Кердипэ 17

О сикаипэ э заветеско

1Кана э Аврамески сас энядэша эня брэш, о Сагбус о Яхвэ сикавдяспэс лэски тай пхэнляс:

— Мэ — о Дэл о Баро-Зорало#17.1 Авг. евр. адава си «Эль-Шаддай».. Пхер ангал Мандэ тай ов чячё. 2Мэ дав тут Мо завети тай кан дав тут бут-бут пуен.

3О Аврам бангило моса джи ки пху, тай о Дэл пхэнляс лэски:

4— Мэ ригатар, аки туки Мо завети: ту кан овэс о дад бутэ дюнядэнго. 5Адалэ вахытестар туки на кан пхэнэн Аврам, то нав кан овэл Авраам#17.5 Авг. евр. «Аврам» си «намлыс дад», тай «Авраам» си «дад бутэнго»., вай Мэ кердём тут о дад бутэ дюнядэнго.

6Тутэ кан овэн бут пуя.

Мэ кан керав тутар дюнядэс,

тай тутар кан овэн патишая.

7Мэ дав тут завети тай адава завети аякхажэ кан овэл алаи тэ пуенго алаи о вахытя: Мэ кан овав то Дэл тай о Дэл тэ пуенго. 8Алаи э пху Ханаан, катэ ту анкха джяти, Мэ кан дав тутэ тай тэ пуендэ, тай ой кан овэл сальтя тинри. Тай Мэ кан овав лэнго Дэл.

9О Дэл пхэнляс э Авраамески:

— Тэ ригатар, ту тай тэ пуя, кай кан овэн пал тутэ, алаи о вахыти камэл тэ керэс Мо завети. 10Аки Мо завети туса тай тэ пуенца пал тутэ, саво камэл ту тэ керэс: кажын мурш мэ овэл абрезани. 11Кажнески камэл тэ овэл кердо абрезания, тай адава кан овэл завети машкарэ Мандэ тай тумэндэ. 12Кажын тумаро пуёс мурш камэл тэ овэл абрезани, кана лэски кан овэл охто дес; аякха камэл тэ керэн алаи о породэс. Тай одова, кон аракхлило андэ тэ кхерэстэ, тай одова, кон нанай андар тэ породатэ, ами киндо ловэнги джятендэ. 13Тай кай аракхлило андэ тэ кхерэстэ, тай киндо ловэнги камэл тэ овэл абрезани. Мо завети опэр тумарэ тэнестэ кан овэл завети сальтя. 14Одова, кон на кан овэл абрезани, кан овэл кувдимэ андар пэ дюнястэ, вай пхагердяс Манца о завети.

15Генэ о Дэл пхэнляс э Авраамески:

— Ма пхэн тэ ромняки Сара, лако нав кан овэл Сарра. 16Мэ кан алгыштияв ла тай кан дав тут латар чявэс. Мэ кан алгыштияв ла аякха, кай ой кан овэл э дай э дюнядэнги тай э патишаенги.

17О Авраам бангило моса джи ки пху, ай асанило тай тюшунды: «Кан аракхлёл чяво ко мануш, савэски шэл брэш? Кан аракхлел пуёс ки Сарра, савяки энядэша?» 18Тай ов пхэнляс э Дэвлэски:

— Хоч о Измаил тэ овэл дживиндо ангал Тэ мостэ!

19О Дэл пхэнляс:

— Адава тэ ромнятэ ки Сарра кан аракхлёл чяво, тай ту кан тхэс лэс Исаак. Адава лэс Мэ кан дав Мо завети. Адава кан овэл сальтя завети лэски тай лэски пуенги. 20Ли катар Измаил Мэ шунлём тут. Мэ кан алгыштияв лэс тай кан дав бутэ пуен. Ов кан овэл о дад дэшудо сагбудэнго тай барэ дюняско. 21Ай Мо завети кан дав ко Исаак, саво ки Сарра кан аракхлёл туки адава вахыти окова брэш.

22О Дэл бытэрды тэ зборизэл э Авраамеса тай ваздиндило лэстар.

23Одова жэ дес о Авраам лиляс пэ чявэс э Измаилес тай алаен, кон аракхлило андэ лэски кхерэстэ тай киндо рупунэ ловэнги, алаи э муршэн андэ кхер, тай абрезал лэн, сар пхэнляс лэски о Дэл. 24Кана сас о Авраам абрезани, лэски сас энядэша эня брэш. 25Ай лэски чявэски э Измаилески сас дэшутрин. 26О Авраам тай лэско чяво о Измаил ли о дуй сас абрезаня андэ екх дес. 27Тай алаи лэса о мурша андэ кхер ки Авраамеско, ли одова, саво аракхлило андэ лэски кхерэстэ я киндо ко джятя, сас абрезаня екхетханэ лэнца.

Currently Selected:

Кердипэ 17: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб