2 KORIN 9
9
Khristiante Bawmdunhnak
1Judea peng Pathian sangtute hnenah bawmhnak ning kuathnak thu ah ning hnenah laikuat kul in hmu lo ing. 2Mi bawm ning nuam i ti ling zo ai Macedonia ai um mite hnen ahkhai ningmah thu ah porh dun hnelhno zo ing. “Achaia peng ai a ummi kin unaute tu mi bawm tuhin tihhnikum in ralring tlang cia zo i,” ti ta ing. Ningmah ai lungthohnak manin mi tampui in thatho tlang ve i. 3Hemi kin unaute i kuathnak a san tu ningmah thu ai kin porhdunhnak hnelhno heh sullam nai lo porhdunhnak menma ah cang pang maseh ti i daih manin i. Ikhalselai i rel zohnak bangin bawmhnak pe tuhin ning tumhnak thawn ralring in um tu ih. 4Ciatih ilo in akontih in maw, Macedonia mite kaimah thawn kawi tlang ai ralringhnak zaikhai ning nai lo khiah hmu pang lekhaw ningmah ai zakthihnak tu um tu rih seh; kinmah hrimhrim in hetluk in ning rinsan hnuaah zak kin thi tlang tuh roh i. 5Ciamanin i hleng hlanah he kin unaute heh hlat i ing: cen pe tuhin ning ti ciahnak lehsawngte ralring ai um tuhin tawlrel kul i tiin kin ruathnak i. Ciatihin kin hleng fangin tawlrel cia in um tuhai ning pe kul manin pe ilo in pe ning nuam manin pe i si ti khiah lar tuh i.
6Hlaici tlawmniu a vorhtu in rong tlawmniu khawm tuh i; tampui a vorhtu in tampui khawm tuh ve i, ti khiah hih tu ngio ih. 7Aisusu khai a thinlung khancat ngah hnuaah pe tuseh; sirhnak thawn pe maseh; i ṭuanvo i, ti inkhai pe maseh. Lungawi aipuang ai a petu ian Pathian in daih i. 8Cen Pathian tu ning kulhnak tah ai hlaiah ning pethaitu i ai ning caah a kulhnak hmuahhmuah kham ngai in nai tuhai thil pha ning bawnhnak vumah a hlaiah ngah tuh i si. 9Lai Thianghlim in:
“Siang ngai in mifarahte pe i;
A ninghiohnak tu
kumzangza in kho i,” ti i.#Saam 112:9
10Cen vorh tuh hlaici le ai tuh rong petu Pathian in ning kulhnak hlaici hmuahhmuah ning pe tuh i; cen siang ngai in ning pe manin ning rong po khai khangruai tuhai ning purmawng tuh i.#Isa 55:10 11Pathian in siang ngai in pe bentu ṭio tuhin kham ngai in ning nungruai tuh i; ciatihin ning lehsawng pehnak tu kin hnenin ngah fangin mi tampui in Pathian thangphat tlang tuh i.
12Zaimantifangin he ning naperhnak in Pathian sangtute ai tlasamhnak a bawm lek zolo in minung thinlung in Pathian cawimawihnak tampui suakruai i. 13Hemi ning naperhnak in larruai manin Khrih ai Thuthangpha pom tlang ai kho ngai in ning ding benhnak manin ituseh, ning bawmhnak le midangte thawn ning naihnak siang ngai in ning hlawm dun manin ituseh, mi tampui in Pathian hnenah anghnak thu rel tlang tuh i. 14Pathian ai ninghiohnak tam hlaice ning vumah a hleng manin ning it ngai kongin ning caah sawngen tlang tuh i. 15Rel cawk loin a songlawi mi Pathian lehsawng hrangah anghnak thu a hnenah rel tlang ngasing.
Currently Selected:
2 KORIN 9: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
