2 THESALON 3
3
Kin Caah Sawngen Tu Ih
1A tawphnak ah u le naute, Bawipa ai Thuthang heh ningmah lakah a pungzai bangin rang ngai in pungzai amam tuhin le songlawihnak thawn anite in cosang thai tuhin saw kin nget tu ih. 2Bawipa ai Thuthang tu mi zongzong in sang lo manin Pathian in mihrokhrawl le misualte hnenin kin o tuhin saw kin nget tu ih.
3Ikhalselai Pathian tu rintlak i, amah in thazang ning pe tuhai Mihrokhrawl pa hnenin ning huphim tuh i. 4Kin zirhhnakte heh ning in hlun betbo ai hmai lamah khai hlun tuh zianzo i si ti Bawipa rinsanhnak in ling i ing.
5Pathian ithnak le Khrih ai ning pehnak tuarbenhnak heh tam amam in ning ling thil tuhin Pathian in kong ning hoi tu zianzo hram seh.
Naper Tuh Ṭuanvo
6U le naute, i thuzirhhnak bangin a hlun lotu unaute le mithazawngte tu kom mah ih, tiin kin Bawipa Jesuh Khrih hming in thu ning pe i ing. 7Kin bawnhnak bangin bawn tuh heh lingfiang i si. Ning hnenah kin um laiah thazawng in um awng lo i ing. 8A man pe loin kin langhnak zaikhai um lo i. Kinmah rori in per i ing, permer ai aisu ca ahkhai thilrit cang tuh loin sun le zan in per i ing. 9Hetih ai kin perhnak tu ningmah ai bawm tuhin ngenthilhnak thu nai lo manin ilo i; ningmah ai cung tuhin kin perhnak i. 10Ning hnenah kin um laiah, “Naper nuam lotu heh rong khai ai maseh,” tiin ning rel de i ing.
11Hetih ai kin relhnak tu ningmah songah mi hrekkhat thazawng in um ai naper zaikhai per zuam loin midang hnaihnok lek thiam i. 12Ciabang ai a nungtute hnenah felfai niu in nung tuhin le mah ai pumcawmhnak hrang per tuh ve in Bawipa Jesuh Khrih hming in kin forhhnak le ralringhnak pe kin nuam i.
13Ikhalselai u le naute, thilpha bawn heh rimkham mah ih. 14Hemi laikuat songai thu bangin a hlun nuam lotu ningmah songah um thai pang i. Ciabang mite tu aisu inkhai kom maseh, zakthi tuseh. 15Ikhalselai ral bangin sik mah ih; unau bangin nunthutiam tu ih.
Thutawphnak
16Daphnak hampui kin Bawipa in daphnak a phunphun in zaikom can inkhai ning pe tu hram seh. Bawipa tu ning veksen hnenah um tu hram seh.
17Kaimah Paul in hnuk ning sat ing tihnak tu i kut rori in i nganhnak i. Lai i kuathnak cangcang ah hetihin i hming khen in ngan ing.
18Kin Bawipa Jesuh Khrih ai ninghiohnak ning veksen hnenah um tu hram seh.
Currently Selected:
2 THESALON 3: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
