Daniel 3
3
Luwah ug deg lon kɨmita ɔrrd kam horrt
Ngar ɗa yo lɔr, na ndɨje deg kad ɔsɨn dɔd ber nõat
1Ngar Nebukadnesar ɗa ɓakumta de kɨ lɔr; ngala kɨ dõ i metɨr dɔmɨta, tata i metɨr mɨta. Uda ad ɗa dõ kam dɨlalot kɨ tɔa i Dura kam nusɨ dɔning Babilont. 2Kamla ngar Nebukadnesar la kun mbaiɓeg kɨ ngékõɓeg, kɨ bɨrangekõɓeg kɨ ngékɔjtag kɨ ngékoogo nar kɨ ngégergangtag kɨ ngégangtag kɨ kɨbog dɔ nusɨ dɔninggt kɨnat kɨtakad ɗe lan girr kɔsɨ dɔ ber nõ ɓakumta det'n ngar Nebukadnesar uda ad ɗa dõ nõ. 3Kamla mbaiɓeg, kɨ ngékõɓeg, kɨ bɨra ngekõɓeg, kɨ ngekɔjtag kɨ ngékoogo nar kɨ ngégergangtag kɨ ngégangtag kɨ kɨbog dɔ nusɨ dɔninggt kawɨn na kɨnat kɨta la girr kɔsɨ dɔ ber nõ ɓakumta det'n ngar Nebukadnesar uda ad ɗa dõ. Deg'n non ɗan dõ nõ ɓakumta det'n Nebukadnesar uda ad ɗa dõ nõ.
4Kamla ngelamber ko kɨ ndin kɨbo an: Ĩn deg kɨ girrdeg kɨ dang dang kɨ deg tube kɨ ta ɓe losɨ i dang dang, oon nya'n ngar ndasɨ mbera kad i ɗan. 5Lon a oon dɔ ndi brunj kɨ ko, kɨ tow, kɨ kɨndeh, kɨ kɨndeh ngo, kɨ kund, kɨ towgã kɨ nya ɗa mujik kɨɗen a ne, a i son kɨber, ɔsɨn dɔsɨ ningt nõ ɓakumta det kɨ ɗan kɨ lɔr'n ngar Nebukadnesar uda ad ɗa dõ nõ. 6Dekɨɗen mbet so kɨber na ɔsɨ dɔn ningt nõat al a ne, tajigt a hɔna lana kam pur horrt kɨ kõ giling giling.
7Titbe la lon oon dɔ ndi brunj kɨ ko, kɨ tow, kɨ kɨndeh, kɨ kɨndeh ngo, kɨ kund, kɨ towgã, kɨ nya ɗa mujik kɨɗen ye, deg kɨ girrdeg kɨ dang dang kɨ deg tube kɨ ta ɓe lod i dang dang son kɨber, ɔsɨn dɔd ningt nõ ɓakumta det kɨ ɗan kɨ lɔr'n ngar Nebukadnesar uda ad ɗa dõ.
Daniel kɨ namɨng ɓankul kɨ Bɨraɓe
8Taa ne, dɔkàdt'n non Kaldea madg aw unɨn dɔ deg kɨ Judatg. 9Elɨn ngar Nebukadnesar anan: Ngar, kɨ i ndɨ kɨ dɔi dõ mbãkɨnõt. 10Ĩ ngar, ta tee kokɨroit kɨtakad dekɨɗen kɨ a oo dɔ ndi brunj, kɨ ko kɨ towmand, kɨ kɨndeh, kɨ kɨndeh ngo, kɨ kund kɨ towgã, kɨ nyaɗa mujik kɨɗen a ne, a so kɨber, a ɔsɨ dɔn ningt nõ ɓakumta det kɨ ɗan kɨ lɔr, 11Na ĩla de mad kɨ a so kɨber, na a ɔsɨ dɔn ningt nõat al a ne, a lana kam pur horrt kɨ kõn giling giling. 12Na oo ngar, deg madg Judat ĩn nõ, ĩgɨn i ndad dɔ kɨla kõɓet lo nusɨ dɔning kɨ Babilon, ad i Sadrak kɨ Mesak kɨ Abed Nego. Oo ngar, deg'n non telɨn rod go ta loi al, ɗan kɨlaɓer lo luwahg loi al ho, ɔsɨn dɔd ningt nõ ɓakumta det'n i ɗa kɨ lɔr, na uda ad ɗa dõ nõ al tɔ.
13Kamla wong tɔl Nebukadnesar sɔkɨr ad ndamber kad ɗen kɨ Sadrak kɨ Mesak kɨ Abed Nego. Lon ɗen sed nõ ngart ye. 14Nebukadnesar eld an: Ĩn, Sadrak kɨ Mesak kɨ Abed Nego, rota i ɗan kɨlaɓer lo luwahg lom al ho, i ɔsɨn dɔsɨ ningt nõ ɓakumta det kɨ m'uda dõ al e? 15Tajigla ĩla ĩn kɨ rosɨ kɨ ɗa woi kad i son kɨber, ɔsɨn dɔsɨ ningt nõ ɓakumta det kɨ m'ɗa nõ, lon i oon dɔ ndi brunj kɨ ko, kɨ tow kɨ kɨndeh, kɨ kɨndeh ngo, kɨ kund, kɨ tow gã, kɨ nyaɗa mujik kɨɗen a ne, maj. Na ĩla i mbetɨn kɔsɨ'n dɔsɨ ningt nõat a ne, tajigt a lasɨn kam pur horrt kɨ kõ giling giling. Luwah kɨ ɗah hã a asɨ kug kɔrrsɨ jimt a?
