JEREMIAH 17
17
Judah Sualhnak Le Cawhkuan
1 Bawipa in, “Aw Judah mite, ning sualhnak heh thirzum in ngan i; ning thinlung vumah lungvar san hliang in ngan ai ning puleng ning ah khen i. 2Ning minungte in khuazingnu Asherah caah bawnhnak hampalak tlangsang vumah le tlangniam vum ahkhai, thinghing hmuahhmuah hnia ahkhai puleng ning dawlhnak le, 3Khuam thianghlim ning birhnak cangcang ah khuavang bia tlang i. Ning ram songai sual ning bawnhnak manin ning thilri le ning sumsaw suttu tuhin ning ralte hlat tuh ing. 4I pehnak ning ram tu hlum tuhai midang kut ah ap kul tuh i si. Ning ling awng lohnak ram songah ning ralte ruaih tuh i si; zaimantifangin i thinrawhnak tu mai bangtluk i ai kumzangza in ko tuh i,” ti i.
5 Bawipa in,
“Kaimah hnenin tlan ai
minung rinsantu,
minung hathnak menma
a rinsantu heh,
Kaimah in hnawl tuh ing.
6Amah tu nelrawn ai
a pohnak hampabur bang i;
Ramcar le ram khing,
laipua alhnak ram,
Zaikhai a po thil lohnak ai
hampabur bang i.
A hnenah thilpha zaikhai
hleng awng lo i.
Bawipa Ai Ponghnak A Phuncang
7“Ikhalselai kaimah i rinsantu,
Bawipa ah rinsanhnak
a naitu heh,
hmuifu pe tuh ing.
8Runpui hiangai a pohnak thingkung,
a hamah ti a hlenghnak thingkung
bang i tuh i.#Saam 1:3
Khuakhal can nisa khai kih lo i,
A hnah hing ngiode i.
Ruahsi lo inkhai thinlau lo i,
A thai nai ṭio i.
9“Minung ai thinlung tu aisu in
ling thil tuh i?
Zaidang tahin mizawl hmang ber i;
Cakruai tuhin har ngai i,
a urhnak a roh ze i!
10Kaimah Bawipa in mihing ai
thinlung tu hmu ai amahte
songlam thil cu ing.
Mi zongzong amahte nundan in sik ai,
Amahte bawnhnak bangin
rulthun ve ing,” ti i.#Saam 62:12; Thup 2:23
11A dik loin tangka a khawl betbotu
minung tu,
Mah ti lo ti a optu vaniu bang i.
A sanpha laitak ah a lianhnak sung tuh i.
A tawphnak ahcen zaikhai ilo
mivoi ah cang i.
12I Biakinnpui heh kumpibawi
tohkham songlawi bang i;
A hampan in tlangsang vumah ding i.
13Aw Bawipa, nang tu
Israel ai umlamhnak isi.
Nangmah na hnawltu heh mualpho tuh i.
Runsiat vumai hming nganhnak
bangin pairal tuh i;
Nunhnak tithiang Bawipa
nangmah na hnawl tlang manin.
Jeremiah In Bawipa Bawmhnak Ngen I
14Aw Bawipa, i cakruai tulai, i cak tuh rori i; i o tulai i him tuh taktak i. I thangphathnak tu nangmah ian i si. 15Mipui in kaimah hnenah, “Bawipa ai kin hring le lauruaihnak ponkam tu akonah i? Khimruai tu ngaingai seh,” ti tlang i. 16Ikhalselai aw Bawipa, amahte vumah harsahnak hlengruai tuhin na forh awng lo ing. Harsahnak amahte tawkhnak heh i daihhnak ilo i. Aw Bawipa, ciami tu na linghnak i, i ponghnak khai ling hlen isi. 17Kaimah caah a kihkul cang hram malaw; harsahnak a hleng fangin nang tu i himhnak isi. 18I reemtute vumah zakthihnak hlengruai tu; ikhalselai kai tu i luatruai tu hram. Anite vumah bawngsiahnak hlengruai tulai anite tu khoiruai tusek.
Sabbath Nia Uldan
19 Bawipa in i hnenah, “Jeremiah, Mipui Kotka tihnak Judah kumpibawite khua songai a lut a suakhnak ah feh tulai kaimah thu phuang tu; cia hnuaah Jerusalem kotka dang ahkhai feh tu. 20Kumpibawite le Judah mite hmuahhmuah le Jerusalem khuasong mi kotka ai a suak a luttute khiah hemi i thurelhnak ngai tlang tuhin rel tu. 21Amahte nunhnak pamhmaih lekhaw Sabbath nia ah thilphur maseh; Jerusalem kotka in zaibang thil khai lutpui maseh.#Neh 13:15-22 22Amahte inn in Sabbath nia ah zaikhai suahpui tlang maseh. Sabbath nia ah naper maseh. Amahte pupate hnenah thu i peciahnak bangin Sabbath nia tu nizarh i ai ul tlang tuseh.#Luat 20:8-10; Danp 5:12-14 23Amahte pupate in i thu ngai tlang lo ai poi tlang lo i. Lungruh ai kaimah thu hlun tlang lo i, zir nuam fawn lo i.
24I thupehnak hlun tuh hrimhrim in misenpui rel tu. Hemi khua songah zaibang thil khai phur in Sabbath nia ah lutpui tuh lo i. Sabbath nia tu nizarh imanin ul tuhai zaibang naper khai per maseh. 25Ciatihin bawn lekhaw kumpibawi le a bawite tu Jerusalem kotka ah lut tuhai kumpibawi David bangin huham nai tlang tuh ve i. Judah mi le Jerusalem mite thawn hmunkhat ah amahte siphuh le siphuhlengte vumah to tuhai Jerusalem khuapui songah minung dim tuh ṭiode i.
26Judah khuate in le Jerusalem hiangai khuatenaute in mi tampui kawi tlang tuh i; Benjamin ram, tlangham ramte, tlang vum ram le Judah ram hlang lam inkhai kawi tlang tuh i. Kaimah Biakinn songah maitai hibawlhnak le hibawlhnak dangdang, sangvut hibawlhnak le rimhmuite, anghnak ca ai pehnak khai koih tuh i. 27Ikhalselai i thu hlun ai Sabbath nia tu nizarh imanin ul kul i. Hemi nia ah Jerusalem kotka songin zaibang thil khai phur tlang tuh lo i. Jerusalem kumpibawi innte khai mai in kang tuhai a phalbentu aisu khai um tuh lo i,” tiin ti i.
Currently Selected:
JEREMIAH 17: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
