaa,
ad kam de kɨ ngerokoi yelel ndan,
kamla kunj loi a unj kam tilt,
lo kɨ diw loi a i tit kàd kɨ ɗa de'n ɓet be.
11Bɨraɓe tɔ a ɔrri ta ɗob kɨndɔgbe,
a ad roi ndan kam horrt kɨ õ giling giling,
a ad kɨngãig ngangɨn,
a ĩn tit ndɔɔ kɨ nyom kɨ man be,
tit mankɨɓa kɨ mana a yii al.
12Ngakai kɨgoit a ɗan gootɓeg kɨ
tuj maɗi gog.
Girr kuj ɗa kasɨg kɨmaɗi a i ɗan dɔt.
A kunɨn ngekut lo kɨ tet kam ndogbɔrrt,
kɨ ngeɗago ɗobg kɨmaɗi
kad deg ndan ɓe kadt.
Ngom go ndɔ taakò
13Ĩla i nya ta kid ndɔ taakò,
na i ɗa nya kɨ kami ndɨg.
Ndɔ kɨjaɓat't lom al,
ĩla i kun ndɔ taakò ndɔ ronel,
ndɔ kɨjaɓat lo Bɨraɓe, ndɔ kɔsɨgon,
na i ɔsɨgon ndɔ'n non,
i nya ɗobg loi kɨ kɔsɨ dɔi,
i nya ta ɗa nya kɨ kami ndɨg,
kɨ tag kɨkari pãbe a ne,
14a i ngah ronel kam Bɨraɓet.
M'a mad aw kɨ pusɨɗɔɔ dɔ logt kɨ dõ kɨ dɔningt,
m'a m'oo goi kɨ nyakagɓe lo bɔwi Jakob,
kɨta ta Bɨraɓe la elta ye.
Currently Selected:
Ejai 58: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
