1 KORIN 16
16
Sangtute Caah Thawhhlawm
1Judea ramai a ummi Pathian sangtute caah paisa bur tuh thu lai ning nganhnak ah: Galati pawlpuite hnenai thu i cahhnak bangin bawn tu ih.#Rom 15:25-26 2Nipui nia cang fangin ning ngahhnak a tam le a tlawm songin paisa suah tlang tu ṭen ilai khawl cia tu ih; ciatihin i hleng fangin paisa bur kul tuh nawn lo i. 3I hleng hnuaah ning rilhnakte kut ah lai ken tuhai ciatihin Jerusalem ah ning lehsawng heh phur tuh i. 4I feh man um tuh lekhaw feh tlang leh tuh ising.
Paul Ai Tumtekhnak
5Macedonia ramsong feh kong tuh manin, ciatih ai i feh hnuaah ning hnenah hleng leh tuh ing.#Nal 19:21 6Ning hnenah can cateng dung hmang tuh ing; khuasik cu song hmuahhmuah khai i thai pang i; cia hnuaah khual i tlawng tuhhnak heh a konteng lam ita inkhai i ngaisung bawm leh tu ih. 7Tlawng menma ilo in, Bawipa ai khuakhanhnak lekhaw, ning hnenah can tawkfang hmang i hiam i.
8Hemi Ephesa khua ah Pentecost nia tian um tuh ing.#Sua 23:15-21; Danp 16:9-11 9Engsantu tampui um napui heta ah a phahnemhnak naper um i.
10Ning hnenah Timothy hleng lekhaw lauhnak nai tuh loin sik tu ih, zaimantifangin ani khai kaimah bangin Pathian caah napertu i.#1Cor 4:17 11Aisu inkhai nautat mah ih; muang niu in i hnenah a hlengthilhnak tuhin a khualtlawnhnak ah bawm tu ih. Heta ah a hleng tuh heh sangtu unaute thawn umlam tlang ngai i ing.
12Kin unau Apollos ai thu ah, unau dangte thawn ning hnen tlawng tuhin forh dekdo de napui tunah kawi tuh tu a lungkhim lai lo i.#16:12 a lungkhim lai lo ti khiah “Pathian lungkhimhnak um thil lai lo i,” ti khai i thai i. A remcang deuh fangin kawi leh tuh i.
Thu Tawphnak
13Fimkhur bik in um tu ih, ning sanghnak songah kho ngai in ding tu ih; ralpha le hat ngai in um tu ih. 14Thil ning bawnhnak hmuahhmuah heh ithnak thawn bawn tu ih.
15Stephanas le a innsangte tu ning linghnak i. Amahte khiah Achaia peng songah Khristian hmasaber pawl i ai Pathian ai minungte caah amahte thinlung le thazang veksen in pe i. U le naute, #1Cor 1:16 16anite ituseh, a naperpuite ituseh, mi a konghoi dan khiah hlun tu hram ih tiin ning forh ing.
17Stephanas, Fortunatas le Achaicus hleng tlang manin i ang i; ning um lo khai ling hang lo ing. 18Thin ning nuamruai bangin kai khai thin i nuamruai ve i. Hebang mi heh thangphat tlak i.
19Asia ramai pawlpuite in hnuk ning sat tlang i; Aquila, Prisilla le amahte inn ai a khawmtu pawlpui in Khristian ithnak thawn hnuk ning sat ing.#Nal 18:2 20Heta ai unaute in hnuk ning sat tlang i. Pakhat le pakhat thuthnak cianghlim thawn hnuksatdun tu ih.
21Hetihin Kaimah Paul in hnuk ning sat ing tihnak i kut rori in ngan ing.
22Aisu khai Bawipa a it lotu heh a vumah cukcamhnak hleng tuseh. Maranatha:#16:22Maranatha tihnak tu Aramaic pong in a hlenghnak i ai a sullam tu ‘Kin Bawipa hleng zo i’ ti inkhai i thai i. kin Bawipa, kawi tuhang.
23Bawi Jesuh ai ninghiohnak heh ning hnenah um tu hram seh.
24Khrih Jesuh thawmin i ithnak heh ning vumah um tuseh. Amen.
Currently Selected:
1 KORIN 16: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
