Aje 2
2
Bɨraɓe sɔl kam deg lon
1Bal ngar Darius kɨ ngekõjoo kɨ nah kɨkõtanãimɨta kɨ ndɔ kɨdɔjoo gidaikɨɗa lo nah'n non ye. Ta lo Bɨraɓe ɗe kɨtakul Aje, ngekelta kɨta Luwaht, an:
2I el Jorobabel ngon Salatiel, ngekõɓe kɨ Juda, kɨ Jojue ngon Josadak bɨradɔ ngejanyamosɨ kɨ ndeg deg, an:
3Nõ nãi kusɨt
ĩn oo kuj'n ɗan kɨ majkooa kɨkete a?
Na tajigla i oona titbãi a?
I tit nya kɨkari takumsɨt ale?
4Kɨtɔ 'nten la mĩ Bɨraɓe m'ndɨ m'eli m'an:
Ĩ Jorobabel i hɔ roi ngang tajigla
ĩ Jojue ngon Josadak bɨradɔ ngejanyamosɨ,
i hɔn rosɨ ngang ĩn girrdeg tube kɨ dɔningt,
I ɗan kɨla kɨta mĩ nat sesɨ
kel Bɨraɓe Ngekoosɨg,
5kɨgo kunkɔt'n hã m'un m'adsɨ
kaglot kɨ i teen Ejipt't kɨtɨga
Ndilɨm hɔlondɨ dãsɨt.
Kɨtɔ 'nten, ot ɓoolɨn.
6Kɨtɔ mĩ Bɨraɓe Ngekoosɨg la m'el man:
Nãi kaglo sĩ
kad m'a m'ye dɔrãg kɨ dɔning kɨ bahbo
kɨ ning kɨtut nja kɨɗa ɓaitɔ.
7M'a m'ye girrdeg tube
kɨtakad nyamajg lo girrdeg tube a ɗen
na m'a mad kuj'n ɗan ɗoosɨ kɨ majkoo,
I mĩ Bɨraɓe Ngekoosɨg laa m'un ndim titbe ye.
8Nar arjã i lom, nar ɔr i lom,
kel Bɨraɓe Ngekoosɨg.
9Majkoo kuj'n ɗan kɨdɔboit a tɔi kɨdasa,
kel Bɨraɓe Ngekoosɨg, na kam lot'n ɗan
m'a mad lapia i tit,
I mĩ Bɨraɓe Ngekoosɨg la m'elta titbe ye.
Nya kɨkar kɨ nya kɨyerr
10Ɓal kɨ ngekõjoo kam naht jikɨɗa ndɔ kɨ dɔjoo gidaisɔɔ'n ngar Darius õnɓe ye, Bɨraɓe kɨ Ngekoosɨg elta ngekelta kɨ ta Luwaht Aje gog an: 11Titbe kel Bɨraɓe Ngekoosɨg: I ndɨje ngejanyamosɨ ta 'nten do mberkɨndat; 12Ĩla de mad to dan kɨjaɓat ta kubt lon na kub loa ɔd bɨna, ke nyasa, ke man nduu, ke yib, ke nyasa kɨɗang, nya'n non a tel kɨjaɓat a? Ngejanyamosɨ turɨn anan: Ã ã. 13Kamla Aje el an: Ĩla de mad tel kɨyerr kɨta kod nin a ne na ɔd nya kɨɗa ku nyagt 'nten ye, nya 'nten a tel kɨyerr to a? Ngéjanyamosɨ turɨn anan: A tel kɨyerr. 14Kamla Aje tur an:
Titbe tɔ la deg'n ɗan kɨ girrdeg'n ɗan kɨnomt,
kel Bɨraɓe.
Titbe kɨlaɗa jid tube kɨ kadkarig kɨ lan admɨn nõ ĩn kɨyerr. 15Na tajigla m'kɔsɨ kad i gan kamsɨ maj dɔ nyat'n hã a ɗa nya nẽbe kɨnõt. Kete lon ndan mbal dɔ mbalt kam kujt kɨjaɓat lo Bɨraɓe al ɓaitɔ nya ɗi ɗa nya a? 16Lon awɨn lot'n ɓukɨn nya tit asɨ ngo tɔrr nya dɔjoo a ne, ngahn kamt kɨlahbe koon na lon awɨn ta gor man nduut kad ɔdɨn asɨ ngo tɔrr nya dɔmi a ne, ngahn kamt dɔjoo be koon. 17M'ndasɨ kɨ kand kɨlaɗasɨ tube, mad ndulo kɨ ba muro kɨ tuj kɨtakul kɔsɨndii, be kaa i telɨn kɨromt al, kel Bɨraɓe. 18I gan kamsɨ dɔt maj, ndot kɨdɔjoo gidaisɔɔ lo nah kɨkõjikɨɗa, ndɔ'n ndan ne girr kuj kɨjaɓat lo Bɨraɓe, i gan kamsɨ dɔt maj. 19Kumnya nãi kam damt nõ ale?
Ke nduu, ke kag mbaiɓood, ke kag grenadie,
ke kag olib, andɨn ale?
Nẽbe kɨnõt m'a mad maj urrsɨ.
Jorobabel, ɓer lo Bɨraɓe
20Ndɔ kɨdɔjoo gidaisɔɔ lo nah'n non ye, ta lo Bɨraɓe ɗe ro Ajet nja kɨ ngekõjoo, an: 21El Jorobabel, ngekõɓe kɨ Juda, an: M'a m'ye dɔrãg kɨ dɔning, 22m'a m'nuj pong kõɓeg tube, m'a m'nuj tɔg kõɓeg lo girrdeg tube, m'a m'tɔsɨ pusɨɗɔɔg kɨ ngekald tu, m'tɨla, sɨndag kɨ ngékald a tuson, dekɨɗen a so kɨta nyakat lo madɨn. 23Na kam ndɔt'n non,
m'a m'la kɨla kɨbo jiit Jorobabelt kad ɗa
kɨta ĩn Jorobabel ĩ ɓer lom,
m'a m'ndai tit kase kɔsɨdɔnya be kɨta m'kɔti,
'Nten la i takelɨm mĩ Bɨraɓe Ngekoosɨg ye.
Currently Selected:
Aje 2: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
