Ejai 21
21
Takel Bɨraɓe dɔ sot lo Babilon
1Takel Bɨraɓe dɔ dɨlalot
kɨ kad bahbot laten:
Nujkɔ ndɨ ɗe ko dɨlalot
ko dɔningt kɨkootɓool,
tit nélbarwãi
kɨ ɓai ko lo kɨ Negebt.
2Teen dɔ nyakookamndilt mad
kɨngang kɨromt:
Ngeɗa nya kɨ lo ngetɔgt
a taa nya kɨ lo ngetɔgt,
ngetujnya ɗa kɨgo lo tuj nyat.
Elamg, awɨn.
Medeg, i ɗɔɔn ɓe.
M'a mad tõ ɗusɨɗusɨ tube lo deg
kɨ girr tɔgt lo Babilon a goto.
3Kɨtɔ 'nten kamm ɗoosɨ
kɨ kamkɔl
tokooj hurɨm ruk
tit'n tokooj hurɨn dekɨdẽ
kɨ ngekooj ngon ye be.
Daiyog ɔgmɨn koo dɔ,
kɨngasa ɔgɨm koo kɨ kum.
4Dɔm tel wãri,
ɓool kɨbobe hɔm.
Lokɨndɔ m'ngoa kerengẽ,
na tel nya kadɨm rondad.
5Ɗan go tabɨl,
ngengomlo ndɨn dɔgt,
san ho, ãin ho.
I ɓain dõ in mbaiɓeg,
i ɗan yib derdɔgt.
6Kɨtɔ Bɨraɓe elɨm titbe:
Aw, i nda ngengomlo
na a el nya'n a oo.
7I la oo pusɨɗɔɔ kɨ sɨndag joo
kɨ ngékald, kɨ ngékal korrog
kɨ ngékal lukumg,
Maj kad oo go ron,
oo go ron maj.
8Ngékoo lon non kɔ an:
Bɨraɓe, m'ɗa dɔ kujngomlot
kɨ kàd tube
M'ɗa lo ngom lot lom ndɔ tube.
9Nyan ndɨ ɗe laten:
De ndɨ dɔ pusɨɗɔɔt,
kɨ sɨndag joo. El ta an:
Babilon so, so oi,
nya kɨ tɔsɨ ɓakumta yog lod,
in kɨ tɔ kɔsɨkɔsɨ kɨ ningt.
10Ĩn Bɨraɓe ndai tit'n
de a ndahn nyako dɔ gart.
M'ndɨ m'elsɨ nya'n m'oo dɔ
ko ro Bɨraɓe Ngetɔg tube,
Luwah lo Israel m'eli taa.
Takel Bɨraɓe dɔ sot lo Edom
11Takel Bɨraɓe dɔ lot Dumah an:
De mad ndɨ ko dɔning Seirt, an:
Ngengomlo, ɗi ɗa nya ndɔ a?
Ngengomlo, ɗi ɗa nya ndɔ a?
12Ngengomlo tur an:
Lokɨsĩ ndɨ ɗe, na lokɨndɔ tɔ ho.
Ĩla i ndig ndɨjen ta a ne,
a i tel, i ɗen.
Takel Bɨraɓe dɔ sot lo ngéndɨ dɔning Arabit
13Takel Bɨraɓe dɔ ngendɨ Arabit laten:
A i hɔn londɨ kam kugt kɨ dɔning Arabi,
in ɓut ngékawg lo Dedaniag.
14Ɗen kɨ man adɨn de'n kɨnda õa.
I ɗen kɨ nyasa adɨn ngékãi ta ɗɔɔt.
Deg kɨ dɔning Temat
15Kɨtɔ ãin nõ kiyaɗɔɔt,
nõ kiyaɗɔɔt kɨ kɔr hawat,
nõ kɨrãt kɨ ndah dɔ gãt,
nõ ɗɔɔt kɨtɨngabil.
16Titbe Bɨraɓe elɨm an: Kam ɓalt kɨkɨɗa tit ɓal lo ngeɗakɨla nar, tɔko lo Kedar tube a goto. 17Na ndeg gõɗɔɔg kɨ ngékurr kɨrãg, ngan Kedar a in tẽbe. I Bɨraɓe Luwah lo Israel la el titbe ye.
Currently Selected:
Ejai 21: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
