Ejekel 1
1
Ejekel oo kɔsɨgon lo Luwah kam ndilt
1Ɓal kɨdɔmɨta kɨ ndɔ kɨmi lo nah kɨkõsɔɔ lon mĩ ku ɓergt kad bah Kebar, dɔrãg teen ad m'oo nyag lo Luwah kam ndilt. 2Ndɔ kɨkõmi lo nah'n non ye, i ɓal kɨkõmi lo ngar Jojakin kam ɓert, 3ta lo Bɨraɓe ɗe ro Ejekel ngon Buji, ngejanyamosɨ, kam dɔningt lo Kaldeag kad bah Kebart. Nu la ji Bɨraɓe i dɔat.
4M'nɔl lo, na m'oo nélbarwãi kɨ la kɨ tɔgɨn ɓai ko jigel kɨ kilndii kɨbobe kɨ horr teet kamt giling giling na kunj kɨ ɗangereng gug dɔa. Na nya mad unj ngawdan horrt tit ningakasɨ kɨkusɨ be. 5Ngawdant nõ ngékumkajɨrg sɔɔ teent ĩgɨn takumd tit takum deg be.
6Ngekumkajɨr kɨɗen kudt aw kɨ takumɨn sɔɔ na kɨɗen kudt aw kɨ bɔgɨn sɔɔ. 7Njad ɗa kɨɗing na danjad tit danja ngon mang. Ndulo ngẽingẽi tit ningakasɨ kɨkusɨ be. 8Awɨn kɨ jid tit ji deg be girr bɔgdt ko kadt i sɔɔ, Ĩn tusɔɔ awɨn kɨ takumd kɨ bɔgd titbe, 9Ta bɔgd ɔdɨn na, lon ndɨ awɨn a turɨn rod al, kɨɗen kudt ndia kɨɗing sumba non, 10Takumd taa ne, tit takum de, ĩn tuso awɨn kɨ takumd tit takum tubo ko kõt, ĩn tusɔɔ awɨn kɨ takumd tit takum mang ko gelt na ĩn tusɔɔ awɨn kɨ takumd tit takum kuro. 11Titbe takumd, bɔgd ĩn kɨkɔi kɨ dõ, ngekumkajɨr kɨɗen kudt aw kɨ bɔg joo kɨ tad ɔdna kɨ bɔg joo kɨta kutɨn dɔ rod. 12Kɨɗen kudt ndia kɨɗing sumba nõ'n, awɨn kɨ lo kɨɗen'n ndil ɔsɨd kad awɨn tit, a mbel oon lo ko ɓodo lon ndɨ awɨn ne al. 13Ku ngékumkajɨrgt, nya mad kɨ tit yalhorr kɨ horrngelg kɨ awɨn ho, telɨn ho, mbɨna ngékumkajɨrgt. Horr õ giling giling na telndii tee kam horrt. 14Ngekumkajɨrg awɨn ho, telɨn ho tit telndii.
Ta lo gãg kɨsɔɔ
15M'nɔl ngékumkajɨrg'n ɗan na m'oo gã mad dɔ dɔningt kad ngékumkajɨrgt, kɨɗa kɨta kɨɗen kudt kɨsɔɔ. 16Kɨgo koot kɨ kum kɨ goosɨ ɗa gãg 'nten i tit ɗan kɨ mbal krisolit be, na in tusɔɔ tan na. In tit gã kɨɗa kam kɨ madt. 17Lon ndɨ awɨn ye, awɨn kɨ kɔtko sɔɔ kɨkanj tel rod. 18Ta gãg'n ɗan ngal ngãi na i nyakootɓool, Ta gãg kɨsɔɔ ɗoosɨn kɨ kumg gugɨndɔ gej. 19Lon ngékumkajɨrg ndɨ awɨn ye, gãg awɨn kad'dt na lon ngékumkajɨrg ɓain dõ dɔ dɔningt a ne, gãg ɓain ho. 20Awɨn lo kɨɗen'n ndil ɔsɨd kɨ awɨnt, na gãg ɓain nat sed kɨta ndil ngékumkajɨrg'n ɗan i kam gãgt. 21Lon awɨn a ne, gãg awɨn nat sed, lon duban a ne, ĩn tɔ duban. Lon ɓain dɔ dɔningt a ne, gãg ɓain nat sed kɨta ndil ngékumkajɨrg'n ɗan i kam gãgt.
22Dõ dɔ ngékumkajɨrgt'n ɗan dɔrã ndulo ngẽingẽi tit kristal be, i kɨ tee tat dɔdt dõ. 23Girr dɔrãt kaa nõ, bɔgd ɗan kɨɗing kɨro nat, ngekumkajɨr kɨɗen aw kɨ bɔgɨn joo utɨn dɔ ron, 24Lon ndɨ awɨn, m'oo doo kah bɔgd tit kah man koosɨg, ke ndɨ Ngetɔgtube, kɨsen tit kɨse lo koosɨ ngéɗɔɔg. Lon duban a ne, ndomɨn bɔgd. 25Ndita mad tee ko kam dɔrãt dɔdt dõ, na lon duban a ne, ndomɨn bɔgd.
26Dõ dɔ dɔrãt kɨdɔdt nya mad kɨtit pong na kooa tit sapir be. Dɔ ɓakumta pongt'n non nya mad kɨtit ɓakumta de ndɨt. 27Ko girrat mbã, kɨ dõ koa tit ningakasɨ kɨ ndulo ngãi ngãi tit horr be na ko girrat mbã kɨ ber m'oo nya tit horr be kɨ kunj kɨɗa ngereng gug dɔa. 28Kunjɨn gug dɔ ye, tit'n kɨdoosɨbɨra kam kilndiit ndɔ ked ndiit. 'Nten la i nya mad kɨ kooa tit kunj kɨɗangeɗeng lo Bɨraɓe. Lon m'oo nya 'nten ye m'so kɨ ta kumm kɨber, na m'oo ndita mad elɨm ta.
Currently Selected:
Ejekel 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
