Ejai 49
49
Ɓer lo Bɨraɓe a i kunj lo girrdeg kɨ dang dang
1Doorg, oon dɔ ndim.
In girrdeg kɨsãisãi,
i nelɨn mbisɨ.
Bɨraɓe kunɨm lo koojɨmt nu,
ndah tɔm lon m'teen kam kõmt.
2Ad tam tel tit kiyaɗɔɔ kɨ at pepep,
ut dɔm kɨ ndil jin,
ad mĩ tit kɨrã kɨ at,
na yarom kam ɓɔl kɨrãgt lon.
3Elɨm an: Ĩ ɓer lom, Israel,
m'a m'ngaa tɔko kamit.
4M'el m'an: M'ɔrr kari kɨndang,
tɔgɨm goto kɨta nya kɨkari,
kɨ nya kɨpãbe.
Na ta lom i ro Bɨraɓet,
nyabajim tɔ i ro Luwaht lom.
5Tajigla Bɨraɓe ndɨ elta,
in bahm kam kõmt nu
kad mĩ ɓer loa,
kad tel kɨ Jakob kɨ ront,
kad kaw Israel kɨnat ront,
kɨta m'ngaa kɔsɨgon takum Bɨraɓet,
na Luwah lom i tɔgɨm.
6Elɨm an:
I nya kɨ tẽbe kad ĩ ɓer lom,
kad i ɓai kɨ girr Jakob gog,
kad i tel kɨ ndeg Israelag kɨ nãin?
M'a mad ĩ kunj kɨta girrdeg kɨ dang dang,
kad kaj lom tee aw mbã dɔngoi dɔningt.
7Titbe kel Bɨraɓe,
Ngebadɔ Israel, Ngekunjɗang loa,
ndɨ eli ta in deg kidɨn,
na girrdeg kɨ dang dang unɨn kumd kɔ dɔat,
kɨ ro ɓert lo ngétɔgg:
Ngarg a ooin,
na a ɓain dõ dɔ pong kõɓegt lod;
mbaiɓeg a ooin,
a ɔsɨn dɔd ber nõit,
kɨta Bɨraɓe asɨ ta kɔsɨgon,
Ngekunjɗang kɨ nge Israel la kɔti ye.
Bɨraɓe un kɔn an: M'a m'tel m'ɗa Jerusalem gog
8Titbe kel Bɨraɓe:
Kaglo kamkẽt m'oo dɔ kɔ loi,
na ndɔ kajt m'ɗa sei. M'ngomi,
mad ĩ kunkɔ lom kɨ m'un mad girrdeg 'nten,
kad ɗago dɔning Kana gog,
kad keg nyanduba kɨtuj,
9kad el ɓerg an: I teen
kɨ ngéndɨ kam tilt tɔ, ɔjɨn rosɨ,
kɨ go ɗobg a ngahn lo sanya lod,
na dɔ dɨngɨrlog kɨ nya ɓat kete al,
a i lo sanya lod.
10Ɓoo a ɗad al, kɨnda a õd al tɔ.
Lo kɨtɨngabil ke kàd kɨ kɔsɨ a ɔd'd al,
kɨta in i ngekõkam ye, ta õ kama kɨtad,
a ɔrr nõd aw sed ta mangt kɨɓa.
11M'a m'tel mbalbog lom tube ɗobgt,
m'a mad ɗan ɗobg kad ndian tit kari.
12Oon, deg'n non a ɓain ko sãi,
kɨmadg ɓain ko dɔɔ, kɨ lokudkàdt,
kɨmadg tɔ ɓain ko dɔning Sinimt.
13Dɔrã, ɔsɨ pa kɨ ronel.
Dɔning, i ɗa ronel kɨ kamnda.
In mbalbog, ɔsɨn pa kɨ ndisɨ kɨ dõ,
kɨta Bɨraɓe sɔl kam deg lon,
na ta õ kama kɨta de kɨdangtg lon.
14Siõ el an:
Bɨraɓe nyam kɔ,
kam Bɨraɓe lom oi dɔmt.
15Bɨraɓe tur an:
Kam dekɨdẽ a oi dɔ ngonɨnt
kɨ ndɨ il mba a?
Ta a õa kɨta ngon kamɨn ale?
Ke kama oi dɔ kaa,
Kamm mĩ a oi dɔit al bat.
16Oo, m'ndang tɔi dajimt.
M'gadɔ ndobɔrrt loi'n
ɗa nomt kɨndɔgbe.
17Ngéɗakujg a ɗan kɨla kanangbe
na deg ngételi gootɓet
a teen kam ɓet kɔ kɨ ngɔd.
18Un kumi oon lo gug dɔi.
Tube kawɨn na ɗen roit.
M'un kɔm kɨ yokɨnda kɨgo ndimt kɨ dɔm dõ,
kel Bɨraɓe,
nganig tube a i lad kub
tit nyaparero be,
a i lad roit
tit de ngaland dɔ ɓoo be.
19Log loi kɨ tujɨn maɗi, kɨ gootɓeg loi,
ad i dɔning loi kɨnuj,
tajigla asɨ ngéndɨt al.
Ngésa ɓe loi mak a in sãi sei.
20Ngani kɨ oo an goton ye,
a elɨn ta kɨ mbiit anan:
lon ɗan asɨj al,
adj lo kɨ asɨ kad kɨ ndɨt.
21Kamla a el kamit an:
nõ ooj ngang'n ɗan adɨm a?
Kɨta ngani goton, ĩ kuj;
awɨn sei ɓert, tuɓai kɔ
na ĩgɨn ɗan, nõ ngomd a?
Nyain kɨ kɨɗaibe,
na ĩgɨn ɗan in ko ɗah a?
22Titbe kel Bɨraɓe Luwah:
Oon, m'a m'la jim ro girrdegt,
m'a m'un drapo lom kɨ dõ
nõ girrdegt kɨ dang dang,
a ɗen kɨ ngani kɨdɨngã kad'dt,
a ton ngani kɨdẽ bɔgdt.
23Ngarg a in bɔwig kɨ ngékoogosɨ,
ngan ngarg kɨdẽ a in ngékad nyasa.
A ɔsɨn dɔd ber nõit,
a tõnɨn bu kɨ njait.
Na a i ger mĩ Bɨraɓe,
ĩgɨn ndan kamd dɔmt ye,
rod a sɔld al.
24Nya'n de kɨngang ɔi lo tetɗɔɔt ye,
a taan jiat e?
Ke a taan ɓerg ji det
kɨ ngeɗa nya kɨ lo ngetɔgt a?
25Ã titbe kel Bɨraɓe:
Ke ɓer lo de kɨngang kaa
a taan jiat kɔ,
na nyahɔ lo de kɨ ngeɗa nya kɨ lo
ngetɔgt kaa,
kɨta m'a m'ɗɔɔ kɨ ngéɗɔɔ sei,
mĩ m'a maj nganig.
26M'a mad ngédakumi ndo
san dãrod kɨdɔd,
na ãin mosɨd mbã ad ɗad tit
kasɨnduu be.
Kamla deg tube a gerɨn, mĩ
Bɨraɓe Ngekaj, Ngebadɔi,
Ngetɔg lo Jakob.
Currently Selected:
Ejai 49: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
