Ejai 11
11
Kõɓe kɨdenesew lo ngon Jese
1Dɔgɨnd Jese a ɓa,
na dɔjia mad a ɓa ko ngɨrat.
2Ndil Bɨraɓe a ndɨ dɔat,
ndil goosɨ kɨ terr,
ndil kɔjta kɨ tɔg,
ndil ger nya kɨ ɓool Bɨraɓe.
3Ɓool Bɨraɓe a i kamat.
A gangta kɨgo kot kɨ kum al,
a elta kɨgo ko dɔt kɨ mbi al tɔ.
4A elta lon denesew kɨ ro,
kɨ ro ngendot
kɨ dɔningt.
A ndah dɔning
kɨ gɔlkɔp ta kɨ tant,
a tɔl ngéɗamajalg
kɨ ko kɨ tant.
5Denesew a i nyadɔɓoa,
nyaɗakɨro tɔ a i nyadɔ girra.
6Bisɨkolo kɨ ngon bat
a hɔn londɨ nat,
kag kɨ ngon bĩã
a ton kad nat,
ngon mang kɨ ngon tubo,
a san nya nãt,
na ngon kɨdu
a ɔrrd ta ɗob.
7Kõ mang kɨ urs a san nya lo kɨɗa,
ngandg a ton nat lo kɨɗa,
tubo ke mang a sa mũ,
8Ngon kɨ ta mbat
a ɗong ta holɓe yirt,
na ngon kɨ mbet mba
a la jin holɓe ngandamt.
9A ad de dó ke,
a tujɨn nya
dɔ mbalt lom kɨjaɓat al,
kɨta dɔning a ɗoosɨ
kɨ ger Bɨraɓe,
tit'n bahbokat
ɗoosɨn gongɨrt be.
10Ndɔt'n non
ngɨrra Jese a i tit
drapo kɨta girrdeg
kɨ dang dang.
Girrdeg kɨ dang dang
a sahna kɔsɨgon,
a i kam ndɔt loa.
Ndeg Israel a telɨn kɨ ɓe lod gog kɨ ronel tetɗɔɔ
11Ndɔt'n non Bɨraɓe a la jin kɨkõjoo,
kɨta kɔi ndeg deg lon,
ĩgɨn nãin dɔning Asiri
kɨ dɔning Ejipt,
kɨ dɔning Patros,
kɨ dɔning Kus,
kɨ dɔning Elam,
kɨ dɔning Sinear,
kɨ ɓebo Hamat,
kɨ doorg kɨ kam bahbot.
12A un drapo kɨ dõ
kɨta girrdeg kɨ dang dang,
a ɔi Israelag kɨ tuɓa kɨnat,
a kaw Judag kɨ tĩn na
dɔkum dɔningt kɨsɔɔ.
13Jang'n ɗa Epraimag
a goto,
ngédakum Judag ndo
a tujɨnd,
Epraimag a ɗaa jang
kɨ Judagt al ta,
na Judag a in madngéta
Epraimag al tɔ.
14A son gid
Pilistiagt ko lokudkàdt,
in tujoo a tirɨn deg
kɨ loɓakàdt pur.
A hɔn Edomag kɨ Moabiag,
Amoniag kaa ne,
a telɨn rod go tat lod.
15Bɨraɓe a ad lo tɔ bahbo
kɨ Ejipt't tut kurum,
na a la jin kɨdɔ bahbot,
a toan pu kɨ tɔg kò kɨ tant,
na ɗaa ad tɔ
ngan bah tanãimɨta,
na deg a gangɨn kɨ sanjadt.
16Ɗob kɨbo a tee
kɨta ndeg deg
kɨ nãin dɔning Asiri,
tit'n ngahn ne ɗob kɨta Israel
ndɔ'n teen ne dɔning Ejipt't nõ.
Currently Selected:
Ejai 11: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
