Daniel 1
1
Daniel kɨ namɨng ndoon nyager lo Babiloniag
1Kam ɓalt kɨkõmɨta, kaglo kõɓe lo Jehojakɨm ngar kɨ Juda, Nebukadnesar ngar kɨ Babilon aw kɨ ngéɗɔɔg lon, gugɨn dɔ ɓebo kɨ Jerusalem. 2Bɨraɓe la Jehojakɨm ngar kɨ Juda jiat, nat kɨ gaj nya ɗa kɨla kɨ kam kuj ndub Luwaht. Nebukadnesar ɔi deg kɨ Judat aw sed ɓert kam dɔning Sinẽart, na nya ɗa kɨlag lo Luwaht'n ɔi ye, aw ndad kam kuj ngom nyamajgt lo luwah lon.
3Nebukadnesar nda mber Aspenaj, kɨbo lo kùj dekɨdɨngãg kad kɔt ngan kɨbasag, ad i ngan ngarg kɨ ngan ngéɓeg ku Israelagt'n hɔnd ɓert awɨn sed Babilont ye kɨ ɗen sed, 4basag'n non kɨ ĩn kɨkanj nya mad kɨ majal rodt, kɨ koo majd to kɨ tɨga wakɨsɨ, kɨ in ngégoosɨ kɨ ɗoosɨ kɨ terr tube, kɨ in ngégernya, kɨ ngégoosɨ ger girrnya kɨgo lo terrt, kad in deg kɨ asɨn ɗa kɨlaɓer kam kuj kõɓet lo ngar. Na kɨ in deg'n ndoond da maktubg kɨ ta ɓe lo Kaldeag maj. 5Ngar ndang mber maktubt kad adɨnd ndeg nyasa kam nyasat kɨmajmaj lon kɨ kasɨnduu'n ngar a ãi nõ kɨndɔgndɔg. A ndoond nya ɓal mɨta, na go ɓalt kɨmita'n non a andɨn kam kɨlaɓert lo ngar.
6Na ku ngan kɨ basagt'n kɔtɨnd ye, ngan kɨ Judag ĩn kudt nõ, ad i Daniel kɨ Hanania kɨ Misael kɨ Ajaria. 7Kɨbo lo kùj dekɨdɨngãg ndah tɔd kɨɗang. Ad kun Daniel Beltasar; kun Hanania Sadrak; kun Misael Mesak, na kun Ajaria Abed Nego.
8Daniel nda kamɨnt kad kɨ'n yerr kɨ ron kɨta nyasa kɨmajmaj lo ngar al, ke kɨta kasɨnduu kɨ ngar a ãi al. Na kɔ kɨbo lo kùj dekɨdɨngãg kad hɔd kɨ lo ngetɔgt kad n'telɨn kɨyerrt kam sanyat nõn al.
9Luwah ɗa ad Daniel ngah maj kɨ kõkam takum kɨbot lo kùj dekɨdɨngãg. 10Na kɨbo lo kùj dekɨdɨngãg el Daniel an: M'ɓool kɨta ngar kɨ ngeem la nda mber kad i san ho ãin nya 'nten ye, na m'ɓool kad takumsɨ tel kɨmajal tɔi lo basag ĩn ɓalsɨ asɨna sed. Ĩla i titbe a ne, kɨta ta losɨ ngar a ad jan kɔm, kɨta m'tɔi dɔ ndia.
11Na Daniel el kɨbo lo kùj dekɨdɨngãg kɨ ngekoogod sed Hanania kɨ Misael kɨ Ajaria, an: 12M'kɔi kɨ i ná ɓerg loi kam ndɔt kɨlah oo. Adj mbikam tãg ad i nyasaj, kɨ man kɨta kãi koon. 13Goot a ne, a i nɔl takumj kɨ takum ndeg basa namjg'n a san nyasa kɨmajmaj lo ngar. Taa ne, ɓet a i ɗa nya kɨ ɓerg loi kɨgo nyat'n i nɔl oo. 14Kɨbo lo kùj dekɨdɨngãg ndig ta lod dɔ nyat'n ndɨjena, nád ndɔ kɨlah oo. 15Go ndɔt kɨkɨlah ye, oo takumd i kɨmaj, rod tɔ to mbulmbul tɔi ndeg basag tube kɨ ngésa nyasa kɨmajmaj lo ngar. 16Kɨtɔ 'nten la de kɨ ngekoogod ad'd nyasa kɨmajmaj kɨ kasɨnduu lo ngar al ta, na ad'd mbikamg koon.
17Luwah ad basag kɨsɔɔ'n non nyager, kɨ goosɨ, kɨ terr kam da maktubgt tube, na Daniel aw kɨ goosɨ ger girr nyakookamndilt kɨ niig tube.
18Go kaglot'n ngar ɔj ye, ɗen sed nõat. Kɨbo lo kùj dekɨdɨngãg aw sed nõ Nebukadnesart. 19Ngar elta sed, na ngah de mad kudt tube kɨ tit kɨ Daniel kɨ Hanania kɨ Misael kɨ Ajaria al, tɔin ndeg namdg kɨ nyager tube. Kɨtɔ 'nten la andɨn ne kam kɨlaɓert lo ngar. 20Lon ngar ndɨjed tag ye, kam tagt tube ɔjɨn dɔ nyat kɨɗen kɨ ndet kad terr, ke goosɨ ger girrnya a ne, ngar ngahd kad gerɨn tɔi mboolig kɨ ngéndɔndilg tube kɨ ĩn kam kõɓet lon nja kɨlah.
21Daniel ndɨ kam kɨlat lo ngar Nebukadnesar mbã ɓal kɨdasa lon ngar Sirus õnɓe.
Currently Selected:
Daniel 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
