ESTHER 2
2
Esther Kumpibawinu Canghnak
1Cia hnuaah, a thinrawhnak dap leh fangin, kumpibawi tu Vashti thil bawnhnak le a vumah thu a pehnak ruat lehsal i. 2Ciafangin a ruathnak petute hrekkhat in, “Zaimanin nangmah caah fenu mawi pakhat si lo ising? 3Na uk song ramkulh cangah na kuthnia ai tlangsuakte hlat tulai fenu mawi hmuahhmuah he kumpibawi umhnak Susa khuapui ah kumpibawi nuzawlte umhnak inn ah fehpui selai nupang kiltu tilretmi Hegai sikruai tu. Ciata ah par tlang tu liang seh. 4Cen na daihhnak ber fenu heh lang tulai Vashti tumrul in kumpibawinu tuhin bawn tu,” tiin ti i.
Ciami heh kumpibawi daihdan i ai amahte tihnak bangin bawn i.
5Ciami Susa khuapui ah Mordecai tihnak Judah mi pakhat um i. Mordecai tu Jair ai fapa i ai Benjamin phun, Kish le Shimei ai tesinfa i. 6Kumpibawi Nebuchadnezzar in Judah kumpibawi Jehoiachin le a minungte Babylon ah sal tuhin a fehpui fangin Mordecai khai tel ve i.#2Kum 24:10-16; 2San 36:10 7Mordecai hnenah a pakhatta ai fanu Esther tihnak um i; Esther ai Hebrew hming tu Hadassah i. A nu le a pa a thi hnuaah Esther tu Mordecai in cawm ai a fanu ngaingai bangin sik i.
Esther tu fenu mawi bik i ai a ruangrai khai pha bik i. 8Ciamanin kumpibawi thusuahhnak thuthan tlang ai fenu tampui Susa Khuapui ah fehpui fangin Esther khai fehpui ve i. Esther tu kumpibawi inn nupang umhnak khan ah dah ai Hegai in kil i. 9Hegai in Esther tu daih ngai ai pha deuh in sik i. Parhnak a phunphun pe i; a taksa hmet sah ai rong khai pha cuangin pe de i. Esther kiltu tuhin kumpibawi inn in a rilmi fenute pasarih dah i.
10Cen Esther in Judah mi a ihnak khiah phuang awng lo i; Mordecai in phuang tuh loin ruai manin Esther in thup ngio i. 11Nisiar in Mordecai tu Esther akontih in um i ti le akontih in um leh nimaw, ti ling nuam in kumpibawi nuzawlte umhnak inn tualvan hmai in vak de i.
12Ciatihin fenute par tuhin kum khat rai i. Hla ruk song mura yihmui thawn a taksa hmet sah ai, a dang hlaruk song balsam yihmui thawn taksa hmet sah lala i. Cia hnuaah fenute tu pakhat pakhat in kumpibawi Xerxes hmaiah fehpui tuh ihang. 13A umhnak inn in kumpibawi inn ah a feh fangin amahte daihhnak zaibang khai sil thai i. 14Kumpibawi inn ahcen zan lamah feh tuh i ai a thangha fangin a dang nupangte umhnak inn ah feh tuh i. Ciata ah tu kumpibawi nuzawlte kiltu Shaashgaz in sik tuh i. Kumpibawi in daih ai a hming in a ko leh lomi tu fenu aisu khai kumpibawi hnenah feh leh tuh nawn lo ihang.
15Ni khat ah Esther feh can hleng ihang, Esther, Mordecai pakhatta Abihail ai fanu, Mordecai in amah ai fanu ngaingai bangin a cawmmi khiah a hmutu hmuahhmuah in uar i. Kumpibawi hnenah a feh fangin kumpibawi nuzawlte umhnak innkiltu Hegai ai relhnak hnikpon sil i. 16Ciatihin Xerxes Kumpibawi a canghnak kum sarih kum, hla hra hla, Tebeth#2:16Tebeth Tebeth hla tu December hlahrek le January hlahrek ceem i. hla ah Kumpibawi inn song kumpibawi Xerxes hmaiah Esther heh hleng ihang. 17Kumpibawi in a dang fanute tahin Esther heh daih cuang i; mithmai pe ai a ithnak a dang fanute tahin khai Esther heh it sawn i. Ciamanin kumpibawi lukhuk heh Esther khuruai ai Vashti tumrul in Esther khiah kumpibawinu tuhin bawn i. 18Cen kumpibawi in Esther upathnak ah rong aih puai lian ngai bawn ai a kuthnia ai tlangsuakte hmuahhmuah le ramkulh uktu bawite hmuahhmuah ko liang i. A uksong hmuahhmuah cawlum can pe ai a thil naihnak bangin siang ngai in lehsawng zem diamdo i.
Mordecai In Kumpibawi O Ngah I
19Cen fenute a vel hnihhnak khawm tlang fangin, Mordecai heh naper pakhat kumpibawi in pe i. 20Mordecai in a rel awng bangin Esther in Judah mi a ihnak khiah phuang awng lo i. Phuang tuh loin Mordecai in tiam ai a naupangniu lai in a thu ngai awng bangin tun ahkhai Mordecai ai thu ngai i.
21Mordecai tu kumpibawi zung ah napertu pakhat a i laiah kumpibawi inn khan dawngkhamte kiltu tilret sa pawl pahnih Bigthana le Teresh in Kumpibawi Xerxes heh ngaih kawm lo manin tawngcai ai rek tum i. 22Ciami heh Mordecai in ling ai kumpibawinu Esther rel i. Esther in ciami thu heh kumpibawi rel salawn i. 23Zong tlang fangin thudik i ti ling ai tungkhuam vumah tar ai rek i. Ciami thu hmuahhmuah heh kumpibawi ai thupehnak bangin a khimniu in kumpibawi ramsong thu hnikhnaihhnak laibu songah khum i.
Currently Selected:
ESTHER 2: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.