MIPUM SIARHNAK 19
19
Kawlpawla San Ai Vutkuang
1 Bawipa in Moses le Aaron hnenah, 2a hnia lamai dante tu Israel mite hnenah pe tuhin thupe i: A hnahpha le na a per awng lai lo kawlpawla san koih tu selai, 3suangbawi Eleazar hnenah pe tuseh. Cam hmun pualam ah suahpui tu selai Eleazar mithmuh ah ro tuseh. 4Cen suangbawi Eleazar in a thisan hrekkhat lang tu selai Ponhlam hmai lamah a zungkawk in vel sarih tian phiah tuseh. 5A sa veksen in; a vun le a tit, a thisan le a songrilte thawn suangbawi mithmuh rori ah mai in tai tusek seh. 6Cen suangbawi in cedar thing, hissop thingkak le pon san lang tu selai mai songah tih tuseh. 7Cia hnuaah a hnikpon sawp tu selai tak a hlu ben hnua fangin a riahbuk ah let tuseh. Ikhalselai cia zan lam tian tu mi cianghlimlo i. 8Kawlpaw a rotu pa inkhai a hnikpon sawp tu selai takhlu tuseh. Ikhalselai cia zan lam tian tu mi cianghlim i tuh ve lo i. 9Cen a cianghlim pa pakhat in kawlpawla san vutkuang rut tu selai riahbuk pua hmun cianghlim ah dah tuseh. Ciami tu Israel mite in cianghlimhnak ca tidap a hmang fangin ciami heh cianghlimruaihnak ah hmang tuseh. Ciami heh sual thiangfaihnak hrang taihnak i.#Heb 9:13 10Ciami vutkuang a ruttu in a hnikpon sawp tuseh. Ikhalselai cia zan lam tian tu mi cianghlimlo i. Hemi dan tu Israel mite ituseh amahte lakai a umtu ramdang mite ituseh, a zomzet in amahte hlun tuhhnak i.
Mithi Luang Dai Fangin
11Mithi luang a daitu heh ni sarih song cianghlim tuh lo i. 12Amah veve cianghlimruaihnak tidap in ni thumhnak le ni sarihhnak nia fangin cianghlim dun tu selai ciatihin mi cianghlim ah cang tuh i. Ikhalselai ni thumhnak nia le ni sarih nia ah cianghlim dun hlah lekhaw cianghlim tuh lo i. 13Mithi luang a daitu heh cianghlimruaihnak ti burh hlah lekhaw mi cianghlim cang thil tuh lo i. Bawipa ai Thukham dahhnak Ponhlam ningrimtiar imanin Bawipa ai minung lakah siarcih tuh nawn lo i.
14Mi pakhatkhat a hlam songah thi lekhaw a thi fangin a hlam songah umtu ituseh, sumpua in a luttu ituseh, ni sarih song tu cianghlimlo i. 15A sin nai lomi palang le bel khai a cianghlimlo i. 16Ciabang thotho in riahbuk pualam ah mi pakhatkhat ma liam manin ituseh, amah niu in a thihnak ituseh, thi ai ciami mithi luang a daitu heh ni sarih song cianghlimlo i. Minung ruh ituseh, mithi hlan ituseh, a daitu heh ni sarih song cianghlimlo i.
17Hetih bangin cianghlimlohnak a um fangin sual thiangfaihnak tuhin taihnak kawlpawla san ai vutkuang lang tu ilai bel songah ning dah hnuaah ti ciangfai burh tuseh. 18A hmasa ah a cianghlimmi pakhat in hissop thingkak lang tu selai ciami ti songah nim tuhai hlam le a songai ummi thilri hmuahhmuah le minungte phiah tu sio seh. A hnuata ah a cianghlim midang pakhat in tidap lang tu selai miruh le mithi luang le hlanmual a daitu heh phiah tuseh. 19Cen a cianghlimmi pakhatkhat in nithumhnak nia le nisarihhnak nia ah ciami tidap in mi cianghlimlo heh phiah tuseh. Ni sarih nia ah ciami pa heh a ruang cianghlimruai tuhai a hnikpon sawp in takhlu tu selai zan lam nitla fang ian in mi cianghlim cang tuh i.
20Mi pakhatkhat mi cianghlimlo cang ai thianfaihnak tidap in takhlu hlah lekhaw ciangruaihnak ilo manin mi cianghlimlo ah cang tuh ngio i. Ciabang minung heh Bawipa ai Ponhlam ningrimtiar imanin Pathian ai minungte lakah siarcih nawn mah ih. 21Hemi dan heh a zomzet in ning hlun tuhhnak i. Cen thianfaihnak tidap a phiahtu khai a hnikpon sawp tu sio seh. Hemi tidap a daitu heh zan lam tianin mi cianghlim tuh lo i. 22Zaizai khai mi cianghlimlo ai daihnak hmuahhmuah heh cianghlim tuh lo ai aisusu khai ciami a daitu hmuahhmuah in zan lam tian mi cianghlim tuh lo i.
Currently Selected:
MIPUM SIARHNAK 19: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
