LUATSUAKHNAK 37
37
Thutiam Kuang Bawn Tlang I
(Luat 25:10-22)
1Bezalel in Thutiam Kuang heh lawithing in bawn ai dong hnih le hrek sau i, dong khat le hrek kau ai dong khat le hrek sang i. 2A songlam ituseh a pualam ituseh sui ciang in khut ai a cingkim heh sui in velh i. 3Suikualte pali bawn ai khat lamah pahnih veve in a kete pali ah mun i. 4Lawithing in laangte pali bawn ai sui in khut i. 5Thutiam Kuang ai a laangte tu khat lam veve ai suikual songah rolh i. 6Thingkuang sin heh sui ciang in bawn ai dong hnih le hrek sau ai dong khat le hrek kau i. 7A sin ai khat lam le khat lam hmur veve ah Cherub tihnak ramsa limte pahnih sui in bawn ai, 8hmur khat ah pakhat veve ah dah i. A tumce in ilo in a sin thawn peh dun sio i. 9Cherub tihnak ramsa limte in a vumah a ko pharh ai kuangsin heh a ko in hup kawm i. Hmaihoih dun in kuangsin sik kawm i.
Selhnak Sang Hrang Cabuai
(Luat 25:23-30)
10Bezalel in lawithing in cabuai bawn ai, dong hnih sau, dong khat kau, dong khat le hrek sang i. 11Sui ciang in khut ai a cingkim heh sui in khap i. 12A tlangkhap heh zung li kau in bawn ai a cingkim khiah sui thotho in khap i. 13Suikualte pali bawn ai a ke hiang cabuai ningli ah bet i. 14Ciami suikualte pali tu cabuai laang a pomtu imanin cabuai tlangkhap ri ah mun i. 15A laangte tu lawithing in bawn ai sui in khut i. 16Cabuai vumah dinti hibawlhnak hrang pakan, keu, khuat le hlengte tu sui lekin bawn i.
Maivarhnak Khuam Bawn I
(Luat 25:31-40)
17Bezalel in maivarhnak khuam heh sui ciang in bawn i. A kedo le a khuam heh pha bik ai erhnak sui in bawn i. A mawiruaitu papar, a mum le a parhte tu a khuam thawn zom dun liang i. 18A khuam in a kakte paruk suak ai a nakkhat lamah kak thum veve in um i. 19A kak cangcang ah Almond papar bang ai a mum le a parh thawn a mawiruaitu paparte parh thum ṭen um i. 20Maivarhnak khuam ah Almond par bang ai a mum le a parh thawn a mawiruaitu paparte parh li um i. 21A kak khuahkhat hniaah papar mum pakhat ṭen um i. 22Papar mumte le a kakte tu maivarhnak khuam thawn peh dun sio i; erhnak sui phunkhat in bawnhnak i. 23Maivarhnak khuam pakhat vumah maivarhnak pasarih bawn ai caicep le darhleng tu sui in bawn sio i. 24Maivarhnak khuam le a thilri hmuahhmuah bawnhnak ah sui pawng zakhat hmang i.
Rimhmui Taihnak Puleng
(Luat 30:1-5)
25Lawithing in rimhmui taihnak hrangah puleng tiang i. A sau le a kau a camra dun in dong khat sau le kau i. A sanglam tu dong hnih i. A vumai munhnak thingzumte tu puleng thawn peh dun liang i. 26A vum lam ituseh a vumai thingzum munhnakte a hmurte pa li khai ituseh, sui ciang in khut sio ai a cingkim heh sui in kam i. 27Suikualte pahnih bawn ai ciami puleng zawnghnak a laangte rolhhnak hrang a tlanghmur ai hniaah ciami suikualte heh mun i. 28Laangte tu lawithing in bawn ai sui in khut liang i.
Thau Le Rimhmui Bawn I
(Luat 30:22-38)
29A cianghlim thaupawhhnak tuhin siti le yihmui bawntute ai bawndan bangin rimhmui ur ngai yihmui bawn i.#Luat 30:22-38
Currently Selected:
LUATSUAKHNAK 37: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
