LUATSUAKHNAK 16

Manna Sang Le Vahnimte

1Israel mite miburpui tu Elim in suak tlang ai, Egypt ram songai a suak hnua Hla hnihhnak#16:1Hlahnihhnak tihnak tu Hebrew in Lyyar ti i ai April hlahrek in May hlahrek karlak i. ni hlainga nia ah Elim le Sinai karlak ai umhnak Sin nelrawn ramkhing ah hleng tlang i. 2Cen ciami nelrawn ramkhing ah anite veksen in Moses le Aaron vumah cam tlang murhmo ai, 3Egypt ramah Bawipa in kin rek berh ta sawn selai kin hiam sawn i! Egypt ramah sa dai kim in rong kin duhzah ai i ing. Ikhalselai ningmah in kin suakpui ai heta nelrawn ramkhing ah rikam in kin thiruai tuh sek ihang i sim,” tiin ti tlang i.

4Ciafangin Bawipa in Moses hnenah, “Tunin ning veksen ca van in ruah bangin sang khiah siruai tuh ing. Israel mite tu nisiar in amahte riahbuk in suak tuhai cia nia hrang tham in sang khiah khul tlang tu de seh. Ciatihin i thupeciahnak hlun le hlun lo cu tuh ing.#Joh 6:31 5Ni rukhnak nia ah ni dang ai a khulhnak de a let hnih tam in khul tu selai ai tuhin khawi tuseh,” tiin ti i.

6Ciamanin Moses le Aaron in Israel mite a veksen hnenah, “Tun zan zan lam Egypt ram an kin suahtu khiah Bawipa i ti ling tuh i si. 7Cen zing lamah Bawipa ai songlawihnak hmu tuh i si. A vumah ning phuncam murhmo za zo i. I! Bawipa vumah cam tlang i si, zaimantifangin kin tu cam tlak khai ilo i ing?” tiin ti i. 8Cen Moses in, “Zan lam aih tuhin sa ning petu tuh le zing lam aih tuhin ning duhzah sang ning petu tuh heh Bawipa i. Zaimantifangin vel tampui a vumah ning phuncamhnak za zo i. Kin bang rongra tu ziang titlak khai ihlah ing! Ning phuncamhnak tu kin vumah ilo i; Bawipa vum sawn ah i,” tiin ti i.

9Moses in Aaron hnenah, “Israel mite a veksen hnenah, ‘Kawi tu ilai Bawipa ai hmaiah ding tu ih; zaimantifangin ning phuncamhnak za zo i,’ tiin rel tu,” tiin ti i. 10Amahte veksen hnenah Aaron a pong sawng fangin nelrawn lamah hoi tlang ai cia sawngpah Bawipa songlawihnak tleu mairo vumah lar i. 11Ciafangin Bawipa in Moses hnenah, 12“Israel mite phuncam murhmo za zo ing; amahte hnenah, ‘Zan lam nitla sawng fangin aih tuh sa ngah tuhai zing lamah ning duhzah rong ngah tuh i si. Ciafangin Bawipa kaimah heh Pathian ing ti khiah ling tuh i si,’ tiin rel tu,” tiin ti i.

13Cen zan lamah vahnim tampui hleng bialbo ai Israel mite riahbuk pumpalah ah dim sio i. Zing lamah riahbuk cingkim ah nai a sah roh in tla i. 14Ciami nai ro fangin nelrawn laipua vumah thil phunkhat, a padiar ai a bek ngai, vur khal padiar bang khiah laipua lakah um bial i. 15Ciami heh Israel mite in hmu fangin ziang i ti ling loin pakhat le pakhat, “Hemi tu ziang ini?” tiin zawt dun tlang murhmo i.

Ciafangin Moses in, “Hemi tu Bawipa in aih tuhin sang amah in ning pehnak i.#1Cor 10:3 16Bawipa ai thupeciahnak bangin ningmah hlanlam ning kulzah rut tu ilai mi pakhat ca khuat li ian rut tu ih. Mi pakhat in a riahbuk songai umtu veksen ca a kulzah ian lang tu ih,” ti i.

