MATTHAI 10

A Nalangte Hlaihnih

(Mar 3:13-19; Luk 6:12-16)

1Jesuh in a nalangte hlaihnih khiah hmun khat ah ko ai rauhla pha lo hnawt thilhnak le urhnak a phunphun cakruai thilhnak huham pe i. 2A nalangte hlaihnih ai hmingte tu, hmasaber ah Simon (Peter tihnak) le a nau Andrew; Zabedi ai fapa James le a nau John; 3Philip le Bartholomeo, Thomas le siahkhawltu Matthew, Alphaeus ai fapa James le Thaddaeus; 4Phunṭantu Simon le Jesuh a zuartu Judas Iskariot tepawl i.

A Nalangte Hlaihnih Thucahhnak

(Mar 6:7-13; Luk 9:16)

5Hemite hlaihnih tu Jesuh in hlat ai phatak niu in thucah i, “Gentile ramah feh mah ilai Samaria khua songah lut mah ih. 6Ciahnak tahin a paimi tuurual Israel mite hnenah feh tu sawn ih. 7Feh tu ilai, “Vancung ukhnak nong zo i,’ tiin rel tu ih. 8Miurte cakruai tu ih, mithite thoruai tu ih, mipharte cianghlimruai tu ilai khuasiate hnawt tusek ih. Man loin ning ngahhnak khiah man loin pe tu ve ih. 9Ning angki dip ah sui tangka ituseh, ngun tangka le dar tangka ituseh, pai mah ih. 10Ning khualtlawnhnak lampui caah rongngenhnak tuhin dip ituseh, angki hlai ituseh, kedawl le faikiang ituseh, keng mah ih. Napertu pa tu a samhnak hmuahhmuah pe in um tuh i.#1Cor 9:14; 1Tim 5:18

11Khuapui ituseh, khuatenau ituseh ning hleng fangin ang ngai in tlun inn ning hontu inn ah lut tu ilai ning feh leh hlan tian cia inn ah cam tu ih. 12Inn songah ning lut fangin ‘Ning hnenah daphnak um tu hram seh,’ tiin ti tu ih. 13Ciami inntute in tlun inn ning hon lekhaw daphnak hrang hmuifu ning pehnak heh ciami inn ah um tuseh. Ikhalselai tlun inn ning hon hlah lekhaw daphnak hmuifu ning pehnak heh lang leh tu ih. 14Cen aisu inkhai tlun inn ning hon lo ai ning thu khai ngai nuam tlang hlah lekhaw cia hmun heh zam tu ilai ning keborh thin tu ih.#Nal 13:51 15Thutak ning rel ing. Thukhanhnak nia ah Pathian in cia khua mite tahin Sodom le Gomorrah khua mite vumah ninghiohnak tam deuh nai tuh sawn i,” tiin rel i.#Sem 19:24-28; Mat 11:24#Luk 10:4-12

A Hleng Tuhlai Reemhnak

(Mar 13:9-13; Luk 21:12-17)

16Ngai tu ih! mehleng puar rual lakah tuu hlathnak bangin ning hlat ing. Ciamanin rul bangin fim tu ilai khuro bangin ning nunnem tu ih.#Luk 10:3 17Ralring tu ih, zaimantifangin ningmah ning pomtu tuhin minungte suak tuh i; zung ah ning hlenpui tuhai synagogue ah ning vit tuh i. 18Kaimah manin uktu le kumpibawite hmaiah ning hlen tuhai amahte le Gentile mite hnenah i thu hlengruaitu ning cang tuh i. 19Thukhanhnak hmunah ning hlen fangin ziang rel tuh i ing tiin le zaitin rel tuh i ing, tiin ning donhar mah ih. A can a khim fangin ning rel tuhhnak tu ning lingruai leh tuh i. 20Zaimantifangin a pongtu tuh heh ningmah ilo i si. Ning Pa ai Rauhla in ningmah hmangin pong tuh i.#Mar 13:9-11; Luk 12:11, 12; 21:12-15

21“Mi in amahte unau lala khiah rek tuhin midang kut ah hlengruai tuh i. Pate inkhai amahte fate vumah cia bang thotho in bawn tlang tuh i. Fate inkhai amahte pate ral can tuhai midang kut ah hlen tuh i.#Mar 13:12; Luk 21:16 22Kaimah hming manin mi zongzong in ning cim tuh i. Ikhalselai a tawphnak nia tian a kang bentu incen ohnak ngah tuh i.#Mat 24:9; Mar 13:13; Luk 21:17 23Khua pakhat ah ning cawh lekhaw a dang pakhat ah thawn tu ih. Fiang ngai in ning rel ing: Minung Fapa a hleng hlanah Israel ram song khua hmuahhmuah ai ning naṭuan ben man tuh lo i si.

