Kɨlag 1
1
Jeju un kɔ'n kad n'a n'la kɨ Ndil Kɨkunjɗang
1Ĩ Teopil, kam maktubt lom kɨdasa ye, m'ɔrri hoi nyag tube'n Jeju mba girr ɗa ho ndoo degt ho, 2mbã ndɔt'n hã awɨn dɔrãt. Deg'n kɔtd kad ĩn ngombangkɨlag ye, ndad mber kɨgo tɔg Ndil Kɨkunjɗang kamtã la aw dɔrãt ye. 3Go koiat, Jeju ɔj ron kɨ kumkajir kɨ tɨga wakɨsɨ ad ngombangkɨlag lon kɨgo ɗob kɨ dang dang oona, ndɔ dɔsɔɔ, tee hɔi kɨ rodt, eld ta kɨ ɔj dɔ kõɓe lo Luwah. 4Ndɔ mad lon Jeju ndɨ san nya sed lo kɨɗa, ndad mber an: Ot nyan ɓebo Jerusalem, na i ngoon nya'n Bɔw unɨn kɔn ad m'elsɨ ta dɔt woi.
5El tɔ an: Jã taa ne, ɗa deg baptem kam mant, na ĩn taa ne, kam ndɔgt kɨ tẽbe a ɗasɨn baptem kam Ndil kɨkunjɗangt.
Jeju tel aw gog dɔrãt
6Lon ngombangkɨlag kawɨn na kɨnat ro Jejut ye, ndɨjena anan: Bɨraɓe kaglot 'nten la ɓet a i tel kɨ kõɓe ad Israel gog yo?
7Jeju turd an: I ta losɨ al kad i gerɨn kaglo'n non, ke dɔnah'n nyag'n non a ɗan nya tit. Kɨtɔ Bɔwm la ɔj ye, ĩ kɨ kɨɗanbe tɔ la asɨ kad ɔj kagloa ho, dɔnaha ho ye. 8Na, ɓet a i ngahn tɔg, lon Ndil Kɨkunjɗang a ɗe dɔsɨt, ad a ĩn ngémanaj lom kam ɓebo Jerusalemt, kɨ kam dɔning Judet kɨtaagbe, kɨ kam dɔning Samarit, mbã dɔngoi dɔning tɔ.
9Goot'n Jeju eld ta'n non ye, aw dõ dɔrãt, lon ngéndoog loa ɗa ndan kumd goat ɓaitɔ a ne, kil ndii ɗe tube dɔa ad nyimɨr takumdt.
10Lon ɗa ndan kumd ndã kɨ dɔrãt ye, tentenbe deg joo kɨ lan kub kɨ ndangung ɗe ɗan kadt. 11Elɨn ngéndoog anan: Ĩn deg kɨ Galilet kɨtɔɗi i ɗa i ndan ne kumsɨ kɨ dõ dɔrãt a? Jeju'n aw dɔrãt ye, tit'n awɨn, ad i ɗa oon ye, titbe tɔ la a tel ɗen tɔ ho ye.
Kɔtɨn de mad kad i ngombangkɨla goot Judast
12Kamla ngombangkɨlag lo Jeju ɓain dɔ mbal kag olibgt'n i nderbe kɨ ɓebo Jerusalem, asɨ kilometɨr kɨɗa. 13Lon aw teen Jerusalemt ye, awɨn kam kujt kɨ dõ, i lo kawna lod. Pierr, Jã, Jak, Andre, Pilip, Tomas, Bartelemi, kɨ Matie, Jak kɨ ngon Alpe, Simõ Jelotes kɨ Jud kɨ ngon Jak. 14Deg'n non tube hɔn bá kam keltat kɨ Luwah, kɨ kam kɨkɨɗa nat kɨ dekɨdẽ madg, kɨ Mari kɨ kõ Jeju kɨ ngankõ Jeju.
15Ndɔ madt, ngétaata lo Krist kawɨn na asɨn ɓu kɨ dɔjoo. Pierr ɓai ɗa dandt kamla eld an: 16Ngankom, nya'n Ndil Kɨkunjɗang eltaa kete kam maktubt kɨkunjɗang kɨtakul Dabid dan dɔ Judas ye, nya'n non ɗa nya. Judas tel ngekɔrrta ɗob deg kɨ ngéhɔ Jeju. 17Judas i de'n maɗi i nat sej, ĩ kɨ mbed kad ɗa kɨla titj tɔ kaa ne, 18de'n non, lon ndugo ndɔɔ kɨ nyabaji majal lon ye, so dõ ad kama ndu, tia tube ɔrr rundung kɨ ber. 19Nya 'nten deg kɨ Jerusalemt tube gerɨn kɔikɔi, kɨta 'nten la kunɨn ndɔɔn non kɨ ta ɓe lod anan: Hakeldama, ad i ndɔɔ mosɨ.
20Kam maktub pagt ndangɨn anan: Kad kam kuj loa todɨla, kɨ de mad ndɨt al bat.
Ndangɨn taa 'nten tɔ anan: Kɨ de mad ga goota kam kɨlat.
21Kɨtɔ 'nten, ku degt'n ĩn nat sej dɔ kɨlat, kaglot tube'n Bɨraɓe ĩn kɨ dɔn dõ nat sej ɓaitɔ, 22mbagɨr baptemt lo Jã nu, mbã teen ndɔt'n Jeju aw dɔrãt ye, maj kad kɨkɨɗa ku degt'n non tel ngemanaj sej dɔ ɓai Jeju lo koit.
23Taa ne, mbedɨn deg joo, ad i Jojep'n a kunɨna Barnabas, tɔa mad i Justus, kɨ Matias ho. 24Kamla ngétaata lo Krist elɨn ta kɨ Luwah anan: Bɨraɓe, i ger ngarkam deg tube, ku degt kɨ joo'n ɗan ɗan, ye i ɔj'j de'n i kɔta nõ.
25Kad ga koot Judas kam kɨlaɓert kɨ kɨla ngombangkɨla'n Judas nya kɔ kad n'aw lot lon kɨ kɔsɨdɔn.
26Kamla yan yuk dɔdt, kad'n gerɨn ne de'n Bɨraɓe kɔta nõ; yuk so dɔ Matiast; ad tɨdan Matias nat kɨ ngombangkɨlag kɨkɨlah gidaikɨɗa.
Currently Selected:
Kɨlag 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
