SEMPANHNAK 41

Joseph In Pharoah Ai Mang Lethnak

1Kum hnih a khim hnua fangin Pharoah in mang man ai a mang ah Nile runpui kamah ding ai, 2Nile runpui songin kawlpawpuite a thau ngai le a mom ngai lu sarih suak ai hampa dawnniu ai tlang murhmo khiah hmu i. 3Cia hnuaah, kawlpawpuite lu sarih, a rom kengkeraw le a sia bikraw, runpui songin suak ai, a hlanai kawlpawpui thau lu sarih hiang varkam ah ding tlang i. 4Ciafangin a rommi kawlpawpuite lu sarih in a thaumi kawlpawpuite lu sarih heh ai tlang sek i. Cen Pharoah khiah phawk i. 5Cia hnuaah mitmu lehthio ai mang man lala i. A mang ah fangcang kung khat ah a vui pha bik le a hmin pha bik fangvuite vui sarih hmu i. 6Cen nelrawn hlivua ai nuaidekhnak le a hnawmtam a taw bial fangvuite vui sarih suak tlang ve i. 7Cen a hnawmtam fangvuite in a bor ngai fangvuite vui sarih heh thon tlang sek i. Cen Pharoah tu phawk ai a mang i ti khiah ling i. 8A thangha zing fangin tu a donhar ai Egypt ram songai mipolte le mifimte hmuahhmuah ko liang i. A mang rel khalselai a mang let sah thiamtu aisu khai um lo i.#Dan 2:2

9Ciafangin cabitti petu pa in Pharoah hnenah, “Bawipa, i mawhdan heh tunnia ah phuang tuh ing. 10Na napertute vumah na thinraw manin sangbawn hotu pa le kaimah heh kumpibawi innkiltute hotu bawi ai inn ah thawng kin toh awng isi. 11Zankhat ah kin pahnih in mang man kawm veve i ing. Kin mang a sullam nai veve man kawm i ing. 12Cialai ah Hebrew tlangval pakhat kumpibawi innkiltu bawi ai hnenum pa khai kinmah hnenah um ve ai kin mangte heh amah rel kawm i ing. Kin mang kin let sah ai a sullam kin rel awng i. 13Cen a relhnak bang rori in khim sio i; kai in i naper kel per leh ai sang bawn hotupa tu rek awng peu lio isi,” tiin ti i.

14Ciafangin Pharoah in Joseph khiah ko ai a rang ngai in thawnginn in suah i. Joseph tu a khahmul met hnuaah a hnikpon a thleng ben fangin Pharoah hmaiah kawi i. 15Pharoah in, “Mangman ing ai aisu inkhai let thiam lo i. Nang tu mi in a mang na relhnak fiang ngai in let thiam i tiin i rel i,” tiin ti i. 16Joseph in, kaimah ai tithilhnak ilo i; Pathian ian in fiang ngai in na rel thil tuh i,” tiin ti i. 17Ciafangin Pharoah in, “I mang ah Nile runpui varkam ah ding ai, 18ti songin kawlpawpuite a thau ngai le a mom ngai lu sarih suak tlang ai hampa dawnniu ai tlang murhmo i. 19Cia hnuaah kawlpawpuite a dang lu sarih, a rom kengkeraw a ruh lek tang, ti duldo in suak tlang i. Egypt ram songah ciabang kawlpawpuite ngelcel hmu awng kel lo ing. 20Cen a rommi kawlpawpuite in a thaumi kawlpawpuite lu sarih heh ai tlang sek i. 21Ikhalselai a ai ben hnuaah aisu inkhai a thaumi kawlpawpuite lu sarih ai sek i, tiin ling thil tuh cuang lo i; a hlan kel in rom kengkeraw thotho i. Ciafangin i phawk i. 22Cen mang man lala ai i mang ah fangcang kung khat in fangvuite vui sarih, a vui pha le a hmin pha suak tlang i. 23Cia hnuaah nelrawn hlivua ai nuaidekhnak le a vaihi a hnawmtam fangvuite vui sarih suak tlang i. 24Cen fangvui a hnawm pawl in fangvui a pha pawl fangvuite vui sarih khiah thon sek i. I mang tu mipolte rel napui i let sah thiamtu pakhat khai um lo i,” tiin ti i.

25Ciafangin Joseph in Pharoah hnenah, “Na mangte pahnih ai a sullam tu a bangvek i; Pathian in a bawn tumhnak na lingruai i. 26A thaumi kawlpawpuite lu sarih tu kum sarih tica i ai a vui pha fangvuite vui sarih khai kum sarih tica thotho i. A sullam a hmunkhat i. 27Hnuata ai a suaktu a hnawmtam kawlpawpuite lu sarih le nelrawn hlivua ai nuaihnak dekdo a vaihi a hnawmtam fangvuite vui sarih khai rian kumte kum sarih tica i. 28I rel cia bangin Pathian in a bawntumhnak na hmuh i. 29Egypt ram song hmuahhmuah ah rong zanzai kum, kum sarih um tuh i. 30Cia hnuaah rian kumte kum sarih tlung tuhai Egypt ram songai rong zanzai kum hmuahhmuah heh hai leh tuh sek i. Rian manin Egypt ram heh hnawm tuh sek i. 31Rong zanzai can heh aisu inkhai hih tuh nawn lo i. Zaimantifangin a hnuata ai a tlung tuhhnak rian heh roh tuh ze i. 32Mang vel hnih rori na manhnak heh Pathian in he thu tu relcat zo ai a rai hlanah hleng tuh i tica i.

