Kɨlag 12
12
Darondo ɓai dɔ ngékawnat gog
1Kaglot'n non, ngar Herod Agripa mbagɨr ɗa majal kɨ deg madg ku ngékawnat. 2Herod ad tɔlɨn Jak kɨ ngonkõ Jã. 3Lon oo kad nya'n non nel Juipg ye, ad hɔn Pierr ho. I kaglo ɗa nah kuɓɨr bɨna kɨkanj ber kasɨ. 4Herod ad hɔn Pierr lana dangait, laa ji ngéɗɔɔgt kɨlah gid kɨbojidet, deg sɔɔ sɔɔ la a ngomɨna ye. Herod nda kamɨnt kad'n tee sia kɨ tɨga ndɔ ɗa nah Pakɨt kɨ nõ koosɨdegt kad'n gangta dɔat. 5Ngéɗɔɔg ngomɨn Pierr kam dangait, na ngékawnag elɨn ta kɨ Luwah kɨ rotĩd kɨtatɔa.
Malaika ɔrr Pierr kam dangait
6Na lon Herod ndɨ ɗa kɨ'n gangta dɔat nõ koosɨdegt ye, kam kondɔt'n non, Pierr to ɓi dan ngéɗɔɔgt joo, i kɨ dɔ kɨ jinjir joo ngéngom log ɗan tabit't ɗa ngomɨn ta kuj dangai.
7Tentenbe, Malaika lo Bɨraɓe tee hɔi ɗa kadat, kunj mad unj gɨle dangait. Malaika'n non nda Pierr ko gangɨr kadaat ndoolan an: I ɓai dõ Kanag. Tajigt jinjirg kɨ jiat tuson kɨ ber.
8Kamla Malaika ela an: I dɔboi kɨ ngaland ho, i dɔ kɨla sa loi ho. Pierr kaa ne, ɗan titbe ho.
Malaika ela an: I la kub loi roit, na i ndulo gom.
9Pierr tee kam dangait a ndulo go Malaika, gaa kamɨnt kad nyan Malaika ɗa ye, i nya kɨ jeje al, na oo an: i nya kɨ n'oo kam ndilt. 10Pierr kɨ Malaika tɔin ngéɗɔɔg kɨdasa. Kamla tɔin kɨkõjoo tɔ, na teen tabit handt'n taa ɗa kɨ kam ɓet ye, tabit'n non tee kɨ dɔn ad'd, Pierr kɨ Malaika tee unɨn ɗob kɨɗa. Tentenbe Malaika nya Pierr nõbe.
11Taa ne, lon kum Pierr ja, ad ndila ɗe roat ye, el an: Tajigla m'ger maj kad i Bɨraɓe la la Malaika lon ad ajɨm ji Herodt kɨ kam nyagt tube'n Juipg ɔjɨn kamdt kad'n ɗan sem ye.
12Lon Pierr ger nya 'nten maj ye, tɔi aw ɓe lo Mari kɨ kõ Jã'n a kunɨna Mark. Nõ be, ngétaata lo Krist kawɨn na tit, ndɨ elɨn ta kɨ Luwah. 13Pierr aw nda tabit kɨ tɨga. Taa ne ngon kɨdẽ mad kɨ ngekɨlaɓer, tɔa i Rod, ɗe kɨta koo.
14Na lon Rod ger ndi Pierr ye, ronel ɗaa ad tee tabit al, na aw kɨ nja ngɔd ɔrr hoia ĩgɨn ndɨn kam kujt an: Pierr ɗa tabit't nõ.
15Elɨna anan: Nya a hãni. Na Rod hɔ bá an: I Pierr jeje.
Turɨna anan: I Malaika loa.
16Na Pierr ɗa nda tabit par par, lon ɗe teen tabit a ne, oon Pierr ad ta yad. 17Na Pierr mbɔjd kɨ jin kad ndɨn god mbo, kamla ɔrrd goɗob kɨ titbãi Bɨraɓe teen sen kam dangait. Eld tɔ kad ɔrrɨn hoi nyag 'nten Jak kɨ ngankõ ngétaata lo Krist.
18Lon loti woi ye, kam ngéɗɔɔg dad ta paa ngãibe, ad ndɨjen rodt ta anan ke ɗi ɗa Pierr a? 19Herod ad sahn Pierr kɨ log tube, na ngahna al, kamla ndɨje ta ngéɗɔɔg kɨ ngéngom Pierr ngãi, got gog ndamber kad tɔlɨnd kɔ. Herod ɓai dɔning Judet aw dɔning Sejaret, aw ndɨt kaglo tɔi ngonsĩ.
Koi Herod
20Herod ɓawong ngãi kɨ deg kɨ Tirt kɨ Sidõ. Deg'n non ndan rod nat aw ngahna. Kɨtɔ 'nten lan nar ber adɨn Pilat, ngekoogo kuj ɓi lo ngar, ndɨjen kad'n lan nooj nat, kɨta ngendɨ dɔning Tirt kɨ Sidõ ndɨ ngahn nyaɓetro lod ko kɨ dɔningt'n Herod õɓe dɔt.
21Ɔrrɨn ndɔ mad, ndɔt'n non, Herod la kub ngar ront, ndɨ dɔ pong kõɓet, elta koosɨdeg ad ndia ko wokɨrwokɨr. 22Deg kon kɨ ndid kɨbobe anan: Ndɨ de'n ndɨ elta i ndɨ de al, na i ndɨ luwah mad.
23Kaglot'n ndɨ elta ɓaitɔ ye, Malaika lo Bɨraɓe nda Herod kɨta ɔsɨgon ron, na ɔsɨgon Luwah al, ad kɨdeg sana ad oi. 24Na Ta lo Luwah ɔrr lo wom, ngéndoog kaa ne, bãin mbɨra mbɨra ho. 25Barnabas kɨ Sool tɔlɨn kɔn kɨla'n ɗan ku ngétaatat lo Krist kam ɓet kɨ Jerusalem, ad tel ɗen ɓebot kɨ Antiosɨ gog nat kɨ Jã'n a kunɨna Mark.
Currently Selected:
Kɨlag 12: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
