LUATSUAKHNAK 13

Pathian Hnenah Fa Upaber Aphnak

1 Bawipa in Moses hnenah, 2“Fapa upa ber hmuahhmuah kaimah hnenah i ap tuh i si. Israel mite lakai fapa upa ber hmuahhmuah heh kaimah ai i: ramsa lakah khai a paa upa ber heh kaimah ai i,” tiin ti i.#Mip 3:13; Luk 2:23

Col Tello Sang Puai

3Moses in Israel mite hnenah, “Egypt ram, sal in ning tang hmun an ning suak nia, tunnia heh hih tu ngio ih; zaimantifangin Bawipa a ban thahat in ning suah zo ihang. Col phulhhnak sang heh ai tuh hrimhrim lo i si. 4Abib#13:4 Abib hla tihnak tu Nisan ti ai a ko hlanah hmang awnghnak hming hlun i. hla, tunnia ah Egypt ram an suak i si! 5Bawipa in Canaan mi, Hit mi, Amor mi, Hiv mi le Jebus mite umhnak ram ning pe tuhin ning pupate hnenah amah ai hming sal in thukham zo i. Cia ram tu hnawiti le khoitizu luanghnak ram i. Ciamanin cia ram ning hleng fangin Abib hla tengteng ah col tello sang puai bawn tuhin hai mah ih. 6Ni sarih song col tello sang ai tuhai a ni sarih nia ah Bawipa ca puai bawn tlang tuh i si. 7Ni sarih song tu col tello sang ai tlang tuh i si. Col phulh cia sang ituseh col ituseh ning ramsong hrimhrim ah dah tuh lo i si. 8Hemi hmuahhmuah kin bawnhnak tu Egypt ram an kin suak fangin kinmah ca Bawipa ai thil bawnhnak hai tuh lohnak i,’ tiin cia nia ah ning fate hnenah rel tu ih. 9Hetih ai ning bawnhnak tu hlanlai thu ning hihruaitu, ning kut ah ituseh, ning cal ah ituseh hnikhnaihhnak bang cang tuhai, ciafang ian in Bawipa ai dan heh a rel ning dap tuh lo i, zaimantifangin a hathnak huham thawn Bawipa in Egypt ram an ning suakruai i. 10Kum khat hnua kum khat a camcu khim fangin fel ngai in bawn tuh ṭiode i si.

Fa Upaber Aphnak

11 Bawipa in Canaan mite ramah ning hlengpui tuh i; zaimantifangin amah hming sal in ning pupate hnenah thukham cia i. Cia ram khiah ning hnenah ning pe fangin; 12ning fa upa ber hmuahhmuah khiah Bawipa hnenah ap tuh i si. Ning sumhnam ai naihnak hmasaber fa upa ber a paa heh Bawipa ai i.#Luat 34:19-20; Luk 2:23 13Ikhalselai laak fa upa ber a paa khiah tuu faniu in tlan tuh i si, a tlan ning hiam hlah lekhaw a hawng ek sah tuh i si. Ning fapa upa ber hmuahhmuah cenin tlan tuh i si. 14Leh hnuaah ning fapa in, ‘Hetihin ning bawn heh ziang tica i?’ tiin ning zawt lekhaw, ‘Bawipa in kin saltanghnak Egypt ram an a hathnak huham thawn kin suah awng i. 15Pharoah a thinlung ruh ze ai Egypt ram an kin suah lo fangin, Egypt ramai fapa upa ber hmuahhmuah; minung fapa ituseh, ramsa fa ituseh Bawipa in rek berh i. Ciamanin fapa upa ber hmuahhmuah heh Bawipa hnenah kin aphnak i; ikhalselai i fapa upa ber cenin tlan leh ing,’ tiin ti tuh i si. 16Hetihin ning bawnhnak tu he hlan thu ning lingruaitu, ning kut ah ituseh, ning cal ah ituseh hnikhnaihhnak bang i tuh i; zaimantifangin Egypt ramsong in Bawipa in a hathnak huham thawn kin suah zo i,” tiin ti i.

Mairo Zual Le Mai Zual

17Pharoah in Israel mite a feh siang fangin, Philistia tipui kamai fehhnak lampui tu com ber khalselai Bawipa in he lampui in fehpui lo i. Zaimantifangin Pathian in, “Ralte a tawng tuhhnak a hmu fangin a thin thleng ai Egypt ramah let tuh i daih lo i,” tiin ti i. 18Cia lampui tahin nelrawn ramkhing lampui in Tipui San lamah Bawipa in helpui sawn i. Israel mite tu raltawng tuh ralthuam ralring in Egypt ram an suak tlang i.

19Moses in Joseph ai luang khai keng i; zaimantifangin amah Joseph in Israel mite khiah cukcam in thukham bawnruai awng cia i. Anite hnenah, “Pathian in ning o tuh i. Ciafangin heta in ning suak fangin i luang phur tuh i si,” tiin Joseph in ti awng i.#Sem 50:25; Jos 24:32

20Sukkoth in Israel mite tu suak tlang ai nelrawn hiangniu Etham ah cam tlang i. 21Sun fangin lampui hmuhtu tuhin mairo zual in Bawipa khiah a hmaiah feh i, Zan fangin tleuhnak pe tuhin le sun le zan vak thil tuh hrangah mai zual in Bawipa khiah a hmaiah feh i. 22Israel mite hmaiah catloin sun fangin mairo zual um ai zan fangin mai zual um i.

Currently Selected:

LUATSUAKHNAK 13: RZB

Highlight

Copy