2 PETER 1
1
1Jesuh Khrih ai cengfa le nalang kaimah Simon Peter in kin Pathian le kin Nunotu Jesuh Khrih ai dikcanghnak manin hetluk a songlawi mi kin sanghnak thawn a bangvek in sanghnak a pe ve mi ning hnenah he laikuat ngan ing.
2Pathian le kin Bawipa Jesuh ning linghnak thawmin ninghiohnak le daphnak a semkhim liang in co tu ih.
Pathian Ai Kohnak Le Rilhnak
3A songlawihnak le phathnak co tuh ve in kin kotu Khrih kin linghnak manin Pathian kihzahhnak thawn kin nung thil tuhin kin kulhnak hmuahhmuah heh Pathian ai hathnak huham in kin pe zo i. 4Ciatihin amah ai kin thukhamhnak a lian le a songlawi mi lehsawng kin pe ai ciami lehsawng manin kin siatsuahthaitu laivum tisa hiamhnak in ning luat thil tuhai Pathian a ihnak ah kawm thil tuh ve i si. 5Hemi rori manin ning phathnak vumah linghnak bet tum tu ih; 6ning linghnak vumah supbenhnak bet rih tu ih; cen supbenhnak vumah tuarbenhnak bet rih tu ilai ning tuarbenhnak vumah Pathian kihzahhnak bet tu ih. 7Pathian kihzah ning naihnak vumah unau ngaihharhnak bet tu ih; cen Khristian unau ngaihharhnak vumah ithnak bet tu ih. 8Hemi phathnak tepawl heh ning kul ngai i ai a semkhim in nai le i sikhaw kin Bawipa Jesuh Khrih ning linghnak ah ning hatruaitu le huthawm ning nairuaitu tuh i. 9Ikhalselai he phathnak tepawl a nai lotu heh mitmal mi i ai nong niu ian a hmuthiltu i; hlanai a sualhnak in cianghlimruai zomi a ilam rin ling tuh nawn lo i.
10Ciatih imanin u le naute, Pathian ai ning kohnak le ning rilhnak heh kumzangza in kho tuhin zuam tu amam ih. Ciatihin bawn le i sikhaw ning sanghnak in ning pial tuh awng lo i. 11Ciatihin kin Bawipa le kin tlantu Jesuh Khrih ai kumzangza ukhnak songah lutthilhnak thu ngah tuh i si.
12Hemi thulate heh ning lingciahnak le thutak ning linghnak songah khokhah ngai in a ding cia mi inapui i sikhaw ning lingruai lehsal tuh ṭiode ing. 13I nun songah he thute ning lingruai ṭiode heh a dikmi i tiin ruat ing. 14Kin Bawipa Jesuh Khrih in fiang ngai ai i lingruai zo bangin he a thi thai kin ruangpum heh zam cing tuh ing ti ling ing. 15Ciamanin he thute heh i thi hnuaah khai ning hih tuh ngio in i ti ben tawp in zuam tuh ing.
Khrih Ai Songlawihnak A Hmutu
16Kin Bawipa Jesuh Khrih tu huham thawn a hleng tuhhnak thu ning lingruai fangin puahfawmhnak tluanthu ring in ning relhnak ilo ing. A songlawi zia heh kin mit rori in hmu awng ising. 17Songlawi Cungnungber hnenin a hlenghnak aw in, “Hemi tu i ithnak i Fapa i, a vumah lung i awi i,” tiin a ti lak fangin kin Pa Pathian in upathnak le songlawihnak a pehnak hmunah kinmah khai um tlang ve i ing!#Mat 17:1-5; Mar 9:2-7; Luk 9:28-35 18Amah thawn mual thianghlim vumai kin um laiah vancung in a thangmi cia aw za tlang i ing.
19Ciamanin prophette ai relciahnak thuthang vumah lunghmuihnak kho amam nai tlang i ing. Ning khai ciami thu heh thupui bik i tiin ruat isilai pha tuh i; zaimantifangin ciami thu tu Khrih ai Ni tleuhnak ning thinlung songah vartin arsi tleu bangin a tleu hlan tian khuathim songah a varhnak maikhuat bang i. 20Thil dang hmuahhmuah tahin hemi heh hih tu ngio ih; aisu khai amah bul in Lai Thianghlim songai prophet thurelhnak heh fiangruai ben tuh lo i. 21Zaimantifangin prophet ai thurelhnak tu minung daihhnak menma in hlenghnak ilo i; Pathian hnenin a hlenghnak thuthang anite in phuang fangin Rauhla Thianghlim ruaihnak bangin phuang i.
Currently Selected:
2 PETER 1: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