17Israel mite in Moses ai relhnak bangin bawn tlang i; mi hrekkhat in tam deuh rut tlang ai mi hrekkhat in tlawm deuh rut i. 18Ikhalselai a teh fangin a tam deuh a ruttute in tampui nai cuang lo ai a tlawm deuh a ruttute inkhai, tlawm deuh nai cuang lo i. A ruttu hmuahhmuah in amahte kulzah ngaingai ṭen lek rut i.#2Cor 8:15 19Ciafangin Moses in, “Aisu inkhai thangha hrang tiin dah mah ih,” tiin ti i. 20Ikhalselai mi hrekkhat tu Moses thu ngai nuam loin sang tlawmniu khiah thangha hrang tiin dah i. A thangha fangin uih sek ai zang in dim manin uih roh i. Ciafangin Moses tu anite vumah a thinraw i. 21Israel mite in zingsiar in amahte kulzah ian rut tlang de i; Ikhalselai sun ah ni sa fangin laipua vumai a tanghnak tu zul sek de i.

22Nirukhnak nia fangin rong khiah a let hnih tam in minung pakhat ca khuat riat ṭen in rut tlang de i. Israel mite konghoitute kawi ai cia thu heh Moses hnenah rel tlang i. 23Ciafangin Moses in, “Hemi tu Bawipa ai thupeciahnak i, ‘Thangha tu cawlum nia, Bawipa ca a thianghlim Sabbath nia i. Em ning hiam lekhaw em tu ilai, a suang ning nuamhnak tunin suang tu ih. Ning valhnak hmuahhmuah a dangniu in khawi tu ilai thangha hrang dah tu ih,’ ti i,” tiin ti i.#Luat 20:8-11 24Cen Moses ai relhnak bangin a valhnak tu a thangha tian dah ai uih hrimhrim lo i, zang khai um lo i. 25Ciafangin Moses in, “Hemi tu tunnia ai tu ih; zaimantifangin tunnia tu Bawipa ai Sabbath nia imanin sumpua lamah zaikhai tawk tuh lo i si. 26Niruk song rut tuh i si, ikhalselai ni sarih nia fangin Sabbath nia imanin, zaikhai um tuh lo i,” tiin ti i.

27Ikhalselai mi hrekkhat tu rong si tuhin sumpua lamah suak in si thotho napui tawk tlang lo i. 28Ciafangin Bawipa in Moses hnenah, “Zaicam tian i thupehnak le i dante hlun nuam loin um tuh i si? 29Sabbath ning bawnsahtu heh Bawipa kaimah ing ti khiah ling tu ih. Ciamanin ni hnih hrang a tham in ni ruk nia ah rong ning pe ing. Ni sarih nia tu aisusu inkhai mah umhnak ṭen ah um tuhhnak i. ningmah umhnak ah um tu hlen ih. Aisu khai mah inn in suak tuh lo i si,” tiin ti i. 30Ciamanin ni sarih nia ah Israel mite tu cawlum tlang i.

31Israel mite in ciami rong heh manna#16:31Manna tihnak tu Hebrew in ziang ipa ti thawn a awsuah bang dun i. tiin ko i. Manna tu hlaici ngo#16:31Hlaici ngotihnak tu Nanan ci bang i. bang i. A ngo i ai a urdan tu khoitizu roihhnak sangper ang i.#Mip 11:7-8 32Cen Moses in “Bawipa ai thupehnak tu hetihin i, ‘Manna sang heh dawng pakhat songah dah tu ih. Egypt ram an ning suakruai ai nelrawn songah ning vak laiah ning aih tuhin i pehnak rong i, tiin ning tesinfate hmu thil tuhin phaniu in khawi tu ih,’ ti i,’ tiin Israel mizapui hnenah ti i. 33Cen Moses in Aaron hnenah, “Bel pakhat lang tulai manna sang khuat li a songah thun tu; na tesinfate ca Bawipa hmaiah dah tu,” tiin ti i.#Heb 9:4 34Bawipa in Moses hnenah thu a pehnak bangin Aaron in bawn ai thukham dahhnak kuang hmaiah a himhnak tuhin dah i. 35Israel mite in Canaan ram a hleng hlan, kum sawmli song tu manna ai tlang i. Manna tu amahte umhnak khurhnak Canaan ram a hleng tianin ai tlang i.#Jos 5:12 36(Omer#16:36Omerpakhat tu khuat hnih tluk i. pakhat tu Ephah pakhat ai seu hra seu khat i).

Currently Selected:

LUATSUAKHNAK 16: RZB

Highlight

Copy