LUATSUAKHNAK 35

Sabbath Ul Dante

1Moses in Israel mite hmuahhmuah hmunkhat ah kokhawm sio ai anite hnenah, “Bawipa ai thupeciahnak ning bawn tuhhnak tu hetihin i: 2Niruk song naper tuh i si; ikhalselai ni sarih nia tu ning ca ni thianghlim i ai, ni songlawi, ning naperhnak in ning cawlum nia, Bawipa ca aphnak nia i tuh i. Cia nia ah aisusu khai naper per lekhaw rekhnak tuar tuh i.#Luat 20:8-11; 23:12; 31:15; 34:21; Sua 23:3; Danp 5:12-14 3Hemi sabbath nia ah ning umhnak hmuahhmuah ah mai sem tuh lo i si,” tiin rel i.

Pathian Ponhlam Hrang Pehnak

(Luat 25:1-9)

4Moses in Israel mite hnenah, “Bawipa ai thupeciahnak bangin, 5Bawipa hnenah thawhhlawm pe tuh i si. Thawhhlawm pe a nuamtu hmuahhmuah in sui, ngun, dar; 6a mepian, a sannum le tuuhmul a san, pon mankhung, mehmul ai takhnak hnikpon, 7tuucang phaw a san ai nimhnak le saphaw pha le lawithing, 8maivarhnak siti, thaupawh tuhhnak le yihmui rimur a phunphun, 9lungmankhung san le Suangbawi Sang sil tuhhnak kangbet hrang le angki thianghlim songsilh vumai bet tuhhnak lungmankhung pawl pe tuh i si,” tiin ti i.

Ponhlam Hrang Thilri

(Luat 39:32-43)

10Ningmah lakai kutzungthiam hmuahhmuah in Bawipa ai bawnruaihnak thilri hmuahhmuah bawn tuseh. 11Pathian umhnak inn hrangah ponhlam le a phukhuk, bangkhangte le a penhnak hukkurte, thingtlang, khuam le a kedote, 12Thutiam Kuang le a laangte, kuangsin le kuang berhnak ponzarte; 13cabuai le cabuai laangte le a thilrite Pathian hmaiah sel tuhhnak sang, 14maivarhnak khuam le a thilrite, maikhuat le, maikhuat hrang siti, 15yihmui rimur taihnak hrang puleng le puleng laangte le pawh tuh siti le yihmui rimur le ponhlam luthnak dawngkham ponzar; 16maitai hibawlhnak tuh puleng le puleng vumah dahhnak dar khoseng, puleng a laangte le a thilrite, kut somhnak hleng le a hniaphah, 17Ponhlam kulhhnak ponzar le a khuamte le a hniaphahte, kotka ponzar, 18Ponhlam le a kulhhnak hrang thil bathnak rihualte, 19hmun thianghlim songai suangbawite ai hmanghnak hnikpon songlawi le a mankhung mi suangbawi Aaron le a fapate ai suangbawi na ruaih tlang fangin a sil tuhhnak hnikpon thianghlim pawl bawn tuh i si,” tiin Moses in ti i.

Israel Mite In Thawhhlawm Pe

20Cia hnuaah Israel mite tu tlung tlang i. 21Suangbawi silhfen cianghlim bawnhnak tuh hrang, Bawipa ai Ponhlam sahnak le hlam song naperhnak hrangah a kulhnak hmuahhmuah heh pe a nuamtute le thintha a tho mite in Bawipa ai hnenah thawhhlawm pe tlang i. 22Nupang ituseh pasal ituseh kawi ai thuamparhnak ai bethnak a phunphun le bilvuh, kutruk, khi le sui ai bawnhnak thilrite heh siang ngai in pe tlang i. Mi zongzong in Bawipa hnenah pe tuhai ruathnak thawhhlawm, sui ai bawnhnak thilrite khiah Bawipa hnenah keng in pe tlang i. 23A mepian, a sannum le a san tuuhmul ituseh, mehmul ai takhnak hnikpon le a san ai nimhnak tuucang phaw le saphaw pha bik pawl ituseh, a naitu in Bawipa hnenah pe tlang i. 24Ngun ituseh, dar ituseh a pebentute in Bawipa hnenah pe tlang ai, lawithing a naitute in inn sahnak tuhin pe tlang i. 25Cen nupang kutzungthiamte in vokher tlang ai thiam mepian, a sannum le a san tuuhmul pon le vori ai takhnak hnikpon mankhung tak ai Bawipa hnenah pe tlang i. 26Nupang kutzungthiamte in mehmul khai ri in sual tlang i. 27Amahte konghoitute ai a cianghlim songsilh angki le kangbet vumah bet tuhin lungmankhung san pe tlang ai, 28maikhuat varhnak tuhin siti, pawh tuh thau le yihmui rimur maitai tuh hrang siti le yihmui khai koih tlang i. 29Israel mite hmuahhmuah in nupang ituseh, pasal ituseh, Moses hnenin Bawipa ai thupeciahnak a ling bangin a naperhnak hrang amahte pe nuamhnak thawhhlawm heh Bawipa hnenah pe tlang tlurtlo i.

Ponhlam Hrang Zungthiam Pawl

(Luat 31:1-11)

30Moses in Israel mite hnenah, “Judah miphun Hur ai tupa Bezalel, Uri ai fapa heh Bawipa in ril zo i. 31Bawipa in Bezalel tu rauhla in dimruai ai zungthiamhnak, thil bawnthiamhnak le thiamthilhnak in bawn thiam tuhin lingthilhnak nai ai, 32pianzia a phunphun suaithiamhnak le sui, ngun le dar in ciamite khai bawnthiamhnak nai i. 33Lungmankhung tatthiamhnak, thing in zuk bawnthiamhnak le kutzungthiamhnak a phunphun nai i. 34Bezalel tu Dan hin Ahisamak ai fapa Oholiab hnenah a kutzungthiamte in midang zirhthiamhnak khai Bawipa in pe i. 35Lungto vumah lungkher thiam pawl le thing vumah laingan le zuksuai thiam pawl, pianzia phuncang suaithiam pawl le a mepian, a sannum, le a san ai takthiam pawl, pon vumah a coihthiam tepawl ai thiamhnak bangin Pathian in Bezalel le Ohiliab hnenah thiamhnak ngaihsunurkul in pe i. Naper a phunphun thiam ai pianzia a phunphun bawnthiam i.

Currently Selected:

LUATSUAKHNAK 35: RZB

Highlight

Copy