Ejai 48
48
Takel Bɨraɓe dɔ nyagt kɨkij
1Oon dɔ ta 'nten, in ngékɨɓe lo Jakob.
Ĩgɨn tɔ Israel i dɔsɨt,
ĩgɨn i teen ko girr Judat,
ĩgɨn i ndan yo kɨ tɔ Bɨraɓe,
i ko i kunɨn ne tɔ Luwah lo Israel,
kɨ kam rotat kɨdenesew al.
2Na in kɨdɔd ndan
tɔ ɓebo kɨjaɓat dɔdt,
ndɨnan rod ro Luwaht lo Israel'n
tɔa i Bɨraɓe Ngetɔg tube.
3Nyag'n ɗan nya woi ye,
m'elta lod maɗi, teen tamt tɔ.
M'el mad oon,
tentenbe m'ɗad, na nyag'n non ɗan nya.
4Kɨtɔ m'ger in ngedum,
ad kɔi i kɨla hand,
natnõi tɔ i ningkasɨ.
5M'eli ta nyag 'nten maɗi nu
kete lon ɗan nya al ɓaitɔ,
m'ɔji mad oo,
na ɓeta a el an: Yo loi la ɗad,
ke ɓakumta nya kɨ tɔsɨ loi
ke ɓakumta nya loi kɨ pel la
ndad mbera ye.
6Oo dɔ woi, oo nyag 'nten tube.
Naĩ, i ndɨg kelta al a?
Tajigla m'ɔji nyag kɨkij kɨyarɔ kɨ i ger al.
7M'nda nyag 'nten tajigla,
m'ndad maɗi al.
Kete nõ ndɔt kɨ ɓone,
oo ta lod al,
na ɓeta a el an:
oo m'gerd maj.
8Oo dɔ al, i ger al ho.
Maɗi nu mbii ɗa tag al.
Kɨtɔ m'ger a i ɗa kɨ lo ndokumt,
na kunɨn ngetaɗɔɔ lo koojit nu.
9Kɨtatɔm la m'nyan ta wong lom,
kɨta tɔko lom la
m'ndɨn dɔt sei kad m'nuji kɔ al ye.
10Oo. Mad i tel kɨkar,
na tit ɗob kar larjã al.
M'nai m'oo dan horr kamkɔlt.
11Kɨtatɔm mĩ kɨɓe,
kɨtatɔm mĩ kɨɓe la m'a m'ɗaa ye.
Kɨtɔɗi a yerrɨn ne kɨ tɔm a?
M'a mad tɔko lom luwah mad kɨɗang al.
Bɨraɓe a badɔ Israelag
12Oo dɔ ndim, Jakob, Israel kɨ m'kuni.
Mĩ, mĩ kɨdasa, mĩ kɨdɔboit.
13Jim nda girr dɔning,
na jikõm tee dɔrã ad tat.
Lon m'kund a ne,
a ɗàn nomt ta kɨɗabe.
14Ĩn tube i kawɨn na, oon dɔ.
Nõ kudt elta nyag 'nten a?
In Bɨraɓe tara la,
a tɔlkon ndig lon dɔ Babilont ye.
Jia tɔ a ɔi dɨrɨr dɔ Kaldeagt.
15Mĩ, mĩ m'elta woi, m'kuna tɔ ho;
m'ada ɗe, na maj a urra dɔ ɗobt loa.
16I ndɔt'n kɨromt, oon dɔ ta 'nten:
Lo mbagɨr keltat nu
m'elta gid tilt al,
kaglo mbagɨr nyag'n non mbã ɓone, Mĩ nõ.
Na tajigla, Bɨraɓe Luwah lam,
na la Ndilɨn tɔ.
17Titbe kel Bɨraɓe, mĩ Ngebadɔi, Ngekunjɗang,
Luwah kɨ kɨɗabe, mĩ Luwah lo Israel:
Mĩ Bɨraɓe mĩ Luwah loi,
m'ndɨ m'ndooi kɨtɔ maj loi,
m'ndɨ m'ɔrri ta ɗob kɨ sumba ndiat.
18Ĩla maɗi i nel mbii
oon dɔ mberkɨndagt lom a ne,
majkurrg lom urrɨn kɨ dɔit butbut
tit man kɨ kam baht be,
majkurr loi tɔ a i tit bahbo be,
19koih a bɨla tit ngar,
ngakai tɔ a in ngãi
tit ngar be.
M'a m'tɔl tɔi kɔ al,
tɔi a tuj nomt al tɔ.
20I teen Babilont,
ãin na kɔ ku Kaldeagt.
Kɨ elɨn ta 'nten,
i lan mber ta 'nten
kɨ ndi pa ronel,
ɔrrɨn hoia mbã kɨ dɔngoi dɔningt,
anan: Bɨraɓe badɔ ɓer lon Jakob.
21Lon ɔrrdɨn ta ɗob kam dɨlalot ye,
kɨnda õd al.
Ad man tee ko kam mbalt kɨtad,
ad mbal ria kad man ɓa tit.
22Bɨraɓe el an:
Lapia goto kɨta ngéɗamajalg.
Currently Selected:
Ejai 48: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
