WAROMA 4
4
1Aka luhambe luda kya nde yadu Abrahamu ngesa? Ke nyi luwemkoya ai mku odu molualutsa kui mbihu ngesa? 2Kokoya Abrahamu ametano mhoṟotsu kui mweke fo shilya o awutie, nyi awode-ho kyekuṟumisha, kya kakye echikushela sumuhana na Ruwa pfo. 3 Kyamba kilya kii-kiṟehye kyo kehamba kida? Kehamba ke Abrahamu nyi aleidikia Ruwa, nao Ruwa kamtana mhoṟotsu. 4Mndu moṟundya ungi, wueri woke alekewutalyo kemsaṟya kya indi nyi wusumhanyi woke. 5Indi mndu alawa moṟundia-woṟunda kawa moidikia kekusirya Ruwa ichu awa motana mndu alasumhanyi nawe mhoṟotsu nao nyio kui wuidiki wu woke atano mhoṟotsu. 6Na wudo na Dawidi ahambye kya sia ya mndu Ruwa amtanyie mhoṟotsu kulai ko mawuto. 7 Nyi ahambye, “Nanga iwa waiwahoṟye matahachyo hawo njonyamaṟo tsawo tsikaangatso. 8Nanga msoṟo ulya Mndumii alaikumbuose manyamaṟo hake!”
9Nanga ii nyi ya wadine tupu ang'u nyi na ya walawadine ngesa? Na ko walya walawadine daa. Kyamba lomhamba ke, “Abrahamu nyi aleidikia nao Ruwa kamtana wuhoṟotsu.” 10Kyasia Abrahamu nyi aleitalyo ada ngesa? Ngesa nyi lyandi amedino a lyandi alawemdino? Chi lya amdinopfo, na lya alawemdino. 11 Na kichano kya odino kyo alekiambya kiwe kichano kya wuhoṟotsu wulya wuwemba kui mweke fo wuidiki wulya awei nawo mandi alawendedino, kundu nawe mku o walai wadine wechiidikya wakashika italio wuhoṟotsu wu.
Kyaasa kya Ruwa kekeambio kui wuidiki
12Nawewa na mku o wa-wadine iwa walai wadine wadi kya indi na wekyeosha njia iya iya ya njayo tsa wuidiki ndeyadu Abrahamu awewuwode lyandi alawemdino. 13 Kyamba kyaasa kilya keteṟya Abrahamu ang'u luwa lyake ke wakudaaye wuyana wu, kyoṟa kyo kilawei-kiteṟye kui mweeke fo wuwawaso kya indi kui mweeke fo wuidiki wotalio wuhoṟotsu. 14 Kyamba kukoye walya wakuwodie wuwawaso-hu wawei waoṟi weoṟa wuyana, wuidiki wuwechiwa wo maai na kyaasa-kyo kya Ruwa chi kindo-pfo. 15Kyamba wuwawaso wokeende mondu kya indi ipfo kundo kulawode wuwawaso kwipfo yumbuyapfo.
16 Nkyo kimaduma kyose kiwe kui wuidiki kikuhendekye njia ya wutonga, kundu kyaasa kilya kiwe kituwe kituwie orio luwa lyose chi iya ipaṟikye ipfo wuwawasonyi tupupfo kya indi na iya ipaṟikie wuidikinyi wo Abrahamu ichu akeri mku odu lose. 17 Kisumhanye kilya kii-kiṟehie, “Ngamekuwika mku o mkambo ifoi.” Kikawa kido ipfo sumuhana na Ruwa cha Abrahamu awemwidikie ichu ai moṟutsa wapfu na kui idedo lyake shindo shilaiho shikawewa. 18 Ipfo kundu kulawewode kowedia Abrahamu aleidikya kechiwedya ke nashike iwa mku o mkambo ifoi kisumhanye kilya kii-kihambe, “Nyi wudi-ng'u luwa lyapfo lyechifo cha nyenyeri.” 19 Alalehele wuidikinyi woke machandu aweichi ke mbihu foke fomkachuka ashitsye kufui maka ihana manya wusu wo Sara chando wuwekachukye cha mhumba. 20Indi alepfio nyi mdo kya kyaasa kilya kya Ruwa nade alakiidikyapfo, nyi elewanga wuidikinyi kechiwikya Ruwa mng'ano. 21Kawekusihya pyu ke Ruwa ai na pfinya yeawutsya kyaasa aleteṟya. 22Nalyo nyilyo kalitalio wuhoṟotsu. 23Indi ilyo lyehamba, “Kalitalio wuhoṟotsu” chi kimaduma kyake amonyi tupu-pfo. 24Kya indi lii-iṟehye na kimaduma kyadu so lushike ilitalio ludi lochikusihya na Ruwa-chu aṟutsye Yesu Mndumii odu ipfo ko wapfu. 25 Nyio icho ammaa ihenda idambiko kimarete kya matahachyo hadu kashika iṟutso kipfa kya wuhoṟotsu wodu.
Iidikyo oshangunyi lo Ruwa
Currently Selected:
WAROMA 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.