33Ciamanin tunin mi pakhat, khuaruatthiam le mifim ril tulai, Egypt ram pumpuhluk ṭuanvo langtu tuhin dah tu. 34Ram songai napertu tuhin hotute khai dah tulai, rong zanzai kumte kum sarih songai naihnak rong songin seu nga ah seu khat khawlruai tu. 35Hemi rong hmuahhmuah heh a hleng tuhlai rong zan kum songah khawm tuseh. Nangmah thu in naper tuhai khuapui cangcang ah rong khawl tuhai kil tuseh. 36Ciami rong heh rian kum sarih a tlung fangin Egypt ram song minungte thi tuh sek lohnak hrangah a khawl sa cang tuh i,” tiin ti i.

Joseph Tu Egypt Ram Uktu Ah Cang I

37Joseph ai thurelhnak tu Pharoah le a tlangsuakte in lungkhim tlang lawmlam ai, 38Pharoah in, “He pa bang Pathian rauhla thianghlim ai umpuihnak midang akonah hmu tuh ising?” tiin ti i. 39Cen Pharoah in Joseph hnenah, “Pathian in he thil hmuahhmuah heh na hmuh manin nangmah tahin thil a lingthiam sawn le a fim sawn aisu khai um lo i. 40Ciamanin nangmah heh i ram siktu ah na bawn tuhai i minungte in na thu ngai tuh i. Kumpibawi ihnak ian in na hlaih tuh ing,” tiin ti i.#Nal 7:10 41Tunai panin Egypt ram pumpuhluk uktu bawi ah na bawn zo ing,” tiin ti i. 42Ciaben fangin Pharoah in kumpibawi hmingkhenhnak a kutruk hawk ai Joseph kutzung ah ruk i; a mawi le a mankhung hnikpon in thuam ai suikhi a hawng ah orhruai i.#Dan 2:29 43Kumpibawi tohnak sontu siphuhleng#41:43 siphuhleng tihnak tu kin Zanniat mite in saileng a titu kin um ai siphuh heh sai a titu kin um i. ah toruai ai amah kiltu ralkapte in a hmaiah, “Ning lu ut tu ih,” tiin au tlang hluahhlo i. Ciatihin Egypt ram pumpuhluk uktu bawi ah Joseph khiah cang ihang. 44Cen Pharoah in Joseph hnenah, “Kai tu kumpibawi ing; ikhalselai nangmah ai thu loin Egypt ram songah aisu inkhai amahte kutke mer thil tuh lo i,” tiin ti i. 45Cen Joseph tu Zaphenath Paneah tiin Egypt hming bawt i. Heliopolis khua ai suangbawi Potiphera ai fanu Asenath heh a nupui tuhin hoi sah i.

46Joseph tu Egypt kumpibawi Pharoah ai naper a pan fangin a kum sawmthum i. Feh ai Egypt ram a ning le a tong tianin tlawng i.#41:46 Feh ai Egypt ram a ning le a tong tianin tlawng tihnak tu Joseph tu Egypt ram pumpuhluk ai thunaitu ah cang i tikhai i thai i. 47Rongzan kum, kum sarih songah rong heh ai cawk lo in nai tlang i. 48Rongzan kum, kum sarih song rong tampui a nai song hmuahhmuah Joseph in Egypt ram songai rongte khiah khawm diamdo ai khuapui cangcang ah khawl i. Khua hiang cingkim ai lo rongte heh ciami khua songah khawi sio i. 49Rong a khawlhnak tam ze manin tipuithuanthum runsiat bang ngal i. A rong khawlhnak a tam ze hang manin teh khai teh lo ihang; zaimantifangin teh cawk tuh rual ilo i.

50Rian kum a hleng hlanah Joseph tu, Heliopolis khua suangbawi Potiphera ai fanu, a nupui Asenath in fapate pahnih nai sah zo i. 51Joseph in, “I rimsuhnak hmuahhmuah le i pa ai innsang thu khai Pathian in i hairuai zo i,” ti ai a fapa hmasa heh a hming Manasseh#41:51 Manasseh tihnak tu Hebrew in i hairuai i tihnak thawn a awsuah bang dun i. tiin bawn i. 52Cen, “Harsa i tawkhnak ramah Pathian in fate i pe i,” ti ai a fapa pahnihhnak hming ah Epharaim#41:52 Epharaim tihnak tu Hebrew in fa i pe i tihnak thawn a awsuah bang dun i. bawn i.

53Egypt ram songai rongzan kum, kum sarih bo ai, 54Joseph ai a rel cia zo bangin rian kum hleng ngaingai i. Egypt ram lek ilo in ram dang hmuahhmuah ahkhai rian tlung ve i; ikhalselai Egypt ram songah cenin khuahacang ah rong um i.#Nal 7:11 55Egypt ram song hmuahhmuah ah rian a tlung fangin ram song mite in Pharoah hnenah rong ngen tlang murhmo i. Ciafangin Pharoah in, “Joseph hnenah feh tu ilai a ruaihnak bangin bawn tu ih,” tiin ti i.#Joh 2:5 56Egypt ram songah rian tlung roh ze ai ramsong mite rikam in a um fangin Joseph in rong khawihnak inn puipui khiah hong ai rong heh Egypt mite hnenah zuarh diamdo i. 57Laivum hmuahhmuah ah rian a roh ze in tlung ve manin mi zongzong pursum tuhin Egypt ram Joseph hnenah hleng tlang murhmo i.

Currently Selected:

SEMPANHNAK 41: RZB

Highlight

Copy