ISAIAH 65
65
Ralthotute Bawipa In Cawh I
1 Bawipa in, “I minungte ai sawngenhnak sawn tuhin ralring dun napui anite in sawngen tlang lo i! Amahte tawk tuhin ralring napui anite incen i tawk tuh khai tum tlang lo i! I hnenah saw a ngen lomi miphun hnenah, ‘Heta ah um ing, na bawm tuh ing,’ tiin sawn tuhin ralring napui i hnenah sawngen tlang tau lo i!#Rom 10:20 2Thilsual lek lungruh ngai ai a bawntu le amahte daihhnak lek a hluntute hnenah catloin i kut san ing.#Rom 10:21 3Zakthi rin thiam loin thin i rawruai ṭiode i. Vuan song cawlum hmunah lawki hibawlhnak sel ai lawki puleng vumah rimhmui tai tlang i. 4Zan khing ah mithi rauhla tawk tuhin khukua le hlanmual ah feh i. Hemite in voksa ai ai lawki mite ai hibawlhnak sa tihang ding tlang i. 5Ikhalselai midang hnenah, ‘Kin khing mah ih, mi thianghlim i ing,’ ti tlang i. Hemi bang minungte tu or cawk tuh ilo i; amahte vumai i thinrawhnak tu a dit awng kel lohnak mai bang i.
6“Amahte cawh tuhin ruatcat zo ai i thukhanhnak tu ngan ciazo ing. Amahte thil bawnhnak tu pakhat khai pelh loin hmu tuh sio ai, 7anite sualman le a pipute ai sualman co tuh i. Lawkite in tlang vumai dawlhnak puleng vumah rimhmui tai tlang ai thang i siat i. Ciamanin anite tu hlanai a bawnhnak bangin cawh tuh ing,” tiin ti i.
8 Bawipa in, “Aisu inkhai cabit thai pha heh siatsuah awng lo i; cabit thai pha in cabitti bawn sawn i. Ciatih bangin i minungte tu siatsuah tuh sek lo ing; Kaimah i ruaihtute tu hup tuh ing. 9Judah hin Israel mite tu hmuifu pe tuhai a tesinfate in tlang vum ram tu khur tlang tuh i. Ciata ah i rilhnak le i ruaihtute tu um tuh i. 10Kaimah i bia tuhin amahte tuu le kawlpawte tu tlimniu umhnak ram nitlak lamah Sharon phairawn, nisuah lamah Harsahnak phairawn tihnak ah hlat tlang tuh i.#Jos 7:24-26
11Ikhalselai kaimah i zangtaktu, i mual cianghlim Zion hnawl ai bawngphahnak khuavang Gad le bawngsiahnak khuavang Meni a biatu ningmah ca ahcen ciabang i tuh lo i. 12Na ko fangin i sawn lo ai ning hnenah i pong fangin i ngai lo manin sarthih lekin ning thi tuh i. I thu el le a pha lo bawn heh ningmah ai rilhnak i. 13Ciamanin ning rel ing; Kaimah i biatu le i thu a hluntute tu aih tuh le bar tuh tampui nai tuh ngiode i; ikhalselai ning tu ri ning kam tuhai ti ning hal tuh i. Anite tu lungawi tuh i; ikhalselai ning tu zakthi le hmaisia in um tlang tuh i si. 14Anite tu thinnuam in la sa tlang tuh i; ikhalselai ning tu ning thinlung khoi in kap tlang tuh i si. 15I rilhnak minungte in ning hming tu cukcamhnak ah hmang tlang tuh i. Bawipa Kaimah rori in ning thiruai tuh ing. Ikhalselai i thu i hluntute tu hmingthar pe tuh ing. 16Hemi ram songai a ummi hmuifu i ngentu hmuahhmuah in rinsantlak Pathian ai hmuifu ngen tlang tuh i. Cukcam in thukhamhnak a bawntu hmuahhmuah in rinsantlak Pathian hming in bawn tuh i. A liam sa can ai harsahnak tepawl tu bo tuhai hai tuh sio ihang,” tiin ti i.
Lai Thar Le Van Thar
17 Bawipa in, “Sik tucuk ih! lai thar le van thar a bawn lak thliahthlo ing. A liam sa thilte tu hai tuh sio i.#Isa 66:22; 2Pet 3:13; Thup 21:1 18Kin semtharhnak vumah lungawi aipuang in um tu ih. I bawnhnak Jerusalem thar cenin anghnak in dim tuhai a khuasong mite tu thinnuam tlang tuh ngaingai i. 19Jerusalem khua le i minungte manin kaimah khai lung i awi tuh i. Ciata ah tu kaphnak um tuh lo i; bawmhnak ngen khai um tuh nawn lo i.#Thup 21:4 20Nauniu thi khai um tuh lo ai aisu khai amahte san khim in nung tuh i. Kum zakhat a khimtute tu mino i tuh i. Cia hlanah thi lekhaw kaimah in cawh ing, ti hnikhnaihhnak i tuh i. 21-22Inn sa tlang tuhai a songah um tuh i; amahte sahnak inn tu aisu inkhai khur sah tuh lo i. Cabit kung bir tuhai cabitti ding tlang tuh i; midang aisu inkhai ding sah tuh lo i. Thingkung bangin i minungte tu san sau tlang tuh i. Amahte perhnak thai tu a khim ngai in ai tlang tuh i. 23Amahte naperhnak ah hlawhtlinghnak nai tuhai a tesinfate tu siatsuahhnak tawk tuh lo i. Amahte le a fate tu santong tianin hmuifu pe tuh ing. 24I hnenah sawngen a ben hlanah rin amahte sawngenhnak sawn tuh ing. 25Mehleng le tuufa niute tu hmunkhat ah rong ai tlang tuhai kawlpaw bangin chintit in hampa ro ai tuh i. Rul khai a kihkul i tuh nawn lo i. Aw Zion, i mual cianghlim, ciata ah zaikhai a kihkul le thilpha lo um tuh nawn lo i,” tiin ti i.#Isa 11:6-9
Currently Selected:
ISAIAH 65: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
