Ejai 36
36
Ngéɗɔɔg lo ngar kɨ Asiri andɨn dɔning Judat
1Kam ɓalt kɨkɨlah gidaisɔɔ lo ngar Ejekias ye, Sankerib ngar kɨ Asiri aw ɗɔɔ ɓebog kɨngang kam dɔning Judat, na taad.
2Ngar kɨ Asiri la Rabsake ɓebo Lakist nat kɨ koosɨ ngéɗɔɔg ro ngar Ejekiast Jerusalem. Rabsake duba ta mankaart kɨ dõ, ɗob kaw lo tugo nyat. 3Eliakim ngon Hilkija, bɨradɔ kuj lo ngar, kɨ Sebna ngendang maktub, kɨ Joah ngon Asap, ngekoogo maktub kõɓe, tee ndɔdɨna. 4Rabsake eld an: Elɨn Ejekias, titbe kel ngar kɨbo, ngar kɨ Asiri: Nyandahkamdɔt loi i ɗi a? 5I ndɨ el an: De a ge goosɨ kɨ tɔg kɨta ɗɔɔ ale? Nõ i ndɨ i ɓakula kad i taamɨn ɗɔɔ a? 6Oo, i ndɨ i ɓakul Ejipt, i ndɨna roi dɔ kadnyat kɨ tɔ, a ɔsɨ ji dekɨɗen'n ndɨ ɓakula. Titbe i Paraõ ngar kɨ Ejipt'n deg tube ndɨ ɓan kula. 7Elɨm an: I ndɨ ɓan kul Bɨraɓe Luwah losɨ, na Ejekias ɔrr doorlog kɨ dɨngɨrg lo Luwah'n non, na el deg kɨ Juda kɨ ɓebo Jerusalem kad ɔsɨn dɔd ber nõ dɨngɨrt nẽbe koon ale? 8Tajigla un kɔi ad ngeem ngar kɨ Asiri. M'a m'adi sɨndag dub joo, ĩla ngékald in roit nõ. 9Titbe kaa ne, a asɨ tuɓa bɨradɔ kɨkɨɗa ku ɓergt kɨdu lo ngeem a? Na i nda kami dɔ pusɨɗɔɔgt lo Ejiptiag kɨ ngékald. 10Tajigla i kɨkanj ndig lo Bɨraɓe m'ɗɔɔ dɔning'n ɗan kad m'tuja a? Bɨraɓe la elɨm kad m'aw m'ɗɔɔn dɔning'n ɗan kad m'tuja a? I Bɨraɓe la elɨm kad m'aw m'ɗɔɔ dɔning'n ɗan, kad m'nuja kɔ ye.
11Eliakim kɨ Sebna kɨ Joah elɨn Rabsake anan: Kɨ kɔi, elta ɓerg loi kɨ ta Aramia kad j'oo, na ot kelj ta kɨ ta Juda, kɨ mbi degt ngéɗa dɔ ndogbɔrrt'n ɗan. 12Rabsake tur an: Ngeem lam kɨ ro ngeit kɨ ĩ kon kad m'elsɨ tag 'nten e? Na lam kɨ ro degt'n ɗan dɔ ndogbɔrrt kad san kĩd, kɨ ãin kedmand nat sesɨ tɔ ale? 13Na Rabsake duba ɗa, ko kɨ ndɨn kɨbobe kɨ ta Juda an: Oon dɔ ta lo ngar kɨbo, ngar kɨ Asiri. 14Titbe kel ngar: Ot kad Ejekias goolsɨ kɨta asɨ kajsɨ al. 15Ot kadɨn Ejekias dum dɔsɨ ad i ɓan kul Bɨraɓe, anan: Rota Bɨraɓe a aj'j, a la ɓebo'n ɗan ji ngar kɨ Asirit al. 16Ot kon dɔ ta lo Ejekias kɨta ngar kɨ Asiri el an: I sahn lapia romt, i teen kɨromt ne; dekɨɗen a sa kand nduu lon kɨ kand mbaiɓood lon, dekɨɗen kusɨt a ãi man kam bulot lon, 17mbã kad m'ɗe m'aw sesɨ dɔningt kɨ titna kɨ dɔning losɨ, dɔning nyako kɨ kasɨnduu, dɔning nyasa kɨ ndɔɔ nduu. 18Ot nyan kad Ejekias goolsɨ lon ndɨ elsɨ an: Bɨraɓe a ajsɨ. Ku yogt lo girrdeg kɨ dang dang ye, kɨkɨɗa aj dɔning lon ji ngar kɨ Asirit a? 19Yog lo ngéndɨ Hamat kɨ Arpad in ɗa a? Yog lo ngendɨ Separbaim ĩn ɗa a? Ajɨn Samari jimt a? 20Ku yogt kɨ dɔninggt'n non tube ye, kɨ ɗa aj dɔning lon jimt, kad Bɨraɓe ajɨn ɓebo Jerusalem jimt tɔ a?
21Na Judag ndɨn tad mbo, turɨna ta kɨɗa al, kɨta ngar ndamber an: Ot turɨna ta. 22Na Eliakim ngon Hilkija bɨradɔ kuj lo ngar, kɨ Sebna ngendang maktub, kɨ Joah ngon Asap ngekoogo maktub kõɓe, ɗen ro Ejekiast kɨ kubg lod kɨ til, elɨna tag lo Rabsake.
Currently Selected:
Ejai 36: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
