Ejekel 47
47
Man ɓa kam kujt kɨjaɓat
1Kamla tel sem gog kɨ tabit kujt kɨjaɓat na oo, man ɓa girr ɗig tabit't ko loɓakàdt kɨta takum kuj'n non sumba loɓakàd. Man'n non tee girr kujt kɨjaɓat kada kokõt, nũn kad dɨngɨrt ko kõ. 2Tee sem tɨga kɨ ɗob kɨ tabit't kojigel na gug sem lot kɨtɨga mbã tabit't kɨtɨga kɨ sumba loɓakàd na oo man nũ kokõt.
3De'n non tee kɨ ɗob kɨloɓakàd na kɨla i jiat. Mbɔj metɨr dub kɨɗa na gang sem man, man ɗe hɔ popo njam. 4Tel mbɔj metɨr dub kɨɗa ɓaitɔ na gang sem man, man ɗe mbã ho gojɨm. Tel mbɔj metɨr dub kɨɗa ɓaitɔ na gang sem man, man ɓai hɔ ta ɓom. 5Tel mbɔj metɨr dub kɨɗa ɓaitɔ na man õ ngãi ad m'ɗa tɔg kud al, kɨta man ɓai ngãibe na sumba kad de al ta kal. I mankõn de a ud al.
6Elɨm an: Ngon de i oo a? Tel aw sem ta mant. 7Lon tel sem ye, oo ta mant'n nõkag ngãibe ɗan bɔg mant ko kɨnu kɨ ko ne. 8Elɨm an: Man 'nten a nũ kɨ dɔning kɨloɓakàdt. A ɗisɨ kam dɨlambot, a nũ kɨ kam bahbot, na lon and kam bahbot a ne, man kɨ bahbot a tel kɨjanjoi. 9Lo kɨɗen'n man 'nten a nũt nya kumkajir kɨɗen kɨ ɔd ron kam mant a ndɨt kɨdɔ dõ na kanj ngãi ngãibe a ɗant. Lo kɨɗen kɨ man 'nten a nũt a ne, mana a tel kɨjanjoi na nya kɨɗen a ndɨt kumkajir lokɨɗah'n man 'nten a nũt. 10Nawg a ɗan ta mant ko En-Gedi mbã kɨ En-Eglaim, a najɨn bandbɨrag. Kanj kɨɗen a ɗat tit kɨ kam bahbot be, a in tit ngãi ngãibe. 11Man bɔrrg loa kɨ man dangg loa a telɨn kɨjanjoi al, a nyand kɨta kat. 12Ta mant'n non ta bɔga ko kɨnu kɨ ko kɨne, kag kɨɗen kɨ tee kɨ kand a ɓant. Mbi kagg'n non a ndulon al, kand'd a goton al tɔ. Nah kɨɗen a teen kɨ kand'd kɨkij kɨtɔ mana ndɨ tee ko kam lot kɨjaɓat. Kand'd a i nyasa, mbid i kĩ.
Ɗobnin dɔning lo girr Israelag
13Titbe kel Bɨraɓe Luwah: Oo ɗob nin dɔning'n a kegɨn na nyanduba kusɨt, girr Israelag kɨkɨlah gidaijoo. Jojep a ngah gaj joo. 14Dekɨɗen kusɨt a ngah gaj lon asɨna kɨta m'un kɔm kɨ yokɨnda kɨ mad bɔwsɨg na dɔning'n ɗan a i nyanduba losɨ. 15Ɗobnin dɔning laten: Kɔtko jigel a i ko bahbot kɨ ɗob kɨ Hetlon mbã Sedad. 16Hamat, Berota kɨ Sibraim mbɨna ɗobnin kɨ Damasɨ kɨ ɗobnin kɨ Hamat mbã Haser Hatikon kɨdɔ ɗobnin Habrant. 17Titbe ɗobnin a mbagɨrɨn ta bahbot mbã Hasar-Enon, ta ɗobnin kɨ Damasɨ, Sapon kojigel kɨ ɗobnin kɨ Hamat. 'Nten i ɗobnin kɨ jigel, 18Kɔtko kɨloɓakàd a i bah Jurdẽ mbɨna Habrant, Damasɨ kɨ Galaad kɨ dɔning Israel. A i mbɔjɨn ko ɗobnint kɨjigel mbã bahbot kɨ loɓakàd. 'Nten a i ɗobnin kɨloɓakàdt. 19Kɔtko jikõt a mbagɨrɨn ko Tamar mbã kɨ mangt kɨ Meriba kɨ Kades, kad baht kɨ Ejipt mbã kɨ bahbot. 'Nten a i ɗobnin kojikõ. 20Kɔtko kɨlokudkàd ɗobnin a i bahbo, mbagɨrɨn ɗobnin jikõ mbã tee ɗobnin kɨ Hamat. 'Nten a i ɗobnin kɨlokudkàdt.
21A kegɨn na dɔning 'nten kusɨt kɨgo girr Israelagt. 22A kegɨn na nyanduba kusɨt kɨgo yukt kɨya, kɨtɔsɨ kɨ kɨta mbahg'n ndɨn kusɨt, na oojɨn ngang kusɨt. A oond tit ngan ngeɓe lo Israel, a kegɨn nyanduba sesɨ kɨgo yukt kɨya ku girr Israelagt. 23A adɨn mbah nyanduba loa ku girr Israelat'n ndɨ dandt, kel Bɨraɓe Luwah.
Currently Selected:
Ejekel 47: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
