Daniel 4
4
Nebukadnesar tel tit dã kɨta dɔa kɨngang
1Mĩ Nebukadnesar m'ndɨ lom kam kujt lom, maj urrɨm kam kuj kõɓet lom tɔ. 2M'nii kɨ ndam ɓoolt. Lon m'to dɔ tɨraɓimt ye, tagahmg kɨ nyag kɨ m'oo kam ndilɨmt ad kamm gang man. 3Kɨtɔ 'nten m'nda mber kad ɗen kɨ ngéterrg tube kɨ Babilon nomt kɨtakad admɨn m'ger girr nii'n non. 4Taa ne, mboolig kɨ ngéndɔndilg kɨ Kaldeag kɨ ngéyog ngéndɔndil dɔ kɨmẽgt ɗen. M'eld man kɨ admɨn m'ger girr nii'n non.
5Gog godt Daniel kɨ a kunɨna Beltasar kɨgo tɔ luwaht lom in ndil Luwah kɨkunjɗang i kamat ye, ɗe nomt, na m'ela nii'n non, m'an:
6Ĩn Beltasar, bɨradɔ mboolig, tit kan hã m'ger kad ndil Luwahg kɨkunjɗang i kamit, na ta kɨmund kɨ a dumi goto, m'kɔi kɨ i adɨm m'ger girr nyakokam ndilt kɨ m'oo kam niit nõ.
7Nyag kɨ m'oo kam ndilɨmt lon m'to dɔ tɨra bimt laten: M'oo kag mad ngawdan dɔningt, i kag kɨ ngal ngãi.
8Kag'n non ɓa tɔg ngãibe,
tasoma ɔd dɔrã,
na deg oona ko dɔboi
dɔningt kɨtaagbe.
9Mbia maj ngãi,
kanda to mbuj,
nyasa i kamt
kɨta nyandahg tube.
Dãg kɨmut ton ndilat,
yelg kɨ dõ ndin dɔjiagt,
na nyakumkajɨr kɨɗen
ngah nyasan roat.
10M'oo nyag kam ndilɨmt lon m'to dɔ tɨraɓit lom, na m'oo ngenɔl lo mad kɨkunjɗang ɗisɨ ko dɔrãt dõ.
11Ko kɨ ndin kɨbobe,
na elta titbe;
i gan kag'n non kɔ,
i gangɨn dɔjiag.
I yekɨn mbia,
i tɨndan kanda tĩn kɔ.
Kɨ dãg ãin na kɔ girat,
kɨ yelg ɓaindɔjiagt kɔ.
12Na i nyan ginda
dɔ ngɨraagt kɨ ningt,
i dɔɔn kɨ jinjir hand
kɨ ningakasɨ
kam mugt kɨ dɔningt.
Kɨ tal kɨ dɔrãt hɔ dɔat,
kɨ i ngesa mũ
nat kɨ dãg kɨmut.
13Kɨ hala kɨgo lo det mbel,
na kɨ adɨna hal dã kɨmut
mbã kaglog tanãimɨta tɔin dɔat.
14Ta 'nten tee kɨtakul mberkɨnda lo ngénɔl log, i takɨgang lo ngékunjɗangg kɨtakad ngéndɨ kɨ dɔd dõ gerɨn ne Ngetɔitɔi ndɨ õɓe dɔ kõɓet lo deg, a ad kõɓe de'n kama ndig, na a tɔi ndah dekɨsɔl dɔ ɓet.
15'Nten la i nii kɨ m'oo, mĩ ngar Nebukadnesar. Ĩ Beltasar kɨ i ɔrr girra tit'n ngéterrg tube kɨ kam kõɓet lom asɨn kadɨm m'ger girra al, na ĩ taa ne, i asɨ kɨta ndil Luwahg kɨkunjɗang i kamit.
16Kamla Daniel'n tɔa i Beltasar ye, ta yaa biw kaglo sĩ, tagahg ad kama gang man. Taa ne, ngar ela an: Beltasar, ot kad kami gang man kɨta nii'n non ke kɨta kɔrr girra'n ɓet a i kɨ kɔrr kad i oo. Beltasar tur an: Ngeem, nii'n i nii nõ kɨ kɨ kɔrr girra, ni ĩ kɨta madngétaig tã. 17Kam niit loi ye, oo kag kɨbo, kɨ ngang na ngal ngãibe ad tasoma ɔd dɔrã. Deg kɨ dɔningt kɨtaagbe oona.