24“Tlawngta in a saya khiah hlaih awng lo i. A bawipa tahin a lian sawn sal aisu khai um lo i.#Luk 6:40 25Ciamanin tlawngta pakhat khiah a saya tluk lekhaw lungkhim tuhhnak i; sal khai a bawipa tluk lekhaw lungkhim tuhhnak i. Innsang ai a luber khiah khuasia bawi Beelzabul tiin ko lekhaw innsang song um midangte tu cia tahin hmingsia deuh in ko tuhhnak i.#Mat 9:34; 12:24; Mar 3:22; Luk 11:15

Aisu Kih Tuh Um I?

(Luk 12:2-7)

26Ciamanin minung kih mah ih. Tunai a thuphnak heh hong tuh sio ai thuthup hmuahhmuah khai phuang leh tuh sio i.#Mar 4:22; Luk 8:17 27Khuathim lakah i relhnak heh sun khuavar ah rel leh tu ilai a thup ai ning linghnak heh innphu vuman phuang tu ih. 28Taksapum rek ben napui rauhla rek ben lotute tu kih mah ih. Taksa le rauhla a pahnih in hell songah a rekthaitu Pathian kih tu sawn ih. 29Paisa fangkhat in kawlva pahnih lai thil ilo i sim? Ikhalselai ciami kawlva pakhat rin ning Pa ai thu loin laipua lakah tlok lo i. 30Ningmah amam tu ning samfang rin siar sio i. 31Ciamanin ning thinlau mah ih. Kawlva tampui tahin ning man khung sawn i.

Mi Hmaiah Khrih Ṭanhnak

(Luk 12:8-9)

32“Mi pakhat in misenpui hmaiah i minung a ihnak khiah i ṭan ngam lekhaw vancung i Pa hmaiah amah ṭanpui tuh ve ing. 33Ikhalselai misenpui hmaiah i hnawltu heh vancung i Pa hmaiah hnawl tuh ve ing.#2Tim 2:12

Remhnak lo, Ralvang Sawn

(Luk 12:51-53; 14:26-27)

34“Laivum ah remhnak hlengruaitu tuhin kawi ing tiin i ruat mah ih. Remhnak bawn tuhin kawi lo ing, ralvang awh in kawi sawn ing. 35Pa le fapa, nu le fanu, ni le a monu, #10:35 Hemi ‘monu’ tihnak tu ‘fapa ai nupui’ tihnak i ai a ni le a rang in a kohnak i. ral dun tuhin kawi ing.#Mic 7:6 36Mi pakhat ai a kihkulber ral heh amah ai innsang mi i tuh i.

37Aisu khai ituseh, kaimah tahin a nu le a pa a it sawntu heh i hluntu tuhin tlak lo i. Kaimah tahin a fanu ituseh, a fapa ituseh, daih sawn lekhaw i hluntu tuhin tlak lo i. 38Aisu khai ituseh, amah thinglamteh phur kongin i hnua i hlun lotu khiah i minung cang tuhin tlak lo i.#Mat 16:24; Mar 8:34; Luk 9:23 39Amah ai nunhnak hup a tumtu heh a nunhnak sung tuh i, ikhalselai kaimah manin a nunhnak a liamtu heh a nunhnak hup ngah tuh i.#Mat 16:25; Mar 8:35; Luk 9:24; 17:33; Joh 12:25

Phatman Ngah Tuh I

(Mar 9:41)

40Ningmah tlun inn ning hontu heh kaimah tlun inn i hontu ve i; kaimah tlun inn i hontu in i hlattu khai hon ve i.#Mar 9:37; Luk 9:48; 10:16; Joh 13:20 41Pathian thureltu tlun inn a hontu heh Pathian thu phurtu tlun inn a hon manin a thurelhnak phatman zarto tuh ve i. Mi pha pakhat tu mi pha a imanin tlun inn a hontu heh cia mipha pa ai phatman hlawm tuh ve i. 42Fiang ngai in ning rel ing; i hnuahlunte lakah a nauta ber heh i hnuahluntu a imanin tidap khuat khat a petu khiah phatman ngah tuh tengteng i,” tiin ti i.

Currently Selected:

MATTHAI 10: RZB

Highlight

Copy