MATTHAI 28

Jesuh Tholehhnak

(Mar 16:1-10; Luk 24:1-12; Joh 20:1-10)

1Sabbath nia liam ai a thangha zing hmaniu ah Mary Magdalene le a dang Mary, hlan ril tuhin feh kawm i. 2Cia sawngpah in a roh ngai in hlinhlin i. Bawipa ai vancungmi pakhat vancung in zuktolh ai a hlan dawngkham lungtleppui thawn ai a vumah to i. 3A hmuihmel tu vantlingtleleuh bang i ai a hnikpon tu vur bangin var i. 4Hlan kiltute tu lau tlang ze manin hlawng ai mithi bangin um sio i.

5Vancungmi in nupangte hnenah, “Lau mah ih; thinglamteh vumai rekhnak Jesuh si i si ti ning ling ing 6Heta ah um lo i, a relciahnak bangin thihhnak in thoruai leh zo i. A phumhnak hmun sik tu ih,” tiin ti i. 7Rang ngai in feh tu ilai a hnuahlunte heh “Thihhnak in thoruai leh zo i; ning hmai Galilee ah feh tuhai ciata ah hmu tuh i si,” tiin rel tu ih. I relhnak tepawl hai mah ih,” tiin ti i.

8Ciamanin rang ngai in hlan in tlung kawm i; lau lawnsi, ang lawnsi, ciatihin hnuahlunte rel tuhin dawp kawm i.

9Mangrin loin Jesuh tawk kawm ai, “Jesuh in ning hnenah daphnak um tu hram seh,” tiin ti i. Jesuh hnenah kawi ai a ke awh in bia kawm i. 10Jesuh in anite hnenah, “Ning thinlau mah ih. I unaute khiah Galilee ah feh tuhin rel tu ih. Ciata ah i tawk tuh i,” tiin ti i.

Hlan Kiltute Ai Thuthanhnak

11Ciatihin nupangte a feh lakah, hlan kiltu ralkapte hrekkhat tu khuapui songah feh ai suangbawi upate hnenah hlan ai thil a canghnak hmuahhmuah rel tlang i. 12Suangbawi upate le Judah mi upate taikhawm ai thu ruat tlang i. Ralkapte heh nawhthuh tangka tampui pe ai, 13“Kin mitmu lak zan laiah a hnuahlunte kawi ai a luang ru tlang i, ti tuh i si. 14Ciami heh Mangki bawipa in a za inkhai ning lau tuh zaikhai um lo i, mawhhnak nai lo i tiin ning rel sah tuh i ing,” tiin ti tlang i.

15Hlan kiltu ralkapte in paisa lang ai a relhnak bangin bawn tlang i. Ciami thu heh Judah mite in tunnia tianin rel tlang de i.

A Hnuahlunte Hnenah Jesuh Lar I

(Mar 16:14-18; Luk 24:36-49; Joh 20:19-23; Nal 1:6-8)

16Hnuahlunte hrekkhat tu Jesuh ai ruaihnak bangin Galilee mual vumah feh tlang i.#Mat 26:32; Mar 14:28 17Amah khiah hmu ai bia tlang i, ikhalselai a hrekkhat incen sang lo i. 18Jesuh tu amahte nong ah kawi ai anite hnenah, “Lai le van ai thunaihnak hmuahhmuah heh kaimah hnenah i pe zo i. 19Ciamanin feh tu ilai miphun hmuahhmuah i hnuahlun cangruai tu ih; Pa le Fapa le Rauhla Thianghlim hming in baptisma pe tu ih.#Nal 1:8 20Cen i thupehnak hmuahhmuah hlun tuhin zirh tu ih. Hai mah ih, san a bo hlanlo ning hnenah um tuh ing,” tiin ti i.

Currently Selected:

MATTHAI 28: RZB

Highlight

Copy