18Kag'n non mbia maj ngãi, na kanda to mbuj, ad dãg kɨmut ɗe ton ndilat, yelg kɨ dõ hɔn londɨ tit ho ɗan kujg lod dɔjiagt tɔ, 19Ye ngar, kag kɨbo'n non ye i ĩ. I tel de kɨbo ngãi, tɔgi i ngãi, kɔsɨgon loi ndɨ aw kɨ ketekete mbã kaha tee dɔrãt, tɔg kõɓe loi tee aw mbã log kɨ dɔboi dɔningt. 20Na ngar, i oo ngenɔl lo, Ngekunjɗang mad, ɗisɨ ko dɔrãt dõ el an: I gan kag'n non kɔ, i tujɨna, na i nyan ginda dɔ ngɨraagt kɨ ningt, i dɔɔn kɨ jinjir hand kɨ ningakasɨ. Kad tal kɨ dɔrãt hɔ dɔat, kɨ i ngesa mũ nat kɨ dãg kɨmut mbã kad kaglog tanãimɨta tɔin dɔat. 21Gira i titbe: I mberkɨnda lo Ngetɔitɔi la tee dɔ ngart kɨ ngeem ye.
22A tuɓain kɔ ku degt, londɨ a i nat kɨ dãg kɨmut, a i sa mũ tit mang be, tal kɨ dɔrãt a hɔ dɔit, kaglog tanãimɨta a tɔin dɔit mbã kad i ger Ngetɔitɔi'n ndɨ õɓe dɔ kõɓet lo deg, na a ad kõɓe de'n kama ndig kad õɓe. 23Na tit'n ta teen kad nyan ginda dɔ ngɨraagt, titbe tɔ la a nyan ne kõɓe kɨtatɔi, na a i loi kɨɗubagt dɔ ndɔt'n i ger kad Luwah kɨ dɔrã dõ la i Ngendɨ dɔ nyagt tube. 24Kɨtɔ 'nten, ngar, maj kad i ta takɔj lom. I nya ta ɗa majal, i hɔ ɗa denesew. I nya ta ɗagootal, oo kumtondo lo deg kɨdangt. Kɨtɔkad maj a urri ndɔ ngãi ɓaitɔ. 25Nyag'n non tube teen dɔ ngar Nebukadnesart.
26Go nahgt kɨkɨlah gidaijoo, ngar a ndia dɔ londɨt kɨdɔ kuj kõɓet kɨ Babilon. 27El an: Ɓebo'n ɗan i Babilon kɨbo kɨ m'ɗa kɨtakul tɔgɨm kɨngãi kɨtakad i kuj kõɓe, na kɨtakad tɔm kon kɨta kɔsɨgon lom kɨtɔitɔi ale?
28Ngar elta kɨ tant tɨga al ɓaitɔ a ne, ndi ta mad tee ko dɔrãt dõ an: Oo ngar Nebukadnesar, elɨn kad i ger taan kõɓe jiit kɔ woi. 29A tuɓain kɔ ku degt, londii a i nat kɨ dãg kɨmut, a i sa mũ tit mang be, kaglog tanãimɨta a tɔin dɔit mbã kad i gerɨn Ngetɔitɔi ndɨ õɓe dɔ kõɓet lo deg, na ad de'n ndig kada. 30Tentenbe tɔlɨn kɔn ta'n non dɔ Nebukadnesart. Tuɓana kɔ ku degt, sa mũ tit mang be, tal kɨ dɔrãt hɔ dɔ dãroat, bisɨdɔa il ngal tit yel kuro be, kɨmunrin jia kɨ njaa tit'n kɨ kɨmunrin nja yel tɔ ho.
Ngar Nebukadnesar yoot
31Dɔboi ndɔg'n non la, mĩ Nebukadnesar, m'un kumm kɨ dɔrãt, hangalɨm tel romt gog ad m'ɔsɨgon Ngetɔitɔi, m'nduba, m'toi Ngéndɨ kɨnõt; kɨta a õɓe mbãkɨnõt, kõɓe loa i kõɓe kɨ a to kɨ ngankat kɨ nganka. 32Ngéndɨ dɔningt tube ĩn tit nya mad al takumat ndɨ ɗa nya kɨ kama ndig ku koosɨgt kɨ dɔrãt dõ, kɨ ku ngéndɨ dɔningt; de mad kɨ asɨ kɔg jia ke kela kan: I ɗa ɗi a? 33Kaglot'n non la hangalɨm tel romt gog na tɔko lo kõɓe lom kɨmaj lom kɨtɔitɔi kɨ nyẽr kunj kõɓe lom tu telɨn kɨromt. Ngékɔjtag lom kɨ mbaiɓeg lom kunmɨn kɨgog, ndamɨn dɔ kõɓet lom gog, na tɔgɨm aw kɨkete kete. 34Tajigla, mĩ Nebukadnesar, m'ndɨ m'ndub Ngar kɨ dɔrãt dõ, m'ndɨ m'tɔia, m'ndɨ m'ɔsɨgona kɨta kɨlaɗaag tube ĩn goɗobat, ɗob nya ɗaag tɔ i kɨdenesew, na deg tube. Ngenda kɨgo dɔngangt ngar kɨ dɔrãt dõ a asɨ la dɔd kɨber.
Currently Selected:
Daniel 4: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
