Кердипэ 16
16
Э Агарь тай о Измаил
1Ки Сара, ки ромни ки Аврамески, на аракхлёнас пуя лэски. Латэ сас иргатинка андар Египти, ой бучёлас Агарь. 2Э Сара пхэнляс э Аврамески:
— О Сагбус о Яхвэ на диняс ман пуен. Джя, пашлё мэ иргатинкаса. Файма, латар мандэ кан овэн пуя?
О Аврам кердяс, сар пхэнляс э Сара. 3Э Сара, лэски ромни, лиляс пэ иргатинка, э египтянка э Агаря, тай диняс сар ромня пэ ромэстэ. Адава кана уло, о Аврам бэшэлас андэ Ханаан дэш брэш. 4Ов пашлило э Агаряса, тай ой насвалили пуёстэ. Кана э Агарь галили, кай насвали пуёстэ, ой лиляс тэ на гинэл пэ сагбуиса. 5Дэчи э Сара пхэнляс э Аврамески:
— Ой кай керэл манги хурлуки, ту сан дошало. Мэ динём э иргатинка тутэ опэр тхан, ай акана ой джянэл, кай насвали пуёстэ, тай на гинэл ман. Мэ керэл о Сагбус о Яхвэ амэнги цындос.
6— Вай ой ти иргатинка. Кер ласа, со мангес, — пхэнляс о Аврам.
Дэчи э Сара лиляс аякха тэ тасавэл э Агаря, кай одоя нашли латар. 7О Миляики э Сагбуско э Яхвэско аракхляс э Агаря андэ ливади, надур катар ханинг. Адая ханинг сас паш ко дром ко Шур. 8Ов пхучляс:
— Агарь, иргатинка э Сараки, катар ту алян тай кай джяс?
— Мэ нашав мэ сагбуисатар катар Сара, — пхэнляс ой.
9Дэчи о Миляики э Сагбуско э Яхвэско пхэнляс лаки:
— Джя палэ тэ сагбуисатэ тай шун ла.
10Генэ о Миляики э Сагбуско э Яхвэско пхэнляс лаки:
— Мэ аякха бут кан керав тэ пуен, кай лэн нащи кан гинэс.
11Генэ о Миляики э Сагбуско э Яхвэско пхэнляс лаки:
— Ту акана насвали пуёстэ, тай кан аракхлёл тутэ чяво. Тхэ лэс Измаил#16.11 Авг. евр. нав «Йишмаэл» си «о Дэл шунэл»., оничин о Сагбус о Яхвэ шунляс тэ хурлукестар.
12Ов кан овэл, сар вэшэско джёро;
лэски васта кан овэн мамуй алаендэ,
тай о васта алаенги кан овэн мамуй лэстэ,
ов кан бэшэл андэ душманлыки алаи пэ пхралэнца#16.12 Я «ов кан бэшэл ко вастоки пэ пхралэндар». .
13Э Сагбуски э Яхвэски, Саво зборизэлас ласа, Агарь диняс нав Эль-Рои#16.13 Авг. евр. «Эль-Рои» си «о Дэл, Саво дикхел ман»., вай ой пхэнляс:
— Анкха мэ дикхлём Одолэс, Кон дикхел ман.
14Аки соски одоя ханинг бучёлас Бээр-Лахай-Рои#16.14 Авг. евр. «ханинг одолэски, саво бэшэл тай дикхел ман».. Ой ли анкха отхэ, машкарэ ко Кадэш тай ко Беред.
15Ки Агарь аракхлило чяво э Аврамески, тай ов тхэдяс пэ чявэс Измаил. 16Э Аврамески сас охтодэша шов брэш, кана лэско чяво о Измаил аракхлило ки Агарь.
Currently Selected:
Кердипэ 16: КРБ
Highlight
Share
Copy
Want to have your highlights saved across all your devices? Sign up or sign in
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/
