HEBRU 3

Moses Tahin Lian Sawn I

1Pathian ai ko ve mi Khristian u le naute, kin sanghnak hrang Suangbawi Sang tuhin Pathian ai hlatmi Jesuh thu heh ruat tu ih!

2Moses tu Pathian inn song naper ah rintlak a i bangin Jesuh khai napertu tuhin a riltu Pathian hnenah rinsantlak i.#Mip 12:7

3Inn satu in a sahnak inn tahin upathnak tam sawn ngah i. Ciatih bangin Jesuh khai Moses tahin upathnak tam sawn ngah phu i.

4Inn hmuahhmuah mi pakhatkhat in sahnak i; ikhalselai zaizongza a satu heh Pathian i.

5Moses tu Pathian naruaihtu a i bangin Pathian innsang songah rintlak cengfa i ai Pathian in hmai lam can ah a rel leh tuhhnak khai rel thil i.

6Ikhalselai Jesuh tu Pathian innsang ah hotu rinsantlak Pathian Fapa i. Kinmah ai umlamhnak tu thinlung kho ngai le ralpha ngai in pom lesingkhaw a innsang ising.

7Ciamanin Rauhla Thianghlim in,

“Tunnia Pathian aw za le i sikhaw,

8Ning lung ruh mah ih,

ning pupate Pathian engsan ai

um awng bangin um mah ih;

Hampalak ai Pathian cu tlang

awng bangin um mah ih.

9Pathian in, ‘Khiata ah

ning pupate in i engsan ai

i cu tlang awng i; kum sawmli

song amahte caah

i bawnhnak hmu tlang napui i,’

tiin ti i.

10Ciamanin amahte vumah

thin i raw ai, ‘Anite tu

rintlak lo ngiode i,’

tiin ti i.

I thupehnak hlun nuam tlang lo i,’

tiin ti i.

11Thin i raw ai, ‘Amahte

cawlum tuhhnak hrangah

i tihnak ram heh hleng tuh

hrimhrim lo i,

tiin thukham ing, tiin ti awng i,” #Saam 95:7-11

tiin ti i.

12Sangtu u le naute, a nungmi Pathian hlum nuam khop tianin a pha lomi le sang lohnak thinlung ning nai tuh loin ralring tu ih.

13Ciahnak tahin sualhnak in ning zawl tuh loin le ning lungruh tuh loin Lai Thianghlim in, “Tunnia,” a tihnak pongfang heh kin caah sullam a nai songah, nisiar in pakhat le pakhat bawm dun tu sawn ih.

14Zaimantifangin a hampan in kin co awnghnak hlamuanghnak heh a tawp tian kho ngai in pom lesingkhaw kin veksen in Khrih ai rualpui kin cang tuh i.

15Lai Thianghlim, “Tunnia ah,

Pathian aw za le i sikhaw,

ning pupate in Pathian engsan

awng bangin ning lungruh

mah ih,” ti i.#Saam 95:7-8

16Aisu in Pathian aw za ai a tawngtu i? Egypt ram in Moses in a hoisuak mite i.#Mip 14:1-35 17Aisu vumah Pathian heh kum sawmli song a thinraw i cang ta? Nelrawn ramkhing lakah sual ai a thi mite vumah i. 18Pathian in thukham in, “Amahte cawlumhnak tuhin i tihnak ram heh hleng tlang tuh hrimhrim lo i,” a ti fangin a ti nuam sanmi tu aisute i cang ta? Amah Pathian tawngcaitute i. 19Ciatih ilekhaw a thukhamhnak ram songah anite lut thil lohnak tu sang awng lo manin i, ti hmu thil ising.

Currently Selected:

HEBRU 3: RZB

Highlight

Copy

Compare