Ejai 38
38
Mõi ɗa Ejekias
1Kaglot'n non mõi ɗa Ejekias ad to ta koit. Ngekelta kɨ ta Luwaht Ejai ngon Amots aw roat, ela an: Titbe kel Bɨraɓe, ɔj go nyag ngékɨɓe loi kɨta a oi, a i yoot al. 2Ejekias tel kumɨn kɨkad bɔrrt kɔ Bɨraɓe an: 3Ã ã, Bɨraɓe, m'kɔi kɨ i gah dɔmt kɨta rota m'ndia nõit kam nyaɗat kɨro kɨ kam kɨdenesew. M'ɗa nya kɨmaj takumit. Ejekias nõ wuk wuk.
4Ta, ta lo Bɨraɓe ɗe ro Ejait an: 5Aw el Ejekias, titbe kel Bɨraɓe Luwah lo bɔwi Dabid; m'oo dɔ kɔ loi, m'oo man nõ loi. Oo, m'a m'la ndɔi dɔ madt ɓal kɨlah gidaimi. 6M'a m'aji kɨ ɓebo'n ɗan tu ji ngar kɨ Asirit, m'a m'ngom dɔ ɓebo'n ɗan. 7'Nten a i nyakɔj kɨtɔi kokɨro Bɨraɓet, kɨta Bɨraɓe a tɔl ta ta'n el nõ kɨ nyakɔj 'nten: 8M'a mad ndil nyambɔj kàd lo Akaj'n kàd kɨ aw kɨkete ɔsɨ dɔt, tel kɨgog asɨ nda danja kɨlah. Titbe kàd tel kɨgog dɔ nyambɔj kàd asɨ nda danja kɨlah.
9Ejekias ngar kɨ Juda ndang pa 'nten lon yootɨn dɔ rotot lon: 10M'el m'an:
M'tee nusɨ ndɨ kɨ dɔ dõ lom,
m'ndɨ m'aw tabit lo kɨ Koot.
Ndeg ndɔmg kɨ nãin a goton.
11M'el m'an:
M'a m'oo Bɨraɓe dɔningt
kɨ deg ndɨnt kɨ dɔd dõ al.
M'a m'oo de kɨɗa ku
ngéndɨ dɔningt gog al tɔ.
12Unɨn kuj ndim ad i dãrom awɨn ne sãi,
romt i tit kujkub lo ngengom nyakulg be.
Ndɔ ndim kɨ dɔ dõ tɨga,
tit'n ngejo kub a ɓirin kub kɨ jo ye be.
A gangɨm kɔ tit'n a gangɨn ne kɨllakub,
kàda mbã ndɔ'n Bɨraɓe a adɨm m'goto.
13M'ɔd rom al mbã loti kɨ sĩ.
Bɨraɓe tet kɨngam tube tit'n tubo
a tetɨn kɨnga dã be,
kàda mbã ndɔ, a adɨm m'goto.
14M'ko tit yel kaikai be,
m'tõ ɗusɨɗusɨ tit derr be.
M'ur kumm kɨ dɔit, na ɗa nya mad al.
Bɨraɓe, mĩ kɨ rigɨgj, i ɗa sem.
15Ka m'an ɗi kad Bɨraɓe turɨm ta,
na ĩ kɨdɔn ɗa ho.
M'a m'ndia kɨ dɔ kɨsɔl ndeg ɓalɨmgt tube,
kɨta mĩ kɨ rokat kãrɨr.
16Bɨraɓe, kɨtakul nyag 'nten la
deg ndɨn ne kɨ dɔd dõ,
na nyag 'nten tube la
in kumkajir lo ndilɨm ye.
A adɨm lapia, a adɨm m'ndɨ kɨ dɔm dõ tɔ.
17Oon, daiyog lom telɨn kaj lom,
na kɨta tar kɨ i tarɨm ɔrrɨm holɓe nujkɔt.
I la majalg lom tube gidit,
18kɨta lo kɨ koo a ndubi al,
koi a ɔsɨgoni al tɔ.
Ĩgɨn ndɨ awɨn kɨ kam holɓet ye,
asɨ ndan kamd dɔ nyaɗait kɨro gog al.
19Ngekumkajɨr, Ngekumkajɨr la a ndubi tit'n kɨ m'ndubɨn ɓone.
Bɔw a ad nganɨn gerɨn nyaɗai kɨro.
20Bɨraɓe a ajɨm.
J'a j'ug kɨndehg loj ndɔ ndije kɨ dɔ dõ tube
kam kujt lo Bɨraɓe.
21Ejai el kad unɨn kand mbaiɓood
kɨ ɓa kɨnat, lan ta dòt lo ngar,
na ngar a yoot.
22Ejekias tɔ ndɨje kete an:
Nyakɔj kɨ ɗi oo ɔjɨn kad n'gerɨn
n'a n'aw kuju lo Bɨraɓe a?
Currently Selected:
Ejai 38: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