16Sadrak kɨ Mesak kɨ Abed Nego turɨn ngar anan: Ngar Nebukadnesar, kɨ ndig kelta mad kad j'ɔrrɨn ta mad dɔjt al. 17Na nya'n maj kad i ger, Luwah loj'n kɨ ɗa kɨlaɓer loa ye, asɨ kug kɔrrj kam pur horrt kɨ kõ giling giling. Ãã, a ug ɔrrj jiit. 18Na ĩla titbe al kaa ne, ngar, kɨ i ger maj, j'a kɨ ɗa kɨlaɓer lo luwahg loi al ho, j'a kɨ j'ɔsɨ dɔj ningt nõ ɓakumta det kɨ ɗan kɨ lɔr kɨ i uda ad ɗa dõ nõ al tɔ.
19Nõbe Nebukadnesar ɓawong kɨtɨngabil, ad kuma il kirir dɔ Sadrakt kɨ Mesak kɨ Abed Nego. Nda mber kad tɨngan pur horr nja tanãimɨta tɔi tɨngaa kɨ maɗi. 20Kamla ndamber kad kɨ'n ndan ngeɗɔɔg madg ku bahkad ngéɗɔɔt lon dɔ Sadrak kɨ Mesak kɨ Abed Nego, kɨ land kam pur horrt kɨ kõ giling giling'n non. 21Tajigt, dɔɔn deg kɨ mɨta'n non kam njalagt lod kɨ kubg lod kɨ ngal, kɨ kubji lod, kɨ ndeg kubg lod, na land kam pur horrt kɨ kõ giling giling'n non. 22Ɗan kɨgo tati kɨngang ngãin tee ta ngart, pur tɔ i kɨtɨngabil ye, ad ndõhorr tɔl kɨrã ɗɔɔgt'n lan Sadrak kɨ Mesak kɨ Abed Nego kam horrt nõ. 23Na deg kɨmita'n non, ad i Sadrak, kɨ Mesak, kɨ Abed Nego son kɨ dɔɔnd be kam pur horrt kɨ kõ giling giling.
Nam Daniel kɨmita teen kam horrt kɨ õ giling giling
24Kamla ndil ngar Nebukadnesar tee saw, ɓai ɗat ɗa dõ, el ngékɔjtag lon kɨɓol an: Deg mɨta ye hã kɨ dɔɔd j'ũd kam horrt ale? Turɨn ngar anan: Rota ngar, i deg mɨta la j'ũd kam horrt ye. 25Ngar tur an: Tajigne taa ne, deg sɔɔ la ɗa m'ood ye, na ĩn kɨtut nya dõ, ɗa ndian kam horrt; nya mad ɗad al; kɨ deg kõsɔɔ taa ne, tit kɨ kɨkɨɗa ku ngan luwahgt. 26Kamla Nebukadnesar ndɔt kɨ ta pur horrt kɨ kõ giling giling'n non, el an: Sadrak kɨ Mesak kɨ Abed Nego, ngékɨlaɓerg lo Luwah Ngetɔitɔi, i teen, i ɗen nẽbe. Taa ne, Sadrak kɨ Mesak kɨ Abed Nego teen kam horrt kɨtɨga. 27Mbaiɓeg kɨ bɨra ngekõɓeg kɨ ngékɔjtag lo ngar kawɨn na kɨ dɔdt nɔlɨn rod na oon kad horr ɗa sed nya mad al, ke dãrod horr õ al, horr ɔd bisɨdɔd al ho, njalag lod to kari, na dãrod ot horr al. 28Nebukadnesar el an: Kɔsɨgon kɨ dɔ Luwaht lo Sadrak kɨ Mesak kɨ Abed Nego, ĩn la kɨ malaika lon, ad ug ɔrr ngékɨlaɓerg lon ĩgɨn ɓan kula, na telɨn rod go mberkɨnda lo ngar al, lan dãrod koit kad ɗan kɨlaɓer, na ɔsɨn dɔd ningt nõ Luwaht mad kɨɗang al, na Luwah lod kɨ kɔsɨ dɔd tã.
29Kɨtɔ 'nten m'nda mber, m'an, deg ke girrdeg kɨ dang dang, ke deg kɨ ta ɓe lod i dang dang kɨ a elɨn ta kɨmajal dɔ Luwaht lo Sadrak kɨ Mesak kɨ Abed Nego a ne, a gangɨnd njikɨtinjikɨt a telɨn kujg lod ɓirɓit't, kɨta Luwah mad kɨɗang kɨ asɨ kug kɔrr deg lon titbe goto. 30Kamla ngar tɔi Sadrak kɨ Mesak kɨ Abed Nego kɨ dõ kam nusɨ dɔningt kɨ Babilon.
31Ngar Nebukadnesar la maktub mberkɨnda 'nten: Ngar Nebukadnesar kɨro degt kɨ girrdeg kɨ dang dang kɨ deg kɨta ɓe lod i dang dang ngéndɨ dɔningt kɨ taagbe:
Kɨ i ndɨn kɨ lapia kɨ ngãi.
32M'oo nya kam ndilt m'an maj kad kɨ m'adsɨ
gerɨn nyakɔjg kɨ nyag kɨyaya ĩn Luwah Ngetɔitɔi ɗa sem.
33Nyakɔjg loa ĩn kɨbobo,
nyag loa kɨyaya in kɨngang ngãi,
kõɓe loa i kõɓe kɨ tokɨnõt,
a õɓe kɨ ngakat kɨ ngaka.
Currently Selected:
Daniel 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
