Ejai 26
26
Pa lo ngéɓakul Bɨraɓe
1Ndɔt'n non a ɔsɨn pa 'nten dɔning Judat:
Ɓebo loj i kɨngang.
Bɨraɓe adj kaj
ad i ndogbɔrr kɨngang, kɨ kuj ngomlo kɨdɔt.
2I teen tabitg kɨtakad girrdeg kɨrog
kɨ ngéɗadenesew andɨnt.
3Kɨgo tɔgimt ad ndɨ lom,
kɨta ndɨ ɓakuli.
4I ɓan kul Bɨraɓe mbãkɨnõt.
Bɨraɓe Luwah kɨ i mbal.
Kɨ ɗa loɗant mbãkɨnõt.
5Kɨtɔ tɔsɨ tɨla ngéndɨ logt kɨ dõ,
la dɔ ɓebo kɨ ndana dõ kɨber,
la dɔa ber mbã kɨ ningt,
mbã ɔd buning.
6I kɨ ɓa mbujmbuj kɨ njat,
kɨ nja ngéndog,
kɨ nja de kɨdangtg.
7Ɗob lo de kɨdenesew i ɗob kɨ dene.
Ĩ Bɨraɓe, i ɗago ɗob lo de kɨdenesew
ad asɨna jerɨr.
8Ɗob kɨ ĩ Bɨraɓe i la kɨgo gangtat loi,
kɨ nda kamj dɔit Bɨraɓe,
kam kɨ gah dɔ tɔit la
nyura ndɨ õj ye.
9Kamm geei ndɔ,
ndilɨm kɨ kammt ndɨ saih kɨ rotĩn,
kɨta lon takɨgangg loi i dɔningt,
ngéndɨ dɔningt ndoon ɗa denesew.
10Ke a ɔjɨn de kɨmajal kamkẽ kaa ne,
a ndoo ɗa denesew al.
A ɗagootal dɔningt
lo ngéɗa nya kɨgoɗobat,
a oo maj kɨtɔitɔi lo Bɨraɓe al.
11Bɨraɓe, jii i kɨ la kɨ dõ,
na deg oon al.
Ad oon tĩrokat loi kɨta deg loi,
na rod a sɔld.
Ad horr õ madngétaig.
12Bɨraɓe,
i ndɨ adj kam kɨsokɨber,
kɨta kɨlaɗaj tube,
ĩla i tɔl kõna adj ye.
13Bɨraɓe Luwah loj,
Bɨraɓe madg kɨɗang
õnɓe dɔjt maɗi,
na kɨtakuli la kɨ ndɨ kɨ kon
kɨdɔ tɔit tajigla ye.
14Ngékoig'n non,
a ndɨn kɨ dɔd dõ gog al.
Ĩn ndil ngékoig, a ɓain al.
Kɨta a aw kɨ ta tujd,
na ɔrr ga kamdɔdt lod kɔ tube.
15Bɨraɓe, ad girrdeg loi bɨlan,
ad girrdeg loi bɨlan.
Ɔj kɔsɨgon loi.
I tel kɨ ɗobning kɨ gog
kad dɔning lod tat.
16Bɨraɓe, deg sahn goi,
lon in ne dan kamkɔlt.
Kɔɔn kɨ rotĩd, lon i nda ɔjd.
17Tit'n dekɨdẽ Kokam
kɨ nãi nderbe
kad ooj ngon
ndɨ dain yon, kɨta tokooj,
titbe tɔ la jin nõit, Bɨraɓe.
18Jĩ kokemg, kɨ dai yoj.
Lon j'ooj, i nel kɨ la koon.
Kɨ ɗa kɨla mad
j'ajɨn dɔning loj al,
ngéndɨ dɔningt loj
oojɨn ngang al.
19Ngékoig loi
a tel ndɨn kɨ dɔd dõ gog.
I ndolɨn, i kon kɨ ronel.
Ĩgɨn i ndɨn kam buningt.
Kɨtɔ tal loi i tel kɨngekad kumkajir;
kɨtakula dɔning a tee
kɨ ngékoig kɨtɨga.
20Deg lom,
i ɗe andɨn kam kujgt losɨ.
Utɨn tabit dɔsɨt.
I yan rosɨ kaglot tẽ,
mbã kad wong lo Bɨraɓe
tɔi kamtã.
21Kɨtɔ oon,
Bɨraɓe ndɨ tee londɨnt,
a gangta dɔ ngéndɨ dɔningt
kɨta ɗagootal lod,
kamla dɔning a tee
kɨ mosɨ kɨ ũ dɔat,
a ut dɔ kɨtalg gog al.
Currently Selected:
Ejai 26: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
