EZEKIEL 36

Israel Vumah Pathian Ai Hmuifu

1 Bawipa in, “Minungpa, Israel tlangsangte hnenah thurel tulai Cungnungber Bawipa kaimah in anite hnenah i relhnak thu heh ngai tuhin rel tu. 2Israel ai ralte in, ‘Khiami hlanlai mualtlangta tu kinmah ai cang zo i,’ tiin tluangkhawng i.

3“Prophet ponkam in phuangsuak tulai Cungnungber Bawipa kaimah ai i relhnak heh than tu. A hiangai ramte an Israel tlang vum ramte lang ai a sim fangin mi zongzong in Israel hnihsan tlang i. 4Ciamanin Cungnungber Bawipa kaimah in a hiangai ramte an sim ai hnihsanhnak thliahthlo ningmah tlangsang le tlangniamte, rawnti niu le phairawnte, hmunrop ai cangruaihnak hmunte, zamhnak khuate hnenah i relhnak heh ngai tu ih:

5“Cungnungber Bawipa kaimah in i thinsa in a hiangai ramte, a hlaice in Edom ram vumah rel zo ing. Hni hiangho le nautathnak thawn i ram lang ai hmun nuam pawl khur sio i.

6“Ciamanin Israel ram hnenah prophet ponkam in rel tu. A dang miphunte in zohsuam ai mualphotiar manin Cungnungber Bawipa kaimah in a hahnak le thinrawhnak thawn i relhnak heh Israel tlangsang le tlangniamte, rawnti niu le phairawnte hnenah rel tu. 7Cungnungber Bawipa kaimah in cukcam in thukham ing: A hiangai ramte tu zakthi le mualpho in um tuh i. 8Ikhalselai ning tlangsang vumah thingkungte ai hnah tu mem leh tuhai i minung Israel ningmah caah thai tuh i. Ning inn ah tlung cing tuh i si. 9Ningmah lamah ṭang tuhai ning ram tu a selhnak le hlaici cinghnak ramah cangruai tuh rori ing. 10Ning minung khai pungzairuai tuh ing. Khuapui songah um tlang tuhai hnawmcan cia tepawl tu remm leh tuh betbo i si. 11Minung ituseh, sumhnam ituseh pungzairuai tuh ing. A hlan tahin minung ning tam deuh tuhai fate khai tampui nai tuh i si. A hlanai ning um awng bangin ciata ah um tlang tuhai tunhlan tahin mi khangso ah ning bawn tuh ing. Ciatihin Bawipa ing ti khiah i ling tuh i si. 12I minung Israel mite tu ning hoi leh tuhai ram songah ning umruai tuh ing. Ningmah ram cang tuhai ning tesinfate khai rikam in um tuh lo i.

13“Cungnungber Bawipa kaimah in rel ing: Mi in he ram tu a minung a aitu le amah ai ramsong fa lala a rutu ram i, tiin ti tlang ngaingai i. 14Ikhalselai tunai panin misa aitu le mah ai fate a rutu i tuh nawn lo i. Cungnungber Bawipa in rel zo ing. 15Anite hnihsarelhnak in a hmangtu le a hnihsantu thliahthlo miphunte ai thu tu he ram an ngai tuh nawn lo i. Hemi ram an a miphun ai fate khai ru tuh nawn lo i. Bawipa kaimah in rel zo ing,” ti i

Israel Ai Nun Thar

16 Bawipa in i hnenah, 17“Minungpa, Israel mite a ram songah um awng laiah a nuncan le a bawnhnak in a ram ningrimtiar i. Nupang tu hlasiar thi a nai lakah mi cianghlimlo in ruat a i bangin a nuncan heh i hmaiah mi cianghlimlo i. 18A ram songah mi thisan luangruai ai milimte bia in a ram ningrimtiar manin i thinrawhnak tu a roh ngai in amahte vumah burh ing. 19A nuncan le a bawnhnak manin hnawl ai ram dangdang ah piakruai sio ing. 20Amahte ram cangcang ah mi in, ‘A Pathian ai pehnak ram hlum i,’ ti manin i hming thianghlim thangsiat i. 21Israel mite in a fehhnak ram cangcang ah thang i siat manin i hming thianghlim pam i hmaih i.

