Ejai 28
28
Bɨraɓe ndáng Epraimag
1Beto lo Samari,
ɓebo lo ngékasɨɗag kɨ dɔning Epraimt.
Tit hutkam kɨ tut kɨ majkooa kɨ ndulo ngẽingẽi.
Dɔ hollot kɨ tee kɨ kand nya kɨ to mbuj,
Ĩgɨn in ngékasɨɗag.
2Oon, de mad kɨtag kɨngang lo Bɨraɓet,
tit ndii kɔsɨ kɨ ed,
tit nélbarwãi kɨ ngetujnya,
tit ndii kɨ ed ngãi kɨ tɔi dɔ
ad tɔsɨ nyag kɨber
ad nyag tube tetɨn kɨber.
3Ɓebo dɔngang lo ngékasɨɗa
kɨ dɔning Epraimt,
a i kɨ ɓa mbujmbuj kɨber
girr nja det'n non.
4Majkooa kɨ ndulo ngẽingẽi kɨ,
tut tit hutkam be,
dɔ hollot kɨ tee kɨ kand
nya kɨ to mbuj,
a i tit kand mbaiɓood kɨ mbuj
kete nõ ɓart kɨkud.
Lon de mad ooa a ne,
a jaa jint, a sa tentenbe.
5Ndɔt'n non Bɨraɓe Ngetɔg kɨ tɔitɔi
a i jɔg kɔsɨgon,
kɨ jɔg kɨmaj ngãi,
kɨta ndeg deg loa kɨ nãin.
6A i ndil kɨdenesew
kam det'n ndɨ gangta,
a i tɔg lo deg'n
tuɓan madngétad
mbã kɨ tabit ɓebot.
Ngékãikasɨg kidɨn ngekelta kɨta Luwaht
7Ngéndɨ Juda udɨn mut kɨta kasɨnduu,
na kasɨ kɨngang il kumd.
Ngejamosɨ kadkarig
kɨ ngékelta kɨ ta Luwaht,
kasɨ kɨngang ɗad ad tuson.
Kasɨnduu tel dɔd wãri,
ndian jegjeg kɨ log
kɨta nyakãi kɨ ngang.
Ndɔmɨn dɔ ɗob dɔ ndɔndilt,
son mut lo gangtat.
8Dɔ tabɨl tube ɗoosɨ kɨ tom,
kɨ nya kɨyerr,
lo mad kɨmaj goto.
9Na elɨn anan: Nõ a ge ndooa nyat a?
Nõ a ge kɔrr girr tag a?
I ngang'n mbetɨn mba a?
Ke i ngang'n nyan ta kil mba?
10El gog tɔ an: Mberkɨnda kɨdɔ mberkɨndat,
mberkɨnda kɨdɔ mberkɨndat.
I ndang kɨ njɔranjɔra,
i ndang kɨ njɔranjɔra,
tẽ nẽbe, tẽ nube.
11Ãã, i titbe,
i ta ɓe mad kɨɗang,
i ndõ ta kɨ mbah,
lo Bɨraɓe a elɨn ta girrdeg'n non ye.
12Na eld an:
Lon ten la i lotaakò,
adɨn de'n ɔr rɔkɨ taakò.
'Nten i ɗob kad de ngahn tɔg,
na ndigɨn koo dɔ al.
13Kɨtɔ 'nten ta lo Bɨraɓe kɨtad a i titbe kɨtad:
Mberkɨnda kɨdɔ mberkɨndat,
mberkɨnda kɨdɔ mberkɨndat.
I ndang kɨ njɔranjɔra,
i ndang kɨ njɔranjɔra,
tẽ nẽbe, tẽ nube;
kɨtakad lon a ndia a ne,
son kɨ gid'd, tujɨn rod,
kɨtakad band kɨ gum hɔd.
14Kɨtɔ 'nten oon dɔ ta lo Bɨraɓe,
in ngégo dɔ tat loa,
ĩgɨn õnɓe dɔ girrdegt'n ɗan kɨ Jerusalem.
15Kɨtɔ elɨn anan:
Kɨ nda taji nat kɨ koi,
jin kɨ la kɔji nat kɨ lo kɨ Koo.
Lon ndeh yokoosɨ tɔi a ne,
a tee rojt al,
kɨta jad takɨbal i loyaro loj,
ta kɨngom tɔ i loyaro loj.
16Kɨtɔ 'nten titbe kel Bɨraɓe Luwah:
Oon, m'ndɨ m'nda mbal mad
kad i girr ɓebo Siõ.
I mbal kɨ nan woi, kɨ dɔkumlot,
kɨ gata i ngãi, kɨ ɗà bijir.
De'n ɓakula a ne, a ãi al.
17M'a m'un nyaɗa kɨgoɗobat
mad i kɨla kɔj nya,
ɗa denesew tɔ a i nyakɔj nya.
Kɔsɨndii a nda loyaro
lo ngétakɨbalg ad ɔrr kɔ.
Man a ta lokãid.
18Kamla tasɨ kɨ nda nat kɨ koi a goto,
kɔsɨ kɨ la nat kɨ lo kɨ Koo a tokɨnõt al.
Lon ndeh yokoosɨ a tɔi a ne,
a ɓasɨ mbujmbuj kɨber.
19Ndɔ kɨɗen lon a tɔin a ne, a hɔsɨ,
kɨta a tɔi kɨsĩ, ndɔ ho, kàda ho.
Ger girr ta 'nten i nya kɨkootɓool.
20Kɨtɔ tɨraɓi i kɨgɔj,
asɨ kad de ndaj ront al,
bajo i kɨdu asɨ kut dɔ ro al.
21Kɨtɔ Bɨraɓe a ɓai
tit'n ɓai'n mbalbo Perasimt maɗi.
A ɓawong tit'n ɓan wong
kam hollot kɨ Gabaõ
kɨta ɗa kɨla lon
ad i kɨla lon kɨyaya,
kɨta ɗa kɨla lon
ad i kɨla lon kɨngankodang.
22Kɨtɔ 'nten tajigla ot kad i gon,
na ɓeta a ɔrrɨn go
kɨla dɔsɨ adɨn ngang,
kɨta m'oo ta tuj
dɔning 'nten kɨtaagbe,
kokɨro Bɨraɓe,
Luwaht Ngetɔg tube.
23I nelɨn mbisɨ oon ne dɔ ndim.
I gan mbisɨ oon ne dɔ takelɨm.
24De'n ndɔɔ kɨta duw nya a ne,
a ndɨ ta ndɔɔt kɨndɔg a? A ɔsɨ lo,
a tɨnda ning tɔɔ kɔsɨkɔsɨ kɨndɔg a?
25Titbe ale? Lon ndɔɔ lo ad asɨna woi ye,
a la kum botlo tit kɨ kum kɔr tit,
a dub gem kɨ
nyako lɔrj tɔ,
a hɔ tei gug dɔ bɔgat ale?
26Kɨtɔ Luwah loa la ndooa,
ɔja ɗa goɗobat.
27Kɨtɔ a ndan botlo kɨ pusɨ sɨnda nyako al,
a ndɔrɨn nja pusɨ dɔ dɨlalot al tɔ,
a ndan botlo kɨ kag,
na a ndan kɔr kɨ ngon kag.
28A son kum gem bĩt a?
à ã, a son bĩt mbã al.
Ke neni ndɔrɨn pusɨndɔɔ dɔt
nat kɨ sɨndag kaa, a gaj al.
29Ta 'nten tee kokɨro Bɨraɓet,
takɨkɔj loa i nya kɨya,
terr loa tɔ maj ngãi.
Currently Selected:
Ejai 28: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
