WAROMA 12
12
Ohendo lo moo kiidi kya iṟunda lya Ruwa
1Ngashika aa ngamtutuma-ng'u, wanawawama, njiimwitike nyi osaṟio lu lo Ruwa, ke mudambike mbihu yo yanu iwe kidaso kiele kii na moo kichihianyi na Ruwa; kiwe wuindi wonu wusumhanyi. 2Ma mulawone mokuwakisha na wuyana-wu wo kiwulalu, kya indi muhende kuhalwo mochikulawukya mhie, kundu muidime iidikyana na kilya Ruwa akundi, kilya kii kicha kichihiṟye, kyawukye swai.
3Kisumbo njii-msumbe nakyo kyanjienenga njiwie orio mndu ose akeri ipfo konu, ke nalahie kyake kyekung'anyisha kyeng'anya kilya kimsuhananye, kya indi nahie-ho kyeidikya kidembo kyake chando Ruwa ahawye orio mndu kiheo kya mwidikye. 4 Kyamba chando so lui na mbihu fuwode shiwungo shifoi, indi shiwungosho shilai shiwawasye iṟunda lya mbaṟi imu shose. 5Nyi wudo naso lufoi ludi nyi lukeri mbihu fumu fuu-msanze Kristo-hu, indi kyadu so luikayana shiwungo. 6 Na shisumbo so lui-wasumbe shirianyi na wutonga wulya, sho shii shingi na shingi. Msa amsumbe wuikimbi naikimbe kisumhanye wuidiki. 7Msa amsumbe wuṟundi naṟunde. Msa amsumbe wuloshi naloshe. 8Msa amsumbe chila yewhiṟia wengi moo nawewuta ado. Kwipfo ai motutuma, nawekaa echitutuma; kwipfo Sa ai mohawia wengi shindo awode nahawe ai msalari, kwipfo ai mosaṟya, nakae-ho echiṟamka. Na mosaṟia nasaṟie na sia.
9Mkundie fukae fulawode wulembetseṟi. Tangaluonying'u kilya kii kiwicho, mukuwawe na kilya kii kicha. 10Mkundana fonu fokundana fuwe fo wakanyi kamu, ngapano moira iwe yewikyana wuindi. 11Mulalehele ihidya siṟi, mwake-akye mrimenyi yanu mochisingya Mndumii. 12Ipfo kikusihyonyi kyanu mbechihio, ipfo shiwirenyi mukuhode, ipfo wuindinyi woiterewa mukae-pfo kiheri kyose. 13Mudaṟane na wandu wa Ruwa kya shindo wawuṟye, mukukambiṟe ihida wahenu kui wulalutsa.
14 Walya waimterengya muwawikye ona. Ee-wo iwawikya ona, ma mulawasese. 15Kewechihionyi kimu na iwo wawachihie, muwelia na iwo welia. 16 Muwe mochikayana kui mhie fumu koorio mndu, mulawone mochihia kya shidembo shesonguo, kya indi muchumie muwodanyi na walya watutu. Mulakutane waṟango nyo muwenyi.
17Kiwicho mndu aimbutia mulawone mochimtaa na kiwicho kingi; muwe mochikusaṟa isho shii shicha ipfo sumuhana na wandu wose. 18Kokoya kyewa-ho kui pfinya yo nyo murie, kewadienying'u wandu wose ofoṟo. 19 Wana wa wama, Ma mulatae kiṟaache deyenyi Ruwa, kyamba kui kuṟehye kiṟaache nyi kyako inyi, nyio inyi njechitaa. Nyi wudo Mndumii ahambie. 20 Kya indi iyo mkituwa opfo kawado nyi njaa kewemnenge shelya, kawado n nyoda kewemrutse mṟinga; kowika kudo nyi ochimsanya okaa lwake oo mdo-hu foke. 21Ulakunde iwinzo nyi kilya kii kiwicho, kya indi kilya kii kiwicho ukiwinze ochiwuta kii kicha.
Iindia wasongoru wa oruka
Currently Selected:
WAROMA 12: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