22“Tun in Cungnungber Bawipa kaimah in anite hnenah i rel nuamhnak thu tu Israel mite hnenah rel tu: Thil i bawn tuhhnak tu Israel ningmah i ruat sah manin ilo i, ning fehhnak ram cangcang ah i hming thianghlim thangsiat tlang ai ciami i hming thianghlim heh pam i hmaih sawn manin i. 23Miphunte lakah i hming khiah thangsiat i si. Ciamite lakah a thawmlian i hming ai a thianghlim zia i larruai fangin Bawipa ing ti khiah i ling tuh i. Cungnungber Bawipa kaimah in rel zo ing. Miphunte hnenai i hming thianghlimhnak larruaitu tuhin ningmah ning hmang tuh ing. 24Miphun cang le ram cangcang in ning lang tuhai ningmah ai ramah ning letpui tuh ing. 25Ti cianghlim ning phiah tuhai milim biahnak hmuahhmuah le ning ningrimtiartu hmuahhmuah khai cianghlimruai tuh ing. 26Thinlung thar le nunhnak thar ning pe tuh ing. Lungto bangin a hak ngai ning thinlung heh lang tuhai thinlung nemniu ning pe tuh ing. 27Ning songah i rauhla khum tuhai i dante le i thupehnakte hlun ben tuh i si. 28Ciatihin ning pupate hnenai i pe awnghnak ram songah um tuh i si. Ning tu i minung i tuhai kai tu ning Pathian i tuh ing.#Ezk 11:19-20 29Ning ningrimtiartu hmuahhmuah in ning o tuh ing. Ning rong pungzairuai tuhai ciatihin rian tlung tawk tuh nawn lo i si. 30Ning thingthai le ning lo rong pungruai tuhai ciatihin rian tawk loin miphunte lakah zak ning thi tuh nawn lo i. 31Ning nuncan pha lo le thilsual ning bawnhnak tepawl ling leh tuhai ning sualhnak le ning mawhhnak manin ningmah le ningmah ningdul dun tuh i si. 32Israel mite, zaizongza i bawnhnak heh ningmah ning ruat sah man ilo i, ti khiah ning ling tuhin i daih i. Thil ning bawnhnak manin zakthi le mualpho in um tu ih. Cungnungber Bawipa kaimah in rel zo ing,” ti i. 33Cungnungber Bawipa in, “Ning sualhnak hmuahhmuah i cianghlimruai fangin ning khua songah um leh tuhai a hnawmhnak tepawl tu saleh tuh i si. 34Ning lo hiangai a vaktu hmuahhmuah in ning lote hampa in dim ai hampa bu bial khiah hmu sio i; ikhalselai ning lote tu ning vairuai leh tuh ing. 35Ramkhing ai a cangciahnak ram tu Eden vuan bangin a cang leh khiah mi zongzong in hmu tuh i; balciahnak, rokciahnak le khuarop ai a cangciahnak khuate tu khur leh in vingpui in kulh leh siohnak khiah hmu tuh i. 36A luatsun ramhnente in he khuate a dinlehtu le ramkhingte songai rong a cinglehtu heh Bawipa kaimah ing ti khiah i ling tuh i. Ciabang bawn tuh ing tiin thukhamtu heh Bawipa kaimah ing ai bawn tuh rori ing,” ti i.

37Cungnungber Bawipa in, “Israel mite tu bawmhnak i ngentu miphun ah bawn leh tuhai tuurual bangin pungzairuai tuh ing. 38Jerusalem khuapui tu puai can ai hibawlhnak tuute in a dim bangin tunai khuarop ai a canghnak khuate tu minung in dimruai tuh ing. Ciatihin Bawipa ing ti khiah i ling tuh i,” ti i.

Currently Selected:

EZEKIEL 36: RZB

Highlight

Copy