Daniel Takɨdɔt
Takɨdɔt
Maktub lo Daniel i kɨndang kaglot kɨ ngang ngãi kɨta ngan Israelg. Kaglot'n non deg kɨ Israelt ngahn kõ ngãi kɨta kandɨn adɨn Luwah. Ad kɨmadg ngãibe ndahn kandt kad tɔrrɨn jid girr kadkam Luwaht lod. Maktub lo Daniel kam kaglot'n non ad tɔg deg'n ndahn kamd dɔ Luwaht ho in de kɨ ro, kad taan ɗɔɔ madngétadg.
Maktub lo Daniel i kɨ kãi dene joo: Gaj maktub lo Daniel kɨdasa (Dan 1:1—6:28) elta kɨ ɔj dɔ hoita lo Daniel kɨ namag kɨmita. Basa kɨsɔɔ'n non hɔnd go tat'n Nebukadnesar, ngar kɨ Babilont. Daniel la ɔrr girr niig lo ngar ye, (Dan 2:1—4:37), ngah log kɨbobo kad ɗan kɨlat kad ɗan kɨla adɨn ngar Nebukadnesar. Ngahn kõ ngãi, nyag'n teen dɔdt ye, ad kamd misɨmisɨ ho kadkam lod ngang (Dan 3:1—6:28). Juipg'n non hɔntɔgdba kamkõt.
Gaj maktub kɨkõjoo (Dan 7:1—12:13) elta dɔ nyakookamndilt'n Luwah tee dɔ ad Daniel. Nyakookamndilgt'n non elɨn ta dɔ nyagt'n ɓet a ɗan nya kaglot kɨ ɓet a ɗen, ɔj dɔ kõɓegt'n õnɓe dɔningt ko loɓakàdt. Elta dɔ kõɓet lo ngar mad'n õɓe ndoorɨn Bɨraɓe. Ɔg kad deg ɔsɨn dɔd ber nõ Luwaht kɨ jeje. I nya'n ɗa nya kaglot lo Ãtiokus Epipan (Dan 8:9-14; 23-25; 11:21-45), in i ngar ad õɓe ɓalt kɨ 175 teen 164 kete nõ kooj Jeju Krist. Nõbe, j'oo kad deg kɨ ngékõɓeg dan kumd ndo. Ta kɨ ndɨje i ɗɨngãt kõg'n non a duban ne a? Maktub lo Daniel el an: Luwah a gangta dɔ ndɔ mad dɔ kõɓegt, na got a ndah girr kõɓet kɨ tokɨnõt (Dan 7:9-14).
Maktub lo Daniel adj kɨ ger nyag kɨ to kɨ lo mundt kɨta koosɨ de kɨ nõ asɨ ger al. Kad deg gerɨn nyag'n ɓet a ɗa nyag jeje. Daniel a elta tit de kɨ ngenda horr al, i de'n Luwah kuna kad elta kɨ tant. I maktub kɨ ndɨ ad deg hɔn kadkam lod sem ho kɨ ndahn kamd dɔ Luwah ho. Kaglo kɨ dɔboit ad i kaglo'n Luwah a ɗe girr kõɓe ye, i kaglo'n Luwah koon la ger ye. Na kaglo Juipg ngan kõ ye, i kaglo kɨ tẽbe a tokɨnõnt al. A un kaglo kɨ asɨ ɓal mɨta kɨ nusɨ (Dan 7:25; 8:14). Kɨtɔ ɓal kɨmita kɨ nusɨ i gaj kam kɨ kam ɓalt kɨ tanãimɨtat ad asɨnatap al. Ngékamd Luwah maj kad gerɨn kad kõg a teen dɔdt ye, ndɔ mad a duba tan. Na dɔboia a i ronel kɨbo kɨtad.
Currently Selected:
Daniel Takɨdɔt: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.