RUTI 2
2
Ruti aiṟunda mdeminyi fo Boazi
1Kyasia Noemi chu nawewode mana o mae o mii oke, mndu ang'anyi msuṟi o kishari kya Elimeleki, rina lyake nyelaho nyi Boazi. 2 Ruti Mmoabu kawia Noemi, “Wulalu njihenda demenyi, njihende njetola mtsuhaṟo fo mahaa ipfo numa ya iwo wasambuo ko icho ngawona osu oshangunyi loke.” Kambia, “Kyasia manoko kuhendie.” 3Nao kahenda, kacha kyetola mtsuhaṟo njauhenyi ipfo numa ya wesambuo shilya shadekiapfo, kui osu lulya awehambie kakoya ameshikia dema liwei lya Boazi, cho awei o kishari kya Elimeleki. 4Kiidima Boazi kacha awuka Bethlehemu kaiṟikiṟa walya wesambuo kahamba, “Mndumii nakae nanyo.” Nawo wakamiidikia, “Mndumii nakuwikie ona.” 5Kiidima Boazi kawesa mṟundi umu mohoṟokia wesambuo, “Aichu nyi mana o wu Ichu o wakaṟ” 6Ulya mohoṟokia kambia, “Nyi mana ulya o waka Mmoabu ulya walecha na Noemi wawuka Moabu; 7nao kahamba, hoi ngaterewa nenga momu njiche numa ya iwa wakeri isambuo njitole, mtsuhaṟo; kyasia kacha nao naletsinda wokia ngamenyi mṟasa wulalu, indi nalekaa kanyi kiheri kifui.”
8Kyasia Boazi kawia Ruti, “Manoko, adanyia; iyo kulahende itola mtsuhaṟo mademenyi hengi, manya kulakure iya, indi ukae iya hafui na mana chu oko o waka. 9Meso hapfo haoshane na dema lilya waihenda isambuo, nooshane nawo; achinjilewawasa wanake wo walakupaaye Koangaa, henda uambuye nungu tso unyo ifo wadahie.” 10Nalyo kaarama wanda kamwana mnu, kambia, “Nyi wuda ngawona osu oshangunyi lopfo, mtano konjimanya, inyi nji mhenu.” 11Nao Boazi kambia, “Njileongoyo mnu shapfo shose chando ulewutia mamii opfo, wokia mii opfo apfa; na chando uleda ndeo na mayo, na oruka lopfo ulefeeyopfo koshikia wandu kulawewaichi wokia oo. 12Mndumii nakuwikie ona kya maṟunda hapfo, nowone kyooṟa kisumhanyi ko Ruwa, Mndumii-Ruwa o Israeli, ichu kuledichiya shiya makungo hake.” 13Nalyo kahamba, “Mndumii oko, njiwone osu oshangunyi lopfo, kipfa iyo nyi ochihiṟa mrima foko, na ihamba shicha sha kisinga kyapfo, ma chando njilai umu o shisinga shapfo.”
14Ngoseṟa kiheri kya kelya Boazi-cho kambia, “Ncho na kodu, ulye, mkate fodu na ifuchoweṟa mṟingenyi fotarang'aa fodu.” Nahong'u kadamia hamu na walya wesambuo, wakamnenga maimba makaange hamananatsie wuki, kalya kaihuda, na itsuhaṟa. 15Nao kiheri alekure-se kundu nahende itola matsuhaṟo, Boazi kawawasa wanake wake kahamba, “Mlekenyi natole chi matsuhaṟo tupupfo manya shilimusho mulampomie. 16Kingise mumbutie kitutu isho mupfungie kui shikonde-shikonde nakudaaye mulamwime.” 17Kyasia Ruti katola shilya shiletsuhaṟo mṟasa kiukanyi; Kakapa kapa shilya alesanyia kaichuṟa idewe limu lya Ngano njicha. 18Kakudika, kawuya na mṟinyi. Kaloṟa mamii shilya aende, kawuta na shelya shilya aletsuhaṟa ameihuda kamneenga.
19Nahong'u mamii kambesa, “Inu nku ohenda itola. Nyi hanga oṟunda. Nawikio ona ichu akumanya.” Nao kaongoya mamii oke kya ichu aleṟunda koke, kahamba, “Mndu chu ngaṟunda koke inu rina lyake nyi Boazi.” 20 Noemi kawia malyi o mana, “Icho nawikio ona nyi Mndumii kipfa alakunda ida wucha woke, ko wai na moo ang'u ko wapfiie.” Kyasia Noemi kambia, “Mnduchu nyi o oshari lodu, nyi umu o kishari kyadu kya kufui.” 21Ruti Mmoabu kahamba, “Ee, kanjiwia, ukae iya iya hafui na wanake wako mṟasa lumarise isambuo shilimu shako shose.” 22Noemi kawia Ruti malyi oke, “Manoko nyi kikicha uoshane na wana wake wa kika, manya wandu walakukooye demenyi lingi lyose.” 23Koikyo kaoshana na wana walya wa kika wa Boazi na isaṟia, itane wamarisa isambuo kilimu kilya kya Ngano nao amonyi nawekekaa kulya ko mamii oke.
Kimochi Bible © Bible Society of Tanzania, 2016.