Ejekel Takɨdɔt
Takɨdɔt
Ngekelta kɨ ta Luwaht Ejekel i ngejanyamosɨ kadkari kam kuj ndub Luwaht kam ɓet kɨ Jerusalem. Ɓal 597 kete nõ kooj Jeju Krist't, Nebukadnesar, ngar kɨ Babilon, ɗe ɗɔɔ ɓebo Jerusalem, tetaɗɔɔ na ɔi gaj deg kɨ kamt aw sed ɓert Babilon. Ejekel i ku degt'n awɨn sed ɓert. Ɓal sɔɔ got, Luwah kun Ejekel kad tel ngekelta kɨ tant. Lon in ɓe ɓert la Ejekel lamber takɨgang lo Luwah ug el deg kɨ Judat'n in sia nat ɓe ɓert, kɨ ĩgɨn nãin gog Jerusalem kad kamd oi dɔ Luwaht al, na kɨ tɔrrɨn ndid dɔ majalgt'n ɗan. Elta dɔ takɨgangt lo Luwah'n a ɗe dɔ girrdegt kɨ dang dang kɨta majal'n ɗan kɨ deg lo Luwah.
Lon Ejekel i ɓe ɓert la oo kad deg kɨ Babilon taan ɓebo Jerusalem, na tujɨn kuj ndub Luwah kɨ ɓal kɨ 587 kete nõ kooj Jeju Krist't. Kɨkõjoo ndeg deg kɨ Juda a awɨn ɓert tɔ. Nõbe, girrdeg lo Luwah kɨ nyag tujɨn tube, dɔning lod tel dɔning lo mbahg, ngar kɨta kɔrr nõd goto, kuj kad ndubɨn Luwah tit goto tɔ. Ɓer'n awɨn Babilont asɨ ɓal kɨlah ye, in ngãi al, na tajigla taa ne, in kɨ girrd be la awɨn ɓert ye, Ejekel el ngan Israel an ndɔg a ɗen nõ, na in ndɔg kɨ majɨn ngãi kɨtɔd.
Maktub lo Ejekel elta dasa bang dɔ nyakookamdilt kɨ ya ɔjɨn dɔ kɔsɨgon lo Luwah (Ejk 1:1-28). Kɔsɨgon lo Luwah i kam kunjt kɨɗangeɗeng, ad i maj kooa kɨ nyag tube'n tee dɔ ad kɨ ger. Ndil nyag kɨ kam nyakɔkamndilt ndɨ ɔj'j tɔg kɨ nya ɗa kɨ kɨtag lo Luwah lon teen kɨ dɔn ad j'oo. Kam Ejk 8:1—11:25, Ejekel oo nyakookamndilt mad kɨ ɔj kunj kɨɗangeɗeng lo Luwah ad i Luwah kɨ dɔn la nya kam kuj nduba kɨ Jerusalem'n asɨ ta kɔsɨgon loa. Kam ɗob ninat kɨ 43, j'a kɨ ngah nyakookamndilt kɨ dɔboit'n ɔj kad Luwah tel ɗe Jerusalemt gog kam kuj ndubɨnt na ad kuj nduba ɗoosɨ kɨ kɔsɨgon kɨ kunj kɨɗangeɗeng. Luwah ad deg gerɨnɨn kɨtakul tag kɨgang lon, kɨ kunkɔg lon'n un kɨta maj'n Luwah a ad urrd. Ad deg tube, Israel kɨ girrdeg kɨ dang dang a gerɨn Luwah. Ta 'nten i kɨ kel ngãi, kɨ kanj nya ta kam maktubt lo Ejk 1:1—39:29. Kɨtɔkul ger kɨ gerɨn Luwah, girrdeg tube, dekɨɗen a da kɔr kɨlaɗan nõ Luwaht (Ejk 18:1-32; 33:1-33). I titbe deg asɨ mbelɨn pa ndiad, asɨ ngahn ngarkam kɨ kij ad i ndig ɗa kɨ kij. Luwah i nat kɨ girrdeg lon, kamɓe ɓert, nyad al (oo Ejk 11:16). Na a ada ndɨ kɨ dɔ dõ kɨ kij (Ejk 37:1-28). Titɨn Jeremi elɨn ye, Ejekel kaa el kad Luwah a ndah girr kunkɔ kɨ kij kɨ deg lon (oo Ejk 34:25; 37:26).
Nya'n j'a kɨ ngah kam maktubt lo Ejekel la ten: Ejk 1:1—24:27 elta dɔ tagt'n Luwah awɨn kɨ girrdeg go kawt kɨ deg ɗe ɓet dasa. Ejk 1:1—3:27 elta titbãi Luwah lan Ejekel kɨ ro degt kɨ Israel, na ndaa ngengomlo kad ug el deg kad ãin takɨgang lo Luwah kamla, Ejekel ad kamj gah dɔ kõɓet kɨ Israel kɨ Juda (Ejk 16:1-63; 20:1-44; 22:1—23:49). Ad kam deg ga dɔ nyat'n ndɨ ɗa nya kaglot'n ndɨ elɨn ta kɨ Luwah kam ɓebot kɨ Jerusalem kɨ kam kuj ndub Luwaht (Ejk 8:1-18; 22:1-31). Kɨgo mberkɨndat lo Luwaht. Ejekel ɗa nyatɔjg kad n'ɔjɨn nya'n ɓet a ɗanya (Ejk 4; 5; 12; 24). Luwah a gangta dɔ degt lon kɨta tɔidɔ ta'n tɔin.
Ejk 25:1—32:32 elta dɔ Luwaht'n kɨ a gangta dɔ girrdeg kɨ dang dang. Luwah gangta dɔdt kɨta majal'n ɗan kɨ Israel. Ejk 33:1—39:29 ɔj dɔ tag'n Luwah el dɔ tujt lo ɓebo kɨ Jerusalem kete nõ ɓal kɨ 587 nõ kooj Jeju Krist. Ĩn tag kɨ kad tɔg deg ho, ad'd ndah kamdɔt ho. Madngéta girrdeg lo Luwah, tɔgg kɨmajal tube tetɨna ɗɔɔ (Ejk 38; 39).
Ejk 40:1—48:35 ɔrrj girr nyag'n Luwah ad Ejekel oo kɨ goagoa kam kuj ndub Luwaht. I nya kookamndilt kɨta kaglo'n a ɗen kuj ndub Luwah, ad i lon Luwah ad kad i bagirr nooj kɨ hɔ kɨ Luwah. Nyag tube i kɨ mbɔj, nyag kɨ tube i kɨ ɗago kɨ ɗoba ɗoba, kɨlag lod i kɨ kɔrr girra maj. Man'n ndɨ ɓa kamt ad i man kumkajir kɨta deg (Ejk 47:1-12). Dekɨɗen aw kɨ lo lon gug dɔ kuj ndub Luwah (Ejk 47:13; 48-49) na Jerusalem i Bɨraɓe i nõ (Ejk 48:35). Maktub lo Ejekel el an: Luwah a tel ndah girrdeg lon kɨ kij gog, na a ad'd dɔning'n ad'd kete lon awɨn ne ɓert al ɓaitɔ.
Currently Selected:
Ejekel Takɨdɔt: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.