Kɨlag 18
18
Pol aw kam ɓet kɨ Korent
1Go nyagt'n non Pol ɓai Atent aw Korent. 2Ngah Juip mad nõbe tɔa i Akɨla, oojɨna kam dɔning Põt. De'n non ɓai dɔning Italit ɗe Korent't nat kɨ nẽn Prisil. Kɨtɔ ngar Sejar Klod ndamber kad Juipg tube teen kɔ kam ɓebot kɨ Rom. Pol aw ro Akɨlat kɨ Prisil. 3Tit kan kɔd lod i kɨɗabe ye, aw ndɨ nat sed kad ɗan kɨla jo kujkubg. 4Kɨ ndɔ taakò lo Juipg kɨɗen, Pol a aw kam kuj kawnat lo Juipg a da sed ta sah ɗob kad Juipg kɨ Grekg taan ta lo Krist.
5Na lon Silas kɨ Timote ɓain dɔning Masedɔant ɗen ye, Pol nda ron degir kɨ kaglo tube, ta kɨla la mber tat lo Luwah; manaj kɨ tɨga wakɨsɨ kɨ rotĩn kɨ nõ Juipgt an: Jeju i Krist. 6Lon Juipg taana ɗɔɔ na tajɨna ho ho ye, Pol yekɨ kubg lon yekɨyekɨ na eld an: Kɨ mosɨsɨ i dɔsɨt ĩn kɨɓeg; mĩ kɨ kar nyang dɔt; na labekɨnõt m'a m'aw kɨ ro girrdegt kɨ dang dang.
7Pol tee kam kuj keltat lo Luwah aw ɓe lo de mad kɨ tɔa i Titus Justus, i de kɨ nya ɗaa i kɨgo lo Luwaht. Ɓe loa i kad kuj keltat kɨ Luwah. 8Na Krispus'n i kɨbo dɔ kuj keltat kɨ Luwah ye, taa ta lo Bɨraɓe nat kɨ ngékɨɓe lon. Deg ngãibe kɨ ɓebot kɨ Korent't, lon oon dɔ ta lo Pol ye, telɨn ngétaata lo Jeju ho, ad ɗand baptem ho. 9Bɨraɓe elta Pol ndɔ kam nyakookamndilt an: Ot ɓool, na elta kɨ nõit, i ndɨ goi mbo al. 10Kɨtɔ mĩ nat sei, de mad kɨ a ɗa sei majal goto, kɨta m'aw kɨ deg ngãibe kam ɓet'n ɗan. 11Pol ndɨ kam ɓet kɨ Korent ɗa ɓal kɨɗa kɨ nusɨ. Ndoo deg ta lo Luwah.
12Na kaglot'n Galiõ õɓe dɔ dɔningt kɨ Akait, Juipg ɓain kɨ dɔ Polt kɨ ta, na awɨn sia lo gangtat, 13elɨn anan: De'n ɗan sah kad deg ɔsɨn dɔd ber nõ Luwaht kɨgo ɗobt kɨ dang kɨ mberkɨnda lo Moij.
14Na lon Pol ndig kɨ'n turta a ne, Galiõ el Juipg an: Ĩn Juipg ĩla i ta kɨ ɔj dɔ nyaɗa kɨ gootal, ke nyaɗa kɨmajal mad a ne, ɓet m'a m'oo dɔ ta losɨ. 15Na ĩla i ta kɨmaj na, kɨ ɔj dɔ kɔrr girr tag, ke tɔg kɨ kam mberkɨndat losɨ a ne, i ta lom al, na i ta losɨ, kɨta m'ndig kad mĩ ngegangta dɔ nyagt'n nõ al. 16Ad Galiõ tuɓad kɔ lo gangtat ad teen. 17Taa ne, Juipg hɔn Sosten'n i kɨbo dɔ kuj kawnat lo Juipg, tɨndana mbukɨmbukɨ nõ Galiõt lo gangtat nõ, na Galiõ tur go nya'n non al.
Pol tel ɓebot kɨ Antiosɨ kɨ kam dɔning Sirit gog
18Pol ndɨ kam ɓet kɨ Korent kaglo asɨ tat, kamla ɗa lapia ngankõ, na un too kɨbo aw dɔning Sirit, nat kɨ Prisil kɨ Akɨla, Pol ngɨse dɔn kam ɓet kɨ Sãkre kɨta un kɔn kɨ yokɨnda ad Luwah. 19Aw tee ɓebot kɨ Epesɨ. Pol nya Prisil kɨ Akɨla nõ be. Tɔi aw kuj kawnat lo Juipg, majta sed ngonsĩ ɓaitɔ. 20Na Juipg ndɨjena kad ndɨ sed ngonsĩ ɓaitɔ na Pol ndig al. 21Ɗad lapia eld an: Ĩla i ndig lo Luwah a ne, m'a m'tel m'ɗe rosɨt gog.
Kamla ɓai al kam toot aw Epesɨt. 22Pol aw ud ber kam ɓet kɨ Sejare, aw ɗa lapia ngékawna kam ɓebot kɨ Jerusalem, kamla ɓai nõbe aw kam ɓet kɨ Siri.
23Ɗa ndɔ asɨ tat kam ɓet kɨ Antiosɨ, kamla ɓai aw, a lago dɔning Galati kɨ Pirji ɔj ngéndoog lo Krist kad ngangɨn kokɨro kam tat lo Krist.
Apolos aw kam ɓet kɨ Epesɨ kɨ Korent
24Juip mad kɨ kooj Alegjandrit tɔa i Apolos ɗe ɓebot kɨ Epesɨ. Apolos i de kɨ oo ɓalta maj ngãi, ger girr maktub kɨkunjɗang maj ngãi tɔ. 25De'n non i kɨ ndoo kam ɗobt lo Bɨraɓe, i de kɨ tɨngabil, ndɨ la mber Hoita kɨmaj lo Jeju kɨgo ɗoba kɨ jeje na ger baptem lo Jã kɨɗabe koon. 26Mba girr kelta deg kɨ kam kɨmisɨmisɨ kam kuj kawnat lo Juipg. Prisil kɨ Akɨla oon dɔ ta loa, taa ne unɨn na kɨrodt, ndoona go ɗob lo Bɨraɓe kɨ jeje. 27Kamla Apolos ndig kaw dɔning Akait. Ngétaata lo Jeju ɔsɨn goa ad ndangɨn maktub adɨn ngéndoog'n ndɨn dɔningt kɨ Akai kad hɔna kɨ rodt maj. Lon aw tee rodt ye, ɗa kɨ ngétaata lo Jeju ngãibe kɨgo kamkẽt lo Luwah. 28Kɨtɔ Apolos dum dɔ Juipg kɨ tɨga wakɨsɨ kam tat kɨ kel kɨ goosɨ kɨ tɔg kɨ ngãi ad Juipg asɨn turta kela al. Ɔjd kam maktubt lo Luwah kad gerɨn maj kad Jeju i Krist.
Currently Selected:
Kɨlag 18: